Lʉʉka 1 - Biblia Umwikemo 1996

¹ Gwe Mwimikigwa Tyofịlị: Abāndu bị̄ngị bị̄jūlịle ukusị̄mba isị basịbwene sịsịsị ukubōmbịgwa mmyitu.

² Basị̄mbịle isị tubūlị̄gwe nāba bāsịbwene ukufụma mụ mbwandilo, aba bāfụmụsyaga īndumị jijiji.

³ Po lelo gwe mwimikịgwa, kunōngwa jakuti īnōngwa sịsịsị nsyenēsị̄sye ukufụma bo sịkwanda, nāgịle kunụnụ ukukusị̄mbila isị sịbạ̄tikị̄gwe.

⁴ Mbōmbịle sịsịsị ukuti ubumanye ubwanalolị bwa syosa isị umanyịsị̄gwe.

Ukupāpịgwa kwa Johanị umōsị nukufụmụsịgwa

⁵ Mmasịku ga Helotị, umalafyale gwa kị̄su kya Jụ̄ta, āliko umpụ̄tị jumo uju īngamụ jake āli jo Sakalịja ugwa nkilūndilo kya banya Abịja pakabōmbo; āli nunkasị gwa nkikolo kya Alonị, īngamụ jake āli jo Elịsabetị.

⁶ Bo babīli bāli bagolofụ nkyenị mwa Kyala, bēndaga mụ̄ndagilo na mụngomēlesyo sya NTWA syosa, kisịta ịnona nalịmo.

⁷ Lolị bakāli na mwana najumo papo Elịsabetị āli nngūmba, kangi bo babīli bākāngēle.

⁸ Mwịsịku limo, lumo Sakalịja ālipakubōmba īmbōmbo jabupụ̄tị nkyenị mwa Kyala ndubạ̄tiko lwa kijabo kyake nnyụ̄mba īnyị̄kemo, bo akabalilo kāke ka mbōmbo kafikile,

⁹ ukukōngana nulwịho mụno bābōmbelaga abapụ̄tị, ubulagusị bwalinkolịle ukufụ̄kisya pakigemo kya kwịkemēkesyapo. Po papo alinkwịngila nnyụ̄mba īnyị̄kemo ja Ntwa,

¹⁰ bo ikilūndilo kya bāndu pānja kịkwịpụ̄ta pakabalilo ka kufụ̄kisya.

¹¹ Po papo alinkunsetukila ugwandumị gwa NTWA, alinkwima kulubafụ lwa kukị̄līlo lwakigemo kya kufụ̄kisyapo.

¹² Po papo Sakalịja alinkunyomoka bo ammbwene, ulutēnde lulinkummwaga.

¹³ Lolị ugwandumị alinkumbula alinkuti: Ungatetemaga, Sakalịja, ulwịpụ̄to lwako lwambililị̄gwe, unkasịgo Elịsabetị ịkukupāpilaga umwana unndumyana, jo kwịsakumpaga īngamụ ja Johanị.

¹⁴ Po kwịsakusekelaga nukuhoboka, kangi bị̄ngị bịsakusekela bo apāpị̄gwe;

¹⁵ namanga ịsakujaga mụ̄ndu nkulūmba nkyenị mwa Kyala, atịsakunwaga ubwalwa bwa māfị̄lu nabumo, bope nubwalwa ubukali nabumo, ịsakwịsulaga Mbepo Mwịkemo, ukufụma mụ mụ̄nda mụnna.

¹⁶ Abany'Ịsịlaelị bị̄ngị ịsakubapīndulilaga ku Ntwa Kyala gwabo,

¹⁷ kangi ịsakuntalilaga Kilisịtị ukwịsa, mụmbepo na mmaka ga Elịja, kukusịgomolela kubānābo īndụ̄mbụla sya bị̄sabo, nukubasyụtụlila ku mahala ga bagolofụ abākị̄lo, nukubabikila ngānị ku Ntwa aba bịtendekị̄sye.

¹⁸ Po papo Sakalịja alinkujoba nu gwandumị alinkuti: Syo nịsakusịmanyaga bule bule sịsịsị? Namanga une ngāngēle jope unkasị gwangu nkāngale.

¹⁹ Ugwandumị ālimmwamwịle ātịle: Une jo une Gabịlyelị, ne ngwīma mbujo mụno alịmo Kyala; nndumị̄gwe kukukubūla, nukukutwalila īnōngwa īnụnụ isị.

²⁰ Ukēte, kujaga kinụ̄nụ, utịkujobaga ukwịsakufịka pị̄sịku ili sịsakwịsilaga sịsịsị, papo ukāgịtikaga amasyu gangu aga gịsakwịsilaga nkabalilo kāke.

²¹ Abāndu balinkunngụ̄lila Sakalịja, balinkunswịga ukukābila kwake nnyụ̄mba īnyị̄kemo.

²² Lelo bo asōkịle, alinkutolịgwa ukujoba nabo, balinkwenda nukusyaganịa ukuti akibwene ikisetuka nnyụ̄mba īnyị̄kemo; umwene alinkubīnga kīkiboko alinkuja kinụ̄nụ ịtolo.

²³ Bo akabalilo ka kukotoka kị̄sịle, alinkubūka kukāja kāke.

²⁴ Lelo bo pagonịlepo Elịsabetị alinkwenda nukwịnoga umwana alinkulīnda mụ nnyụ̄mba imyesị mịhāno alinkuti:

²⁵ Lilino kūnyụma kuli syosa UNTWA angētị̄le nkisa, āsōsị̄sye īsonị kubāndu.

Ukufụmụsịgwa ukupāpịgwa kwa Jesụ

²⁶ Mmwesị gwa ntandatu ugwandumị Gabịlyelị ātumị̄gwe na Kyala ku kāja ka Galịlaị aka īngamụ jake jo Nasaletị,

²⁷ ātumị̄gwe kunndīndwana uju īngamụ āli jo Malịja.

²⁸ Ugwandumị alinkwịsa kumyake alinkuti: Ugonịle gwe ukabile ilị̄pyana, Untwa ali nanụngwe!

²⁹ Umwene alinkutēnguka fị̄jo mụ̄nda alinkwịlūsanịa alinkuti: Uluponịo ulu ko kuti fịkị?

³⁰ Po papo ugwandumị alinkummbūla alinkuti: Ungatetemaga Malịja, buno ulyagịle ilị̄pyana kwa Kyala.

³¹ Kēta, kwịnogaga umwana, kwịsakumpapaga umwana unndumyana jo kwịsakumpaga īngamụ ja Jesụ.

³² Ịsakujaga nkulūmba ịsakujobịgwaga ukuja Mwana gwa ju Nkīnde; Untwa Kyala ịsakumpaga ikikota kya butwa kya Ndabitị ugwịse,

³³ Ịsakulagilaga nnyụ̄mba ja Jakobụ bwịla ịtolo; ikitāngālala kyake kitịsakumalikāngamo.

³⁴ Malịja alinkujoba nugwandumị alinkuti: Syo sị̄pelege bulebule sịsịsị ne ngaja na nnyāmbala?

³⁵ Ugwandumị ālimmwamwịle ātịle: Mbepo Mwịkemo ịsakukwịsilaga, na maka ga ju Nkīndegịsakukukụpikilaga; bo buno buno lelo umwana uju ịsakupāpịgwaga ịsakujobịgwaga ukuja mwịkemo, Mwana gwa Kyala.

³⁶ Kēta ugwamyinụ Elịsabetị mbukāngale bwake jope ịnogịle umwana unndumyana; lilino umwene umwesị ugu gwa ntandatu uju bạ̄tigi nngūmba.

³⁷ Namanga Kyala sịkajako isị sịntolịle.

³⁸ Malịja ālyamwịle ātịle: Une ndi mmbōmbị gwa Ntwa asị̄sege bo mụno ujobị̄le. Po papo ugwandumị alinkusōkapo alinkubūka.

Malịja ịkubūka kukunkēta Elịsabetị

³⁹ Mmasịku gala Malịja alinkusụmụka alinkukūja ukubūka nkị̄su kya fyamba, nkāja ka banya Jụ̄ta.

⁴⁰ Alinkwịngila nnyụ̄mba ja Sakalịja alinkumponịa Elịsabetị.

⁴¹ Lelo bo Elịsabetị apilị̄ke uluponịo lwa Malịja, umwana alinkukị̄na nndwanda lwake; po papo Elịsabetị alinkwịsula Mbepo Mwịkemo,

⁴² alinkukōlela ilịsyu ilịkulūmba alinkuti: Uli nsajịgwa ugwe mbakị̄kulu bōsa kangi sajịgwa ni mbejụ iji jili nndwanda lwako!

⁴³ Syo syendịle bulebule ukuti īngulūmba sịsịsị sị̄nyāgege une, ukuti unna gwa NTWA gwangu ị̄sege kukūngēta une?

⁴⁴ Ukēte, bo mbilị̄ke ukūmbonịa umwana nndwanda lwangu alinkukị̄na nulusekelo.

⁴⁵ Nsangalufụ fị̄jo uju ikwịtika ukuti īndumị iji akutumị̄le ugwe UNTWA jịsakwịpelaga ja nalolị!

Ulwimbo lwa Malịja lwa Lutụ̄fyo

⁴⁶ Malịja alinkujoba alinkuti: Īndụmbụla jangu jịkuntụ̄fya UNTWA.

⁴⁷ Umōjo gwangu gụkusekela kunōngwa ja Kyala Umpokị gwangu,

⁴⁸ Namanga āngūmbwịke, une, ne mmbōmbị gwake ne ngaja mụ̄ndu mwene. Ukwanda lilino abāndu bōsa bịkunjobaga ukuja nsangalufụ,

⁴⁹ kunōngwa ja mbōmbo īngulūmba isị Kyala Umwenemaka gōsa āmbōmbị̄le une. Īngamu jake nyịkemo.

⁵⁰ Mụngulilo syosa ịkunāngisya ikisa kyake kuli aba bịkummwimika.

⁵¹ Agolwịsye ikiboko kyake kya maka abapalagẹ̄nị̄e abamatīngo pamopēne naisị bikulōnda ukubōmba syosa.

⁵² Abasụlwịsye abanyafyale ba maka pafịkota fyabo fya butwa, abị̄nwịle abāpāsi.

⁵³ Abānjala abịsukị̄sye īmboto abakabị abakagịle kisịta kubapa nafịmo.

⁵⁴ Akị̄bwa ulufị̄ngo ulu, āfị̄ngịle na banyēnya bītu, kangi antūlịle ummbōmbị gwake Ịsịlaelị.

⁵⁵ Akūmbwịke ukunnāngisya ikisa Abụlahamụ nabankikolo kyake bōsa bwịla na bwịla.

⁵⁶ Malịja alinkutūgala na Elịsabetị imyesị mịtatu napo alinkugomoka ukubūka kukāja kāke.

Ukupāpịgwa kwa Johanị umōsị

⁵⁷ Akabalilo kalinkwịsa akākupāpila umwana Elịsabetị, alinkupapa umwana unndumyana.

⁵⁸ Abapalamanị bāke na bakamụ balinkupilika ukuti UNTWA ammbōmbị̄le ikisa ikikulūmba Elịsabetị, po papo bōsa balinkusekela nagwe.

⁵⁹ Pị̄sịku lya lwele balinkwịsa kukummbūta kukyenị umwana; bālōndaga ukumpa īngamụ ja gwịse, ija Sakalịja,

⁶⁰ lolị unna ākānịle ātịle: Jomma jijijo; ịkujaga jo Johanị.

⁶¹ Balinkummbụ̄la balinkuti: Akajako najumo ugwa nkikolo kyako uju ịkujobịgwa jijiji.

⁶² Po papo balinkuntịnila ugwịse ukunndālūsya īngamụ iji ālị̄ganịle ukumpa umwana.

⁶³ Sakalịja ēnda nukusūma akā kusịmbapo, āsị̄mba ạ̄ti: Īngamụ jake jo Johanị. Bōsa bāswịgịle fị̄jo.

⁶⁴ Nkabalilo kalakala unndōmo gwake gulinkwịguka ululimị lwake lulinkwabuka alinkujoba kangi, alinkuntụ̄fya Kyala.

⁶⁵ Abapalamanị bōsa lulinkubāga ulutēnde, īnongwa sịsịsị sịlinkukwila mōsa nkị̄su kya fyamba fya mụ Jụtaị.

⁶⁶ Umụ̄ndu gwesa uju āsịpilị̄ke alinkusị̄nogona alinkulālūsya alinkuti: Umwana jujuju kali ịkujaga bo bulebule? Namanga syali pabwelụ ukuti amaka ga NTWA gāli pamyake.

Ubusololị bwa Sakalịja

⁶⁷ Po papo Sakalịja, ugwịse, alinkwịsula Mbepo Mwịkemo, alinkukụ̄ngụlụka alinkuti:

⁶⁸ Atufịgwege UNTWA, Kyala gwa Ịsịlaelị! Abatūlịle abāndu bāke, abābwịle.

⁶⁹ Atwimikị̄le Umpokị ugwa maka, ugwa nkikolo kya mmbōmbị gwake Ndabitị,

⁷⁰ Ịjolo āfị̄ngịle ulufị̄ngo mbakụ̄ngụlụka bāke abị̄kemo,

⁷¹ ukuti ịsakutupoka ku balugu bītu, na kumaka ga bōsa aba batubēngịle.

⁷² Ātịle ịsakubanāngisyaga ikisa abanyēnya bītu nukukūmbuka ulufị̄ngo lwake ulwịkemo,

⁷³ ululapo ulu ālapịle kwa Tāta gwitu Abụlahamụ;

⁷⁴ āfị̄ngịle ukutupoka kubalugu bītu nukutwịtikisya ukummbōmbela kisịta kutị̄la,

⁷⁵ ko kuti twịse tujege bị̄kemo kangi bagolofụ nkyenị mmyake mbūmị bwitu bōsa.

⁷⁶ Ugwe, gwe mwanāngu kwịsakujobịgwaga ukuja gwe nkụngụlụka gwa Kyala Unkīnde, kwịsakulongolaga nkyenị mụ UNTWA kukuntendekekesya injila jake,

⁷⁷ kukubabūla abāndu bāke ukuti bịsakupokịgwaga bo baswegị̄gwe īmbị̄bị syabo.

⁷⁸ Kyala gwitu ali nikisa kangi mōlōlo. Ịsakutupelelaga ulubūnju ulwelụ, lwa bupokị ukuti lutubalilege,

⁷⁹ nukubabalila ukufụma kumwanya bōsa aba bali mụngị̄sị ja bufwe, ukugatalukisya mụnjila ja lutēngāno amalūndi gītu.

⁸⁰ Umwene umwanịke alinkwenda nukukula alinkukaka mụmbepo, alinkuja mụ mmatēngele ukwịsakufika pị̄sịku lya kwịbonesya kwake kwa Ịsịlaelị.