PHILEMON 1 - Navajo Bible

K'é ha'níinii

¹ Paul, Christ Jesus baa hashne'go biniinaa awáalyaaí nishłíinii, áádóó Timothy nihik'is nilíinii, Failííman ayóó'ííníi'níigo bił nideiilnishígíí,

² áádóó Áfiya nihilah [ayóó'ádeíníi'nínígíí], áádóó Arkípas bił siláo daniidlínígíí áádóó nighangi da'oodlání áłah nádleehígíí bich'į' naaltsoos íilnééh:

³ Diyin God nihiTaa' áádóó Bóhólníihii Jesus Christ bibee ajooba' áádóó bibee ach'į' hózhǫ́ náhásdlį́į'ii yee nihik'ijidlíi le'.

Failííman be'ayóó'ó'ó'ni' índa bi'oodlą'

⁴ T'áá áłahjį' shisodizin bee nénáshniihgo shiDiyin God bich'į' ahééh nisin.

⁵ Háálá Bóhólníihii Jesus índa Diyin God bidiyį́į́' danilíinii t'áá ałtso ayóó'ííní'níigo áádóó baa dzíínílíigo naa hodiists'a'.

⁶ Áko Christ bits'ą́ą́dóó yá'ádaat'éehii t'áá yíní át'éegi bee ak'i'diitįįh binahjį' ne'oodlą' idééłníi doo biniyé sodiszin.

⁷ Shik'is nílíinii, ayóó'í'ííní'nínígíí t'áá íiyisí baa nihił hóózhǫǫd, áádóó bee ha'iisisni', háálá Diyin God bidiyį́į́' ninahjį' bijéí bik'éédahóótaad.

Paul éí Onésimas yá ná'ookąąh

⁸ Ákót'é bąą Christ biniit'aa t'áá íiyisí doo sisti'góó kódíínííł nidideeshniił daats'í,

⁹ nidi shí Paul, hastóí nishłį́įgo áádóó k'ad Jesus Christ baa hashne'go biniinaa awáalyaaí nishłį́įgo ayóó'ánósh'níigo nánooshkąąhjígo shił yá'át'ééh.

¹⁰ Onésimas, Christ bee shiye' nilíinii, bá nánooshkąąh, éí awáalyaadi sédáago oodlání k'ehgo bizhé'é sélį́į́'.

¹¹ Éí t'ah nahą́ądę́ę́' doo ná choo'į́į da nít'éé', nidi k'ad éí ná choo'į́, shí ałdó' shá choo'į́.

¹² Nidi k'ad nich'į' nihééhoníł'a', t'áá shí shiye' nídíł'a' nahalingo akǫ́ǫ́ náhodíł'a'.

¹³ Hane' yá'át'éehii baa hashne'go biniinaa awáalyaaí nishłį́įgo shá nanil'a' yę́ęgi shá naal'a' doo nisin nít'éé'.

¹⁴ Nidi íinínízinii t'áá bídin doo ha'át'íhída baa niséyáa da, áko doo t'áá k'ad bíninishchéehgo shaa jiidííbaał da, nidi t'áá ni íinínízinii bik'ehgo ádii'nííł.

¹⁵ Hool'áágóó shónáhwiidííłt'eeł daats'í biniyé haa danízahjį' nits'áho'deelt'e' sha'shin,

¹⁶ áádóó índa doo naalte' jílį́į́góó, nidi naalte' jílį́į́ nít'ée'ii biláahdi át'éego nik'is ayóó'ííní'níinii jílį́į dooleeł! Shí shich'į'go t'áá íiyisí ákót'éego haa nitséskees, nidi nijígo t'éiyá t'ah aláhídi át'éego t'áá diné jílį́įgo áádóó Bóhólníihii bee hoł háíní'áázh jílį́įgo haa nitsíníkees dooleeł!

¹⁷ Áko shik'is jílį́ shííní'níigo, t'áá náshididííłtéłígi át'éego nááhodidííłtééł.

¹⁸ Nich'į' doo ákǫ́ǫ́ ádzaa ládą́ą́', éí doodaléi' bąąh háínítsi ládą́ą́' éí shígo shik'ijį' naaltsoos bik'i díízoh.

¹⁹ Shí Paul díí shíla' bee ak'e'ashchí: T'áá shí niná'deeshdlééł. Azhą́ hinínáago bee naa háíł'áhígíi nidi, éí doo béinidiyeeshnih da.

²⁰ Haa'íshą' shik'is, Bóhólníihii binahjį' baa hózhónígi át'éego áshidíílííł. Bóhólníihii bee shik'ééhodííłtah.

²¹ Ak'eh honíł'ínígíí bee naa jóshłíigo, ándishnínígíi nidi biláahgo ádííníiłgo shił bééhózingo nich'į' ak'e'ashchí.

²² Áádóó sédáa dooleełgi ałdó' t'áá áłdįįłt'éego shá ádíílííł; shá sodadołzingo t'ah nít'ée'da lá t'áá ánółtso nihaa nánísdzáa łeh nisingo bíká shił chohoo'į́.

K'é ha'níigo bee naaltsoos niilt'i'ii

²³ Épafras, Christ Jesus baa hwiilne'go biniinaa bił awáalyaa sékéhígíí k'é niłní,

²⁴ Mark áádóó Aristárkas áádóó Díímas índa Luke, shił nidaalnishígíí, ałdó' k'é daniłní.

²⁵ NihiBóhólníihii Jesus Christ bibee ajooba' nihii' naazíinii yił hólǫ́ǫ le'. T'áá ákót'ée doo.