PROVERBS 18 - Navajo Bible

¹ Laanaa nízinii t'áá shí t'éí nízingo t'áá sahdii na'ádiiltéii hódzą́ t'áá át'é yaa nahaadá áádóó yidiilkaalgo yóbáah łeh.

² Diné doo áhályáanii ak'idi'yiitįįh doo yíneedlį́į da, nidi t'áá bí yee nitsíkeesii ííshjání áyósin.

³ Diné doo yá'áshóonii yigháahgo doo ił ni'íldįįh ałdó' yił yighááh, áádóó doo ił ídlį́ haleehgo ánahat'i' ałdó' haleeh.

⁴ Diné yáłti'go bizaad tó ditáanii nahalin, áádóó hazéé'dę́ę́' hódzą́ háálínígíí éí tó nílínígíí nahalin.

⁵ Diné doo yá'áshóonii bich'ijí jílínígíí doo yá'át'éeh da, índa diné t'áá ákogi át'éii doo ákǫ́ǫ́ ájooł'įįłgóó doo yá'át'éeh da.

⁶ Doo áhályáanii yáłti'go t'áá áko inídiiltłáad łeh, áádóó éí ák'ijį' hodoolchįįł biniyé niyáłti' łeh.

⁷ Doo áhályáanii ánínígíí t'áá éí atínábidoodlííł, áádóó bizaad yee azanídoodááł.

⁸ Aseezį́ nidzinii bizaad ayóo łikan, áádóó ayi' góyaa ahwiileeh.

⁹ Diné naanish yídiiłgisgo naalnishii éí ałdó' ni'iiłchxǫǫhii yik'is nilį́.

¹⁰ Bóhólníihii bízhi' éí kin niłdzilgo yaa'áii nahalin, t'áá ákogi ádaaníiłii éí yine' adahinichéehgo nidahadzííh.

¹¹ Diné at'íinii yit'íinii éí kin bidziilgo haal'áhígíí nahalin, áádóó kin haal'áii ditą́ągo binaa wódahdi ahéé'ítł'in nízingo yaa nitsíkees.

¹² Diné ádaa ha'niihgo éí atíbidi'doolníiłgo át'į́į łeh, áádóó a'ohgo ádaa nitsídzíkeesii éí ił ídlį́ bitsé siláii át'é.

¹³ Diné ha'át'íhída t'áadoo hazhó'ó yidiits'į́hí, Kót'éego lá át'ée ni, níinii éí doo áháyą' át'é índa t'óó haa yáhásingo áhodoolííł.

¹⁴ Diné bąąh dahaz'ą́ągo ha'ólnínígíí yee ádíká anídoolwoł, nidi bąąh nááháka'go háísh yee ha'íídóolniił?

¹⁵ Hóyáanii bijéí yee ił ééhózin nishóyoołt'eeh, áádóó hóyáanii ił ééhózin hát'į́įgo yíká na'íiłts'ą'.

¹⁶ Diné a'níláago binahjį' bá hoo'aah, áádóó diné aghádahideezíinii yaa bilóós.

¹⁷ Átsé ádaa nahasne'ígíí t'áá aaníí nahalin łeh, nidi bił kééhojit'íinii ákwii yigháahgo ts'ídá ájít'éegi haa nahalnih.

¹⁸ Diné ła' ahinídiiltłi'go bá yáá'iilt'eehgo yee hidiiłheeł, áádóó dahayóii doo ahináádadiijahgóó áyoolííł.

¹⁹ Hak'is bíni' jiił'a'ii bíni' nízhdooshǫǫłígíí éí bidziilgo kin haal'áago jidoołnéłígíí biláahgo nantł'ah áádóó hak'is bił ahinízhdiiltłahígíí éí naat'áanii bikin bich'ą́ą́h dá'deelkaal nahalin.

²⁰ Diné yee yáłti'ígíí yee hwiih nilį́į doo, áádóó lą'í yee hahadziihii yee hwiih nilį́į doo.

²¹ Aniné áádóó iiná baa yájíłti'ii bohoolnííł, áádóó éí ájínínígíí ayóó'ádayó'níinii aneest'ą' nahalingo deildeeł doo.

²² Hwe'asdzą́ą́ dooleełii bik'ízhníyáii yá'át'éehii shójoost'e', áádóó Bóhólníihii bits'ą́ą́dóó bee ach'oha'níinii nishójiyoołt'eeh doo.

²³ Diné badahojoobá'íii ná'ookąąh t'éí chodayooł'į́, nidi diné da'at'íinii t'áá na'níle'dii hadahadziih.

²⁴ Diné éí hak'isóó t'óó ahayóigo t'áá éí ła' náháłchǫǫh, nidi bił hajíí'áázh biláahgo náánáła' áhánígo k'é hó'níinii hólǫ́.