Imbalilo 1 - Biblia Umwikemo 1996

Ukubaliịgwa ulwa kwanda kwa banya Ịsịlaelị

¹ UNTWA alinkujoba na Mose ndungalāngala lwa Sịnai, nkati mụhēma ja kukomānịlamo, pị̄sịku lya kwanda ilya mwesị gwa bubili, nkyinja kya bubili ulu bāfụmịle pakusōkamo nkị̄su kya Egịpịtị, alinkuti:

² Ubabalege abany'Ịsịlaelị bōsa, mbunyamụ̄ndu bwabo, ni nyụ̄mba sya bị̄sabo, ukukōngana niịsabu lya ngamụ syabo, kukuti nnyāmbala jumōjumo.

³ Ukwandila ugwa fyinja amalōngo mabili ukubūka pamwanya, abanya Ịsịlaelị bōsa aba babagị̄le ukubūka kukulwa ubwịte, ugwe na Alonị āmụkubabalaga bo bali mfịbụgụtila ukukōngana nifịkolo fȳabo.

⁴ Kangi unnyāmbala jumo kukuti kikolo ịsakujaga nanūmwe, unnyambala gwesa uju jo nkulūmba gwa nnyụ̄mba sya bāgwịse.

⁵ Īngamụ sya banyāmbala aba bịsakutulanaga nanụmwe syo isi: Ukufụma nkikolo kya Lubenị jo Elịsụlị umwana gwa Syeteulị;

⁶ ukufụma nkikolo kya Sịmyonị, jo Syelumyelị umwana gwa Sụlịsyatajị.

⁷ Ukufuma nkikolo kya Jụ̄ta, jo Nasonị umwana gwa Amịnatabu;

⁸ ukufụma nkikolo kya Isakalị, jo Netanelị umwana gwa Sụjalị;

⁹ ukufụma nkikolo kya Sabulonị, jo Elịjabu umwana gwa Helonị,

¹⁰ Ukufụma kubāna ba Josefụ nkikolo kya Efulaịmụ, jo Elịsyama umwana gwa Amịhuti, kangi ukufụma nkikolo kya Manasị, jo Gamalịelị, umwana gwa Petasụlị.

¹¹ Ukufụma nkikolo kya Benjamịnị, jo Abịtanị umwana gwa Gịtyonị.

¹² Ukufụma nkikolo kya Ndanị, jo Ahịyeselị umwana gwa Ịkịlanị.

¹³ Ukufụma nkikolo kya Aselị, jo Pagị̄elị umwana gwa Ịkịlanị.

¹⁴ Ukufụma nkikolo kya Gandi, jo Elịasafụ umwana gwa Lwelị.

¹⁵ Ukufụma nkikolo kya Nafụtalị, jo Ahịla umwana gwa Enanị.

¹⁶ (Bōsa aba bo aba bāsalịgwemo nkilūndilo kya banya Ịsịlaelị, abalōngosị ba fịkolo fya bị̄sabo, bo aba bāli balōngosị bakulūmba ba fịlūndilo fyabanya Ịsịlaelị.)

¹⁷ Mose na Alonị balinkubega abanyambala aba īngamụ syabo sịjobị̄gwe;

¹⁸ pị̄sịku lya kwanda ilya mwesị gwa bubili, balinkubungāna abāndu ikipānga kyosa, balinkusị̄mbịgwa ukukōngana mụmo bājīlị̄le mfịkolo fyābo, ni nyụ̄mba sya bị̄sabo ukukōngana ni ngamụ syābo mụmo babalilị̄gwe, ukwandila ugwa fyinja amalōngo mabili ukubūka pamwanya, umundu jumōjumo.

¹⁹ Bo mụmo UNTWA ālindagị̄le Mose, po apa ābabalịle abāndu ndungalāngala lwa Sịnai.

²⁰ Abanya Lubenị, uju āli mwana gwa kwanda gwa Ịsịlaelị (Jakobụ) ukupāpịgwa, ingulilo syābo, mbunyamụ̄ndu bwabo ni nyụ̄mba sya bị̄sabo, bo mụmo bābalilị̄gwe ukukōngana ni ngamụ syabo, umụ̄ndu jumōjumo, kukuti nnyāmbala ukwandila ugwa fyinja amalōngo mabili ukufyuka pamwanya, bōsa aba bābagị̄le ukubūka kubwịte.

²¹ Aba bābalị̄gwe nkikolo kya Lubenị bāli abāndu baelufụ amalōngo mana na ntandatu na bāmịa bahāno (46,500).

²² Abanya Sịmyonị, nkikolo kyabo, mbunyamụndu bwabo, ninyụ̄mba sya bị̄sabo, bo mụmo bābalilị̄gwe ukukōngana ningamu syabo, umụ̄ndu jumōjumo, kukuti nnyāmbala ukwandila ugwa fyinja amalōngo mabili ukubuka pamwanya, bōsa aba babagị̄le ukubūka kubwịte;

²³ aba bābalị̄gwe nkikolo kya Sịmyonị bāli abāndu baelufụ amalōngo mahāno na bahāno na bana na bāmịa batatu (59,300).

²⁴ Abanya Gandi, nkikolo kyābo, mbunyamụndu bwābo ninyụ̄mba sya bị̄sabo, ukukōngana ningamụ sya bāndu aba bābalị̄gwe, ukwandila aba bāli nifyinja amalōngo mabili ukubūka pamwanya, bōsa aba bābagị̄le ukubūka kubwite.

²⁵ Aba bābalị̄gwe nkikolo kya Gandi bali abāndu baelufụ amalōngo mana na mahāno na bāmịa ntandatu na malōngo mahāno (45,650).

²⁶ Abanya Jụ̄ta, nkikolo kyābo, mbunyamụ̄ndu bwabo, ninyụ̄mba sya bị̄sabo, ukukōngana ningamụ sya bāndu aba bābalị̄gwe, ukwandila ifyinja amalōngo mabili ukubūka pamwanya, kukuti nnyāmbala uju abagị̄le ukubūka kubwịte.

²⁷ Aba bābalị̄gwe nkikolo kya Jụ̄ta bāli abāndu baelufụ amalōngo mahāno na mabili nabana nabāmị̄a ntandatu (74,600).

²⁸ Abanya Isakalị, nkikolo kyābo, mbunyamụ̄ndu bwabo, ninyụ̄mba sya bị̄sabo, ukukōngana ni ngamụ sya bāndu aba bābalị̄gwe, ukwandila ifyinja amalōngo mabili ukubūka pamwanya, kukuti nnyāmbala uju ābagị̄le ukubūka kubwịte.

²⁹ Aba bābalị̄gwe nkikolo kya Isakalị, bāli abāndu baelufụ amalōngo mahāno nabana nabāmịa bana (54,400).

³⁰ Abanya Sabuloni, nkikolo kyābo, mbunyamụndu bwạbo, ninyūmba sya bị̄sabo, ukukōngana ningamụ sya bāndu aba bābalị̄gwe, ukwandila ifyinja amalōngo mabili ukubūka pamwanya, kukuti nnyāmbala uju ābagị̄le ukubūka kubwịte.

³¹ Aba bābalị̄gwe nkikolo kya Sabulonị, bāli abāndu baelufụ amalōngo mahāno nabahāno nababili nabāmịa bana (57,400).

³² Abanya Josefụ aba bābilikilịgwaga ukuti banya Efulaịmụ, ingulilo nkikolo kyābo, mbunyamụ̄ndu bwābo, ninyụ̄mba sya bị̄sabo, ukukōngana ni ngamụ sya bāndu aba bābalị̄gwe, ukwandila ifyinja amalōngo mabili ukubūka pamwanya, kukuti nnyāmbala uju ābagị̄le ukubūka kubwịte.

³³ Aba bābalị̄gwe nkikolo kya Efulaịmụ bāli abāndu baelufụ amalōngo mana nabāmịa bahāno (40,500).

³⁴ Abanya Manasị, nkikolo kyābo, mbunyamụndu bwābo, ninyụ̄mba sya bị̄sabo, ukukōngana ni ngamụ sya bāndu aba bābalị̄gwe, ukwandila ifyinja amalōngo mabili ukubūka pamwanya, kukuti nnyāmbala uju ābagị̄le ukubūka kubwịte.

³⁵ Aba bābalị̄gwe nkikolo kya Manasị bāli abāndu baelufụ amalōngo matatu na babili na bāmịa babili (32,200).

³⁶ Abanya Benjamịnị, nkikolo kyābo, mbunyamụ̄ndu bwābo, ninyụ̄mba sya bāndu aba bābalị̄gwe, ukwandila ifyinja amalōngo mabili ukubūka pamwanya, kukuti mụ̄ndu uju ābagị̄le ukubūka kubwịte.

³⁷ Aba bābalị̄gwe nkikolo kya Benjamịnị bāli abāndu baelufụ amalōngo matatu na bahāno nabāmịa bana (35,400).

³⁸ Abanya Ndanị nkikolo kyābo, mbunyamụ̄ndu bwābo, ninỵūmba sya bị̄sabo, ukukōngana ningamụ sya bāndu aba bābalị̄gwe ukwandila ifyinja amalōngo mabili ukubūka pamwanya, kukuti mụ̄ndu uju ābagị̄le ukubūka kubwịte.

³⁹ Aba bābalị̄gwe nkikolo kya Ndanị, bāli abāndu baelufụ amalōngo ntandatu na babili na bāmịa bahāno na babili (62,700).

⁴⁰ Abanya Aselị, nkikolo kyābo, mbunyamụndu bwabo, ninyumba sya bị̄sabo ukukōngana ningamụ sya bāndu aba bābalị̄gwe, ukwandila ifyinja amalōngo mabili ukubūka pamwanya, kukuti nnyāmbala uju ābagị̄le ukubūka kubwịte.

⁴¹ Aba bābalị̄gwe nkikolo kya Aselị bāli abāndu baelufụ amalōngo mana najumo na bāmịa bahāno (41,500).

⁴² Abanya Nafụtalị, nkikolo kyābo, mbunyamụ̄ndu bwābo, ninyụ̄mba sya bị̄sabo ukukōngana ningamụ sya bāndu aba bābalị̄gwe, ukwandila ifyinja amalōngo mabili ukubūka pamwanya, aba bābagị̄le ukubūka kubwị̄te.

⁴³ Aba bābalị̄gwe nkikolo kya Nafụtalị bāli abāndu baelufụ amalōngo mahāno nabatatu na bāmịa bana (53,400).

⁴⁴ Aba bo bandu bala bābalị̄gwe na Mose na Alonị, bo bịkubabala bātūlị̄gwe na balōngosị ba banya Ịsịlaelị aba bāli kalōngo nababili kukuti nndōngosị jumo āfụmịle nnyụ̄mba sya bị̄sabo.

⁴⁵ Bōsa abany'Ịsịlaelị aba bābalị̄gwe ukukōngana ninyụ̄mba sya bị̄sabo, ukwandila ifyinja amalōngo mabili ukubūka pamwanya, kukuti nnyāmbala uju abagị̄le ukubūka kubwịte mwa Ịsịlaelị;

⁴⁶ bāli abāndu baelufụ bāmiạ ntandatu nabatatu nabamia bahāno namalōngo mahāno (603,550).

⁴⁷ Lolị abanya Lebị bo bakābalị̄gwe pakikolo kyābo, kokuno bakajamo mwịsabu ilyo.

⁴⁸ Namanga UNTWA ālindagị̄le Mose ātịle:

⁴⁹ Ikikolo kya banya Lebị kyene kyo ungisakukibalaga ukukyongānia niịsabu lya banya Ịsịlaelị.

⁵⁰ Lolị abanya Lebị gwịse ubabīkege ukuja balongosi ba mụhēma ja bujo bwangu, nifyombo fyake fyosa, kangi nutūndu twake tosa, abene jisakujaga mbōmbo jabo ukujipīmba nifyombo fyake fyosa, bịsakujilindililaga, abēne bịsakujēngaga amatēmbe gabo ukujisyungutilila īhēma.

⁵¹ Bo īhēma jịkusāma ukubūka nkyenị, abanya Lebị bo aba bịsakujipīmbaga, kangi bo jili pakujēngịgwa abanya Lebị bo aba bịsakujijēnganga. Umụ̄ndu uju linga ịsakusegelelaga kifụkị nīhēma ịsakugogịgwaga.

⁵² Abany'Ịsịlaelị bịsakujēngaga īhēma syabo aba pakilūndilo kyābo aba pakilūndilo kyābo kukuti mụ̄ndu pīkāmbi lyake kangi kukuti mụ̄ndu pa ndēmbēla jake.

⁵³ Loli abanya Lebị bo bịsakujēngaga īhēma syabo ukujisyungutila īhēma ja Lufị̄ngo, bīsakujilindililaga ukuti umụ̄ndu najumo ukufụma nkilūndilo kya banya Ịsịlaelị angịsakusegelelaga kuhēma kokuti ingalalisị sya Kyala sịngịsakubịsilaga.

⁵⁴ Bo bābōmbịle bunobuno abany'Ịsịlaelị; bābōmbịle ukukōnga syōsa isị UNTWA ālinndagị̄le Mose.