Joelị 1 - Biblia Umwikemo 1996

¹ Ilịsyu lya NTWA lyalịsịle kwa Joelị, umwana unndumyana gwa Petekị:

Abāndu bịkulila īfwa ja kōnāngika kwa fị̄ndu mmịgūnda

² Amụpilike isị mwe bāndu mwe bakāngale, Amụtegege imbulukutu mwe bāndu bankị̄su! Bule sịbonị̄kemo isị mmasịku gīnụ, pamo mmasịku ga bị̄sēmwe?

³ Amụbapāngile sịsịsị abānīnụ, abānīnụ bịsebabapāngilege abānābo, abị̄sukulu bīnụ bịsebabapāngilege abāngulilo ijīngi.

⁴ Ifị amapalālila aga gịkusēnga gāsyasyaga gālyaga amapalālila amị̄ngị, ifị amapalālila amị̄ngị gasyasyaga, ālyaga kāndona, ifị kāndona asyasyaga gyalyaga imịsyonono.

⁵ Amụlēmbuke mwe bagālabwalwa mụlilege; kụ̄taga mwesa mwe banwabwalwa bwa māfị̄lu, kunōngwa ja bwalwa bwa māfị̄lu ubunyāfụ, namanga bupūnjị̄gwe kukanwa kumyinụ.

⁶ Ikikolo kisile kị̄ngị̄le nkōnānga ikị̄su kyangu, kyamaka kitịkubalịgwa ubwịngị, amị̄no gābo mị̄no galiti mị̄no ga ngalamụ, amị̄no mūgị kifwene bo agā ngalamụ īngị̄kulu.

⁷ Gōnāngịle imịpịkị gyitu gya māfị̄lu; gang'wenyịle amakāndi, amakāndi ga mịkuju gyitu, īsāmba syabo sị̄pelịle nyēlụ.

⁸ Lilaga mwe bāndu ukufwana bo unndīndwana uju ịkunndīlila unsịngilịgwa gwake bo afwịle.

⁹ ịlị̄kemo lya bufụ niịkemo lya kunwa mụndu atịkwandisya kangi ukutwalamo nnyụ̄mba ja NTWA. Abapụ̄tị ababōmbị ba NTWA bịkulila.

¹⁰ Imịgūnda gyonāngị̄ke, umfu gukaja nafyo nafịmo; namanga ifị̄ndu fyonāngị̄ke, amāfị̄lu gūmịle, imịsyunguti gikofwịke

¹¹ Mụsụlụmanịege, mwe balimamịgūnda; kụ̄taga mwe mụkugilindilila imịgūnda gya māfị̄lu, papo īnganụ nīnganụ ja luko ulūngi, nifị̄ndu fyōsa mmịgunda fyonangị̄ke.

¹² Imịpịkị gya māfị̄lu gikofwịke imịkuju gijētịle. Imịkomamanga, imịnasị, gyōsa imịpịkị gya mmịgūnda gikofwịke; ulusekelo lujōngịle mmbāndu.

¹³ Amụfwale ifịkụtụlo imyenda gyabụsụlụmanịe, mụlilege mwe bapụ̄tị, amụkụ̄tege mwe babombelị bāfịgemo fya kwịpụ̄tilapo. Amwịngile, mugonege ikilo kyōsa bo mụfwele amagụnila mwemụkummbōmbela Kyala gwāngu! Namanga ilị̄kemo lya bufụ nilyakunwa. lilino fịkajamo nnyụ̄mba ja Kyala gwinụ.

¹⁴ Sala ilịsịku lya kufịpīka ifị̄ndu, bilikila ulukomāno ulwịkemo. Babūngānịe abakulūmba na bāndu bākị̄su bōsa ukwịsa kunyụ̄mba ja NTWA Kyala gwinụ; mụkụtege kumyake.

¹⁵ Ise twende bule! Ilịsịku lya NTWA lisegelịle, lịkwịsaga bo ulupyụto ku Gwamaka gōsa.

¹⁶ Bule ifị̄ndu fịkajōnga bo tukukēta, ulusekelo nakalụ̄lu, ukufụma nnyụ̄mba ja Kyala gwitu?

¹⁷ Īmbejụ sikubolela mụmfụ, inyụ̄mba syakubikamo utūndu sịli ịtolo; ifịtūba fịpāngwịke, papo ifị̄ndu fyakubīkamo nafịmo.

¹⁸ Ifịnyamana ko kutamịgwa kukị! Imịtị̄mo gya ng'ōmbe gịkulūngānịka papo pabulyo isyene pāsobịle; gyope imịtị̄mo gya ng'ōsị gịkukubilwa.

¹⁹ Ngukụta kumyako gwe NTWA. Īngubo sya kutị̄mamo sịpị̄le ulupya indapi sya moto syokịkye imịpịkị gya mmịgūnda gyosa.

²⁰ Fyope ifịnyamāna fya nndị̄su fịkukụ̄ta kumyako, namanga utusōko twamīsi tūmịle, umōto gōkịkye īngubo sya kutị̄mamo.