Juuta 1 - Biblia Umwikemo 1996

¹ Jo une Jụ̄ta ne ntumwa gwa Jesụ Kilisịtị, kangi ne gwamyabo gwa Jakobụ, nịkubasị̄mbila mwe mụbilikilị̄gwe na Kyala, kangi mwe mụli ndugano lwa Kyala Ugwịse, mwe abūbatị̄le Jesụ Kilisịtị.

² Ikisa, nulutēngāno, nulugano, fyo fịbālege mmyinụ.

Abamanyịsị ba butūngulu

³ Mwe baganịgwa bāngu, bo nịkwịjūla fị̄jo ukubasị̄mbila isya bupokị ubu bo bwitu twesa, po ndinkwaga kumbagị̄le ukubasị̄mbila isya kubasụkānịa, ukuti mụlulwilege ulwịtiko ulu bāpēlị̄gwe kamokēne ịtolo abị̄kemo.

⁴ Namanga abāndu bamo abị̄la. Kyala bị̄jị̄ngị̄sye mbutị̄tu ịtolo, aba basị̄mbilị̄gwe ukuja bā kujobịgwa ububị̄bị; abēne ilị̄pyana lya Kyala balisanwịsye ukuja lya kubōmbelamo ubulogwe, bịkunkāna Umwenefyosa uju ali jumojwene ịtolo, nu NTWA gwitu Jesụ Kilisịtị.

⁵ Lolị nịkulōnda ukubakūmbusya napapo linga mụsịmanyị̄le ngānị syosa, ukuti UNTWA ābasōsị̄sye abāndu bāke nkị̄su kya mw'Egịpịtị, lolị ulwanyụma alinkubapyụta abasịtakwịtika.

⁶ Bope nabāndumị aba bakapalīndilị̄le bunụnụ pabulagilị bwabo, lolị balinkubuleka ubujo bwabo, bo alinkubabīka mbupịnyịgwa bwa bwịlabwịla nkāti mụngị̄sị, ukwịsakufịka pị̄sịku ilịkulūmba ilya bulōngelo.

⁷ Bunobuno bope aba mụ Sotomụ na mụ Gomola, nabantwaja utu twabasyungutị̄le, ukufwana na balabala balinkubōmba isya bulogwe, balinkunyonywa ukulogwa nimịbili igīngi ịtolo; abēne bị̄pelịle ka kukētelamo, apa balinkukubilwa ndufụ̄ndo lwa mōto gwa bwịla.

⁸ Bunobuno bope bo bali na bababa, mbugogwanjosị bwabo, bịkuginyasya imịbili gyabo bābo, bịkubusyokela ubulagilị nukubatuka amahēlụ abāndumị.

⁹ Umwene lolị Mịkaelị ugwandumị unkulūmba, apa akānịkanaga nagwe Setano, apa bāgulwilaga ummbili gwa Mose, Mịkaelị akāgelịlepo napanāndi ukunndongela namahēlụ Setano, himma, lolị alinkuti: UNTWA jo akukemelege.

¹⁰ Abēne lolị abāndu bababa bịkusịtuka amahēlu nisị bakasịmanya, Lolị nkupelịgwa kwabo, basịlingenịe bo fị fịnyamāna ifịsịtamahala, syo bịkōnangikila sị̄syo.

¹¹ Hītata kuli bābo, papo abāndu abo bakōngịle ulwendo lwa Kaịnị, bị̄tāgịle ịtolo mbusobị bwa Balamụ panōngwa ja fịhōmbịgwa; bapyụtiligwe lumo nagwe Kola nkusāmbuka kwake.

¹² Abēne bịkwịpela mababye pafị̄ndu fya palusekelo lwa bumanyānị bwinụ, apa bịkulya nanụmwe kisịtalutēnde. Bịkwịtị̄ma bēne bali bo amabīngu amasịta fụla aga gịkukagịgwa nummbelo, bali bo imịpịkị ịtolo igi gilagēsye amānị imịsịta seke, igi gifwịle kabili, igi gikụ̄pwịke nimịsị.

¹³ Abāndu abo bali bo amajiga ga mụnyanja aga gasāmbwịke, aga gịkusōsya untotofụla gwa nyịsusyantu syabo. Bali bo īndōndwa isị sịsobịle īnjila jabo sịkwembēla, bo aba Kyala ābabīkị̄le īngị̄sị indị̄tu fị̄jo isịtakumalika sịku.

¹⁴ Bo aba Enokị, ugwa buhāno na bubili ukufụma pa Atamụ ākụngụlukaga ātigi: Kēta UNTWA ịsịle nifịlūndilo fya bị̄kemo bāke fị fị̄ngị ịtolo,

¹⁵ kukubalōnga bōsa, nukubatobesya bōsa abị̄la Kyala panōngwa ja mbōmbo syabo isị bābōmbịle, isya bwịla Kyala na panōngwa ja masyu gōsa amakāli aga banjobị̄le umwene abatulanōngwa abasịtakuntị̄la Kyala.

¹⁶ Abēne bo ba lwịbụnēsyo, kangi ba lwịlịlịsyo, bịkukōnga mụ mfịnyonyo fyabo; unndomo gwabo gukujoba isya lwịjụ̄mbiko. Bịkubīmikila abāndu mbūndu, ukuti bakabēge fịmo.

Isya kubasoka nukubalagila

¹⁷ Lolị umwe mwe baganịgwa bāngu, mụgakumbukege amasyu aga gājobị̄gwe ịjolo nabatumịgwa ba NTWA gwitu Jesụ Kilisịtị.

¹⁸ Apa bababūlege ukuti: Nkabalilo ka kūsụlo, bịsakujangako abā lōbelo aba bịsakufịkōngaga ifịnyonyo fyabo fya bwịla Kyala.

¹⁹ Bo aba bịkupela īndapukano, aba bịkwịnogona sị sya nkị̄su ịtolo, bakaja nagwe Mbepo.

²⁰ Lolị umwe mwe baganịgwa bāngu, mụjege mụnkwịjēnga palwịtiko lwinụ ulwịkemo. Mwịpụ̄tilege mmaka ga Mbepo Mwịkemo,

²¹ Mwịbīkege ndugano lwa Kyala, bo mụkukigụ̄lila ikisa kya NTWA gwitu Jesụ Kilisịtị, ukwakufịka kubūmị bwa bwịla.

²² Mụbapākisyege abāndu aba bịkwịlāmwa;

²³ amụbapokege bamo bo mụkubanyaka ịtolo mmōto; abāngi bo mụbapākisyege ndutēnde, lolị mụgibēngege imyenda gyabo igi ginyasị̄gwe nummbili.

Ulwịpụ̄to lwa lutụ̄fyo

²⁴ Umwene lolị uju amēnye ukubūbātila ukuti mụngagwaga, uju amēnye nukubabīka nkyenị mbukulūmba bwake mwe basịtamababye, mwe basangalufụ ịtolo,

²⁵ kwa Kyala uju ali mwene ịtolo, Umpokị gwitu, mwa Jesụ Kilisịtị UNTWA gwitu. Jo ubukulūmba, nu ubusịsya, na amaka, nubulagilị fịjeko kumyake ifị ālinafyo ukufụma bo kikāli ukujako ikị̄su nalilino, nukwakufịka nakubusịtakumalika sịku na sịku. Amenị.