RUTH 1 - Navajo Bible

Ruth áádóó Neiyómii

¹ Ákódzaago ándahodii'aahii bídahólníihgo yoołkááł yę́ędą́ą́' Ízrel dine'é bikéyahgi hodííchįįd. Áko Béthlehem kin shijaa'gi Júdah kéyahdóó diné léi' dah diiyáago t'óó átsééd ch'aajookahgo Mó'ab kéyahgóó jíkai.

² Diné éí Elímelek wolyé áádóó be'asdzą́ą́ éí Neiyómii wolyé índa biye'ké éí ła' Málan áádóó ła' Kíliyan wolyé, Éfata dine'é dajílį́įgo Béthlehem kin shijaa'gi Júdah kéyah biyi' kéédahojit'į́į́ nít'éé'. Áko Mó'ab kéyahdi jíkaigo ákwii kéédahojit'į́į́ nít'éé'.

³ Nidi Neiyómii bahastiin Elímelek daaztsą́, áko hayáázh nidilt'éhígíí bił ch'íjookai.

⁴ Díí ashiiké éí Mó'ab dine'é asdzání yá ázyeh, ła' Órpah wolyé, ła'ígíí éí Ruth wolyé. Ákwii bił kéédahojit'į́įgo neeznáá daats'í nááhai.

⁵ Nít'éé' Málan áádóó Kíliyan t'áá áłah neezná, áko éí asdzání biyáázhké bąąh nást'įįd áádóó bahastiin ałdó' bąąh nást'įįd.

⁶ Áko nízhdii'na'go hazháá'áád nít'é'ígíí bił Mó'ab kéyahdóó nihééjíkai, háálá Mó'ab kéyahgi díí baa hozdiizts'ą́ą́': haash yit'éego Bóhólníihii bidine'é yik'iinít'į́į'go ch'iyáán yeidiní'ą́.

⁷ Ákohgo nijigháhídóó dah nízhdiidzá; hazháá'áád nidilt'éhígíí t'áá bił Júdah kéyahgóó dah nízhdiikai.

⁸ Nidi Neiyómii hazháá'áád nidilt'éhígíí ábijiní, Nílááh, nihimá bighangóó nídóht'aash. Shí áádóó ádajídinígíí nihaa jiinohba' yę́ęgi át'éego Bóhólníihii nihił hólǫ́ǫgo nihaa jooba' doo.

⁹ Bóhólníihii lá nihahastiin ła' bił náádanihighango háádaałyį́įhgo ánéidoodlííł. Ákohgo t'óó bizazhnoot'ą́ áádóó yéego anáádazhniicha.

¹⁰ Áko áhodííniid, T'áá aaníí nidine'é bich'į' nił néiikah doo.

¹¹ Nidi Neiyómii ání, T'óó t'ą́ą́' nídóht'aash, shich'é'éké, ha'át'íísh biniyé shił nááhkah doo? Da' anáádí'néestsąąłgoósh náá'deeshchíiłgo shiyáázhké nááhódlǫ́ǫgo éí nihahastiin náádoodleeł?

¹² Shich'é'éké, nihílááh, t'óó nídóht'aash, háálá shíyee' doo shahastiin nááhódle' át'éégóó hasistih. Bíká shił chohoo'į́ dííniidgo, díí tł'ée'da shahastiin nááhodoodleełgo áádóó shiyáázhké nááhodoodleełgo

¹³ nininísą́ąjį'ísh biba' ánóht'ée doo? Índa nihá náá'doohgehgiísh biniyé ádaa áhółyą́ą doo? Dooda, shich'é'éké; jó, t'áá íiyisí nihąąh shíni'go Bóhólníihii bigaan yee shich'į' nahodíłgééz.

¹⁴ Áko t'áá íiyisí ánáádazh'niichago atínáádazdineesdlį́į́', áko Órpah yizháá'áád nilíinii yizts'ǫs, nidi Ruth éí hazánáznii'.

¹⁵ Áko ázhdííniid, Shoo, bił ííyéehii Órpah bidine'é áádóó bidiyin yich'į' anáádzá, nílááh, bił ííyéehii bikéé' nídídááh.

¹⁶ Nidi Ruth áhodííniid, Nits'ą́ą́' dah nídideeshdáłígíí t'áadoo baa náshiinikąąhí; jó, t'áá hidínááhgóó nił honishłǫ́ǫ doo, kééhót'į́įgi nił kééhasht'į́į doo, nidine'é éí shidine'é doo, áádóó niDiyin God éí shiDiyin God doo;

¹⁷ dadíítsaałgi shí ałdó' ákwii dadeestsaał áádóó ákwii łeeh shidi'dooltééł. Bíni'dii Bóhólníihii ákóshílééhdóó t'ah yówehgo, ts'ídá lá anoonééł t'éí ałts'ánihidoonił ni.

¹⁸ Ákohgo índa Neiyómii éí Ruth ts'ídá hoł nihideesh'ashí nízingo yee hasht'e'nitsíníkéezii bik'izhdiitą́, áko t'áadoo ákónáázhdoo'niid da.

¹⁹ Áko t'áá ájíłah dashdii'áazhgo Béthlehem kin shijaa'di níjít'áázh. Áko Béthlehemgi jiní'áazhgo t'áá át'é kintahgóó t'óó hak'ee bił adahóóyóí, áko ádaaní, Da' díísh Neiyómii át'į́?

²⁰ Áko ábijiníí lá, T'áadoo Neiyómii dashidohníní; Mára dashidohní, háálá Aláahgo Ayóó'ábóodziilii t'áá íiyisí bik'e'eshch'í'ígi áshííł'įįd.

²¹ Kodóó yóó'adineesh'ná, t'áá ákohígo Bóhólníihii shił nát'áázh. Ha'át'éegoshą' Neiyómii dashidohní, háálá Bóhólníihii atíshííł'įįd áádóó Aláahgo Ayóó'ábóodziilii ch'énátsoh béé'oo'níihii yiih shííłt'e'.

²² Ákohgo Neiyómii nídzídzá; Ruth éí Mó'ab dine'é nilį́įgo hazháá'áád Mó'ab kéyahdę́ę́' bił níjít'áázh. Áko Béthlehemgi ts'ídá tł'oh naadą́ą́' bidee'í bida'niigizh lágo níjít'áázh.