2 Timoti 1 - Biblia Umwikemo 1996

¹ Jo une Paulị ne ntumịgwa gwa Kilisịtị Jesụ, mbwịgane bwa Kyala ne āndumịle ukuti mbufụmụsyege ubūmị ubu bwafịngilị̄gwe mwa Kilisịtị Jesụ,

² nịkukusị̄mbila gwe mwanāngu gwe nnganịgwa Tịmotị nịkuti: Ilị̄pyana, ikisa, nulutēngāno, ifị fịkufụma kwa Kyala Tāta, na kwa Kilisịtị Jesụ UNTWA gwitu, fyo fịjege nanụngwe.

Ukugwa ulupị namasyu ga kukasya

³ Nịkugwa ulupị kwa Kyala, uju nịkummbōmbela ninyịbonelo īnyēlụ bo mụmo bābōmbelaga abīsukulu bāngu. Nịkugwa ulupị kumyake akabalilo kōsa aka nịkukukumbuka mụnyịpụ̄to syangu pamụ̄si na pakilo.

⁴ Bo ngugakumbuka amāsosị gāko, ngusyukwa fị̄jo ukwaganịla nanụngwe, ukuti nị̄sulege ulusekelo.

⁵ Ngulukūmbūka ulwịtiko lwako ulwa nalolị, ulwịtiko ulu āli nalo umwịsukulugo Loịsi, nunyoko Jụnịke. Nanịne sịngolịle ukuti nanụngwe uli nalo.

⁶ Po apa nịkukukumbusya ukuti ukikubililege ikikūngilwa kya Kyala, iki gwalyambilị̄le bo ngubīkịlepo amaboko gangu, ukuti kyakege.

⁷ Namanga umwene Kyala akātupēle Mbepo gwa bōga, himma, lolị ātupēle Mbepo gwa maka, ugwa lugano nugwa lwịtụ̄fyo.

⁸ Po papo lelo ungafwaga īsonị ukunsịsịmikisya UNTWA gwitu, nalinga ko kūsịsịmikisya une ne mpịnyịgwa gwake. Lolị ukubilwege pamopēne nanịne panōngwa ja Ịbāngilị, ukufwana namaka ga Kyala aga kwambilila.

⁹ Jo uju ātupokịle, nulubilikilo ulwịkemo, akātubilikị̄le ukufwana nimbōmbo syitu, himma, lolị bo mụmo ālinogonị̄le nganị jūjo, kangi niịpyana lyake, ili ātupēlị̄le mwa Kilisịtị Jesụ ukufụma mụ mbukūlu.

¹⁰ Lolị lilino lịbonekị̄le nkwịsa kwake Umpokị gwitu Kilisịtị Jesụ, uju ābujōsị̄sye ịtolo ubufwe, ābubīkịle pabwelụ ubūmị nubusịtakubolamo mụnjila ja Ịbāngilị.

¹¹ Kyala āsūngwịle une ukuja ntumịgwa, nukuja mmanyịsị gwa kulūmbilila īndumị īnụnụ.

¹² Pali sịsịsị po apa nịkukubilwa, lolị ndịkufwa īsonị, namanga Mmēnye uju nummwịtị̄ke, kangi sịngolịle ukuti ịsakukūbātilaga aka mbēlị̄gwe ukufịka pị̄sịku lila.

¹³ Amasyu amūmị aga ugapilị̄ke kumyangu, gajege ga kukētelamo ugwe, ndwịtiko na ndugano, ifị fịli mwa Kilisịtị Jesụ.

¹⁴ Akanụnụ aka upēlị̄gwe, ko ukūbātilege mwa Mbepo Mwịkemo, uju ali nkāti mmyitu.

¹⁵ Umēnye ukuti abāndu ba mwa Asịja bāndekịle, mụli bababa alịmo Fịgelị na Helemogenị.

¹⁶ Umwene lolị UNTWA abapākisyege abannyụ̄mba ja Onesịfolị, papo umwene kabili kabili ājisangalusyaga īndụmbụla jangu, kōpe nukupịnyịgwa kwangu kulinkusīta nukumpelela īsonị,

¹⁷ bo ịsịle mụ Loma, nakalīnga ịtolo alinkundōnda, alinkunyāga.

¹⁸ UNTWA ammwimilege ukuti ịse alwagege ulupākisyo ulufụma ku NTWA pị̄sịku lila. Ugwe usịmēnye fị̄jo syosa isị ālīmbōmbị̄le mw'Efesị.