BaEfesi 1 - Biblia Umwikemo 1996

¹ Une Paulị, ne ntumịgwa gwa Kilisịtị Jesụ, mbwịgane bwa Kyala, ngubasị̄mbila mwe bāndu ba Kyala mwe mụli mụ Efesị, mwe mụmmwịtị̄ke Kilisịtị Jesụ.

² Ilị̄pyana lijege nanụmwe, nulutēngāno ulu lụkufụma kwa Kyala Tāta na ku NTWA Jesụ Kilisịtị.

Īsajo sya mbepo mwa Kilisịtị

³ Atufịgwege Kyala Ugwịse gwa NTWA gwitu Jesụ Kilisịtị, Namanga nkwịkungisanịa na Kilisịtị atusajịle īsajo syosa isya Mbepo isya kumwanya.

⁴ Bo kikāli ikị̄su ukupelịgwa, Kyala ātusūngulị̄le ngānị ukuti tujege bāke mwa Kilisịtị, tujege bị̄kemo, kangi twe basịtakilema nakimo.

⁵ Panōngwa ja lugano lwake, atusūngulị̄le ngānị ukuti twịpelege bānāke mwa Jesụ Kilisịtị, bo sị̄syo syalinkyelị̄le umwene pabwịgane bwake.

⁶ Oko atuntụ̄fyege Kyala panōngwa ja bụkulūmba bwa ịpyana lyake ili ātōnelị̄le Mmwanake unkūndwe.

⁷ Mụ mmyake mo tuli nububāngị ubwa mwịlopa lyake Jesụ Kilisịtị, ko kuti ubuswe bwa ngịlanịo syitu, ukufwana nubwịngị bwa ịpyana lyake,

⁸ ili likindilị̄le ukutulefụkila, mmahala gōsa na nkusyaganịa syosa,

⁹ Kyala alinkubōmba isị ālinogonị̄le ngānị, alinkutubūla isya mbutị̄tu isya bwịgane bwake nubwịkyele bwake, ubu ābạ̄tikị̄le ngānị mwa Kilisịtị.

¹⁰ Ko kuti isị ātendekị̄sye ngānị ukuti ịse asịbōmbēge bo akabalilo kafịkịle, aka kufịbūngānịa fyosa mwa Kilisịtị, ifya kumwanya nifya pāsi.

¹¹ Utūndu tōsa tụkubōmbịgwa ukufwana nulubạ̄tiko kangi nulutụmụlilo lwa Kyala; umwene Kyala ātusūngwịle uswe ịjolo ukuti tujege bāndu bāke mmbwịgane bwake nkuja na Kilisịtị, ukukōnga isị ālinogwịne ngānị liịjolo.

¹² Po uswe twe twatalịle ukulubīka ulusūbilo lwitu mwa Kilisịtị, sịtubagị̄le ukubutụ̄fya ubukulūmba bwa Kyala.

¹³ Mụli uju nanụmwe mụlinkwịpela bāndu ba Kyala bo mụlipilị̄ke ilịsyu lya nalolị, īndumị inụnụ iji jabatwalị̄le umwe ubupokị. Mụlinkummwịtika Kilisịtị; umwene Kyala ukunangisya ukuti nanụmwe mụli bāke, mụlinkukolekelịgwa na Mbepo Mwịkemo uju āfị̄ngịle.

¹⁴ Mbepo jujuju jo kipingikilwa kya kunāngisya ukuti twịsakwambililaga fyosa ifị Kyala āfị̄ngịle kubāndu bāke, kangi ịkunāngisya ukuti Kyala ịsakubabānga lōsa abāndu bāke. Tubutụfyege ubusịsya bwake.

Ulwịpụ̄to lwa Paulị

¹⁵ Ko kuno nanịne, bo mbilị̄ke ulwịtiko lwinụ ku NTWA Jesụ, nulugano lwinụ kubāndu ba Kyala,

¹⁶ ngalekamo sịku ukubagwila ulupị kwa Kyala. Ngubakūmbuka mụnyịpụ̄to syangu,

¹⁷ ukuti Kyala gwa NTWA gwitu Jesụ Kilisịtị, Tāta unsịsya, jo abapege Mbepo ugwa mahala nubusetulị bwa kummanya jūjo.

¹⁸ Ngusūma ukuti agakị̄ngulege amāso ga mụndụmbụla syinụ ukuti sịlubonege ulumụlị lwake, ko kuti mụlumanyege ulusūbilo lwa lubilikilo lwake mụno lujīlị̄le na mụno bujīlị̄le ubwịngị bwa busịsya bwa kilīngo kyake iki āfị̄ngịle kubāndu bāke;

¹⁹ na mụno bujīlị̄le ubukulūmba bwake ubukīndilisị ubwa maka gāke, mụli uswe twe twịtị̄ke. Amaka amakulūmba aga gịkubōmba nkāti mmyitu, gafwene na maka amakulūmba amakīndilisị,

²⁰ aga ābōmbị̄le mwa Kilisịtị apa ansyusyaga mbafwe, alinkwenda nukutūgasya kukiboko kyake ikị̄līlo kumwanya.

²¹ Uko ko kuno Kilisịtị ịkulagila, ali pamwanya fị̄jo ukukīnda pabutwa, pabulagilị, pamaka na mbusịsya bōsa; nndagilị gwa ngamụ syosa isị sịkujobịgwa momma mwene nkị̄su iki, lolị na nkị̄su iki kịsakwịsaga.

²² Fyosa ịtolo Kyala afịbīkịle pāsi, pamalūndi gāke, kangi ammwimị̄ke ukuja ntu gwa tūndu tōsa utwa kipānga.

²³ Ikipānga go mmbili gwa Kilisịtị, ubu bo bukwile bwa uju ịkukwila mōsamōsa ịtolo ntūndu tōsa.