PROVERBS 1 - Navajo Bible

Saad bee hódzą́ ílį́

¹ David biye' Sálaman éí Ízrel binanit'a'í bizaad bee hodoodząąłii.

² Áko hódzą́ áádóó na'nitin bił béédahodoozįįł áádóó saad bik'idi'dootį́įłii yaa ákodadínóozįįł.

³ Dahozhdooyąąłii áádóó t'áá ákogi ádajit'į́į doogo áádóó doo haada yit'éii índa aheełt'éego dajiináa doo biniyé bínahodi'neestą́ą'ii nídazhdidoolééł.

⁴ Doo dahóyáanii dahóyą́ągo ádabidoolííł, áádóó ániid nidaakaii bił éédahodoozįįł índa yá'át'éehii nideidiyii'aahgo ádabidoolííł.

⁵ Diné hóyáanii íists'ą́ą' doo, áádóó náásgóó óhooł'aah doo; diné bił ééhózinii hódzą́ągo yáti' t'éí hát'į́į doo,

⁶ áko saad bee hodoodząąłii, áádóó ááhyiłníinii yik'idi'yiitįįh doo; diné dahóyáanii bizaad índa saad doo bééhózingóó yee hadahadziihii bik'izhdi'yiitįįh doo.

⁷ Bóhólníihii jidósin jileehdóó hoł ni'ééhwiizįįhgo hahalzhish, nidi diné doo ádahalyáanii hódzą́ índa na'nitin ąąh dayiiłkóóh.

Dinééh bá kót'é ha'níinii

⁸ Shiye', nizhé'é bina'nitin yísíníłts'ą́ą́' áádóó nimá yee naninitinii yóó'adóó'ááł lágo.

⁹ Éí bee ajooba' nitsiinázt'i' doo áádóó yoo' nizhóníii hayo' áhojiilaa nahonílin doo.

¹⁰ Shiye', bąąhági ádaaníiłii, Hágo nahgóó diikah, daniłníigo bikéé' dah doóya' lágo.

¹¹ Hágo nahgóó diikah, daaníigo, níláahdi diné dadiyiilyéełgo dił bits'ánílį́įgo ádadiilníiłii biba' naháatą́ą doo. Diné t'áadoo át'éhígóó naagháii t'áadoo biniinaaní da nidi baa nihidiikah:

¹² jishcháa'gi át'éego t'áá dahináago adahidiilnah; łeehwii'nííł góyaa ahi'níłígíí nahalingo t'áá naazį́į́ nít'éé' adahidiilnah:

¹³ binaalye'é da'ílíinii shódeidiilt'eeł áádóó naalye'é ałtso dadiilnéełgo nihighan góne' hadadidiilbį́į́ł:

¹⁴ nihidiináahgo t'áá áníiltso nihidah na'ayizii t'ááłá'í ádadiilnííł.

¹⁵ Shiye' nílíinii, ákódaaníinii dadeeskaigóó bikéé' dah doóya' lágo; t'ááká bikék'edóoya' lágo.

¹⁶ Háálá doo yá'át'éehii t'éiyá yíkadadilts'i' áádóó haneetehee diné nideiłtseedgo bidił bits'ádaazlį́įgo ádeile'.

¹⁷ Tsídii binááł łoh bá niit'áahgo doo áajį' digháah da łeh.

¹⁸ T'áá bí nidabidi'dootsiłgo bidił bits'ádaazlį́į doo yiniyé naháaztą́, t'áá bí nidabidi'dootsił yiniyé aa nidahaakai.

¹⁹ T'áá ádzíłtso t'áá áchą́hwíídéeni'go naalye'é aghadajii'níiłii éí t'áá hó hwe'iina' haa néididoodlééł.

Hódzą́ ná'ookąąh

²⁰ Hódzą́ tł'óo'di nihidilgháásh; kintah da'nítiingóó biinéé' diits'a'.

²¹ Áłah da'ílį́į́góó nidilghaash, yah ada'iiztiingóó índa diné t'áá ałtso bitahgóó biinéé' diits'a'go

²² kóní, Doo dahonohsáanii haa nízáágóoshą' doo nihidahódzą' ayóó'ádeínóh'níi doo? Haa nízáágóoshą' diné yąąh nidayiiłhaałii ąąh nidayiiłhaałgo bąą bił nidahoozhǫǫh doo? Haa nízáágóoshą' diné doo ádahalyáanii ił ééhózin deijoołxáa doo?

²³ Hódzą́ ání, Biniinaa nihich'ahoshishkéii bits'ą́ąjį' naanáhkááh. Shoo, shiníłch'i nihaa dideesh'ááł; shizaad béédahodoosįįłii nihich'į' bééhózínígo ádadeeshłííł.

²⁴ Hágo nihidííniid nít'éé'; dooda danoozį́į́'; éí bąą nihich'į' dah didiishnii' nít'éé'; doo ła' shaa ná'áhodéélt'į́'í da.

²⁵ Bee nanihinishtinii t'áadoo nánídlínígóó baa nitsídasookééz, áádóó nihich'ahoshishkéhígíí doo danoozį́į' da.

²⁶ Éí bąą shí ałdó' bááhádzidgo áhooníiłii bee nihił hodeeshzhiizhgo nihaa anáshdloh doo. Nídasoołdzíidgo nihá nahasht'i' doo.

²⁷ T'óó báhádzidígi át'éego nídasoołdzíidgo áádóó bee atínihi'dilnéehii nááts'ó'oołdísii nahalingo nihich'į' yiyołgo índa ach'į' nahwii'ná áádóó yínííł nihik'iildogo nihaa anáshdlohgo nihá nahasht'i'go,

²⁸ áadi índa shich'į' sodadilzin doo, nidi doo bich'į' hadeesdzih da. T'áá niná'deet'įįdjį' shíkadadínóotaał, nidi doo shik'ídadookah da.

²⁹ Háálá ił ééhózin dajijoołáá nít'éé' áádóó Bóhólníihii dólzin t'áadoo nidazdeez'ą́ą da.

³⁰ Shina'nitin t'ááłá'í nidi t'áadoo ła' dazniizį́į' da; hoshishkéhígíí nidi t'óó bá dazdoos'nih.

³¹ Éí bąą t'áá hó ádajíít'įįdii bineest'ą' nídazhdoodį́į́ł áádóó t'áá hó bindahodzizgizii bee hwiih dadzizlį́į'go ti'nídahodiyoołnih.

³² Háálá doo dahóyáanii atiin yits'ádahaaskaii t'áá éí ninádabidoołtsił; doo áhályání dine'é bił áda'íízįįdgo t'áá éí nábidoogą́ą́ł.

³³ Nidi t'áá háiida shíists'ą́ą'ii doo bich'į' nahwii'náágóó kééhat'į́į doo, áádóó báádahadzidii doo bik'ee bił yéé'góó hasht'edít'éego kééhat'į́į doo.