Malika 1 - Biblia Umwikemo 1996

Ululūmbililo lwa Johanị Umōsị

¹ Ubu bo bwandilo bwa Ị̄bāngilị, īndumị inụnụ, ili lịkunjoba Jesụ Kilisịtị Umwana gwa Kyala.

² Lyalyandịle bo mụmo āsị̄mbị̄le unkụ̄ngụlụka Jesaja apa ātigi: Kēta nịkuntuma ugwandumị gwangu nkyenị mmyako, uju ịsakutendekesyaga injila jako.

³ Ilịsyu lya nkōlelị lịkukōlela ndukubo lịkuti: Amụtendekesyege unsebo gwa NTWA, mụgwasyege injila syake.

⁴ Mo mụmo alinkuboneka Johanị ukōsya ndukubo nukulūmbilila ulōsyo lwa lupīnduko, ulu lụkutwala ubuswe bwa nōngwa.

⁵ Po papo balinkunkulukila abāndu ikị̄su kyosa kya mụ Jụtaị naba mụ Jelụsalemụ bōsa, balinkōsịgwa ndwisi Jolịtanị, bo bịkwịlāta īnōngwa syabo.

⁶ Umwene Johanị lolị āfwalaga unselekesye gwa lusyoja lwa ngamịla, numpāngo gwa lukoba mụnsana; kangi ạ̄lyaga amapalālila nulūkị lwa mmatēngele.

⁷ Alinkulūmbilila alinkuti: Pānyụma ịkwịsa uju āngīndịle amaka une, uju ngabagila nukwịnama pakwabula utukoba twa mfịlato fyake.

⁸ Une ne mbōsịsye namīsi, lolị umwene isakubokesyaga na Mbepo Mwịkemo.

Ukōsịgwa nukugelịgwa kwa Jesụ

⁹ Lelo po papo mmasịku gala, Jesụ alinkwịsa ukufụma mụ Nasaletị nkị̄su kya mụ Galịlaị, alinkōsịgwa kwa Johanị, mwa Jolịtanị.

¹⁰ Nakalīnga ịtolo bo ịkufyuka mmīsi, alinkwaga kumwanya kụkwịguka, Mbepo ịkunsololokela ukuti ngụ̄nde;

¹¹ ilịsyu lilinkufụ̄ma kumwanya lilinkuti: Ugwe gwe mwanāngu unkūndwe, mmyako mo nịkyelịle.

¹² Nakalīnga ịtolo Mbepo alinkwakumbīka nndungalāngala.

¹³ Mo alinkwakuja nndungalāngala amasịku amalōngo mana, alinkugelịgwa na Setano; alinkuja pamopēne nifịnyamāna, abāndumị ba Kyala balinkummbōmbela.

Jesụ ịkwanda ukulūmbilila

¹⁴ Pānyụma bo Johanị akolị̄gwe, Jesụ alinkubūka mụ Galịlaị, alinkulūmbilila īnongwa īnụnụ sya Kyala,

¹⁵ alinkujoba alinkuti: Akabalilo kafịkịle, ubutwa bwa Kyala busegelị̄le; amụpīndukege nukusị̄tika īnōngwa īnụnụ.

Jesụ ịkubabilikila abafụ̄ndịgwa bāke abatasị abalobanswi bana

¹⁶ Lelo bo ịkwenda pāmbali panyanja ja Galịlaị, alinkubabona ba Sịmonị na Andeleja ugwamyabo gwa Sịmonị, bo bịkusopa ulwelo mụnyanja; namanga bāli balobị.

¹⁷ Po papo Jesụ alinkujoba nabo alinkuti: Ị̄saga mụngongege nịkubapelaga ukuja balobị babāndu.

¹⁸ Nakalīnga ịtolo balinkusịleka īnyēlo syabo, balinkunkōnga.

¹⁹ Lelo bo akīndịlepo panāndi, alinkubabona ba Jakobụ unnya Sebetaị na Johanị ugwamyabo bali mwịbōtị, bịkutendekesya īnyēlo syabo.

²⁰ Nakalīnga ịtolo alinkubabilikila; balinkunndeka ugwịsabo Sebetaị mwịbōtị pamopēne nababōmbị, balinkunkōnga.

Jesụ ịkummbūmbulusya umụ̄ndu ugwa mbepo īnyalị mụ Kapelịnaumụ

²¹ Balinkwenda balinkwakufịka mụ Kapelịnaumụ. Nakalīnga ịtolo pị sịku lya Sabāti, alinkwịngila nnyụ̄mba jabo ja kwịpụ̄tilamo alinkumanyịsya.

²² Balinkuswịga fị̄jo ukumanyịsya kwake, namanga bo ịkumanyịsya ābonekaga ukuja jo mwenenasyo jūjo, akāli bo abamanyakalata.

²³ Lelo nnyụ̄mba jabo ja kwịpūtilamo alinkujamo umụ̄ndụ ugwa mbepo īnyalị, jo alinkukōlela

²⁴ alinkuti: Tuli bukị nanụngwe gwe Jesụ gwa Mụ Nasaletị? Gwịsịle nkutupyụta ịtolo? Ngumēnye ugwe uli mwịkemo gwa Kyala.

²⁵ Lolị umwene Jesụ alinkujikemela, alinkuti: Batama! Sokamo mmụ̄ndu uju.

²⁶ Po papo īmbepo īnyalị jilinkunndụsanịkisya kōsakōsa, jilinkusōka bo jịkukụ̄ta īngụ̄to īngulūmba.

²⁷ Po papo balinkuswịga ịtolo bōsa, balinkulālūsanịa balinkuti: Fyo fịndu fịkị fịfịfị? Lumanyịsyo lupya! Buno na sị mbepo īnyalị ịkusịlagila namaka, isyene sịkwenda nukummwịtika.

²⁸ Nakalīnga ukufụmụka kwake kulinkufịka kōsakōsa, mfị̄su ifị fịpalamēne naGalịlaị.

Jesụ ịkummbūmbulusya unko gwa Petelị unkị̄kulu, nabāngi

²⁹ Po papo lelo bo basōkịle nnyụ̄mba ja kwịpụ̄tilamo, balinkwịngila nnyụ̄mba ja ba Sịmonị na Andeleja, pamopēne na ba Jakobụ na Johanị.

³⁰ Lolị unko gwa Sịmonị unkị̄kulu ālāmbalēle, āli nịsekema. Nakalīnga ịtolo balinkummbūla Jesụ.

³¹ Alinkusegelela kumyake, alinkunkola ikiboko alinkunsụmụsya. Po papo īsekema jilinkunndeka, alinkubabōmbela.

³² Namajolo lelo bo ilị̄suba lijōngịle, balinkuntwalila ababịne bōsa, naba mbepo īnyalị.

³³ Bope nabenekāja bōsa abā mụmo balinkubūngāna pakifịgo.

³⁴ Alinkubumbulusya ababịne ba bị̄ngị īndamwa syosa, nukusịsōsya īmbepo īnyalị sị nyịngị ịtolo. Alinkusịkānịsya mbepo īnyalị bo sịkuti tujobe, namanga syalimmēnye.

Jesụ ịkulūmbilila mụ Galịlaị

³⁵ Nulubūnju bo kukāli ukukya alinkutemēlela fị̄jo, alinkusụmụka alinkubūka ndukubo, mo alinkwakwịpụ̄ta.

³⁶ Umwene lelo Sịmonị nabanịne balinkunndōnda.

³⁷ Bo bammwāgịle balinkummbūla balinkuti: Abāndu bōsa bịkukulōnda.

³⁸ Umwene alinkubabūla alinkuti: Tubūke kubūngi ntwaja utūngi utwa mbupị̄pị mụno, ukuti mope ngalumbililege; buno syo isị nịsịle.

³⁹ Po papo alinkubūka alinkumala kyosa ikya mụ Galịlaị, alinkulūmbilila nnyụ̄mba syabo sya kwịpụ̄tilamo, nukusịsōsya īmbepo īnyalị.

Jesụ ịkummbūmbulusya unnkoma

⁴⁰ Lumo umụ̄ndu gwa bukoma alinkwịsa kumyake, alinkufụgama nukupyelesya alinkuti: Linga gwịganịle, ubagị̄le ukūnyēlusya.

⁴¹ Umwene Jesụ ikisa kilinkummwaga, alinkugolosya ikiboko kyake, alinkumpalamāsya alinkummbūla alinkuti: Nịganịle, elukaga.

⁴² Nakalīnga ubukoma bulinkumalika alinkweluka.

⁴³ Po papo Jesụ alinkusōsya mbibimbibi,

⁴⁴ alinkummbūla alinkuti: Ungammbūlaga umụ̄ndu najumo lolị būka ukị̄bonesye kumpụ̄tị; kangi ukasosyege ifya kwịjēlukisya fịfyo ālagị̄le Mose, fyo fịjege fya kumanyịlamo abēne.

⁴⁵ Umwene lolị umụ̄ndu jujuju, bo asōkịle alinkwanda ukulūmbilila nukusịfụmụsya īnōngwa mōsamōsa; fyobēne Jesụ alinkusịta nukwịngila nkāja pabwelụ; lolị alinkuja pānja ịtolo pabusịtabāndu; po papo abāndu balinkufụma mōsamōsa balinkwịsa kumyake apa ālipo.