OBADIAH 1 - Navajo Bible

Íídam dine'é a'ohgo ábi'didoolnííł

¹ Kót'éego Obadáíyah bił áhoodzaa. Bóhólníihii Diyin God éí Íídam dine'é yeinít'į́įgo ání: Bóhólníihii bits'ą́ą́dę́ę́' hane' dasidiits'ą́ą́', índa ał'ąą dine'é dabitahgóó naal'a'í abi'dool'a'go ání, Sołtį', hasht'edadohnéehgo bił anaa' dahodiidleeł.

² A ł'ąą dine'é bitahgóó hojooba' ánít'éego ándeeshłííł índa t'áá íiyisí ni'dit'į́, jó'akon.

³ Wódahdi tsédaagiizh góne' kééhóht'íinii, háishą' hayóí shį́į́ ni'jį' hadashidínóoyoł, diníinii nijéí ádaa ha'niihgo ádiná'ídlo'.

⁴ Azhą́ átsá nahalingo yót'ááh náhodídleeh nidi, azhą́ sǫ' bitahdi nit'oh íinilaa nidi, áádę́ę́' hadah kónándeeshdlííł, ní Bóhólníihii.

⁵ Dooládó' ádadoohdįįł da! Ani'įįhii naaníjée'go, doodaii' tł'ée'go aghada'ii'níiłii naatįįh yíjée'go t'áásh ádíighahígo ádá da'dínóo'į́į́ł? Ch'il na'atł'o'ii dayóbéhígíí neiyíkaigo da' doósh ła' áá deidoosįįł da?

⁶ Dooládó' Íísa bee áhásdįįd da índa yit'íinii ałtso beineest'į́į' da!

⁷ Diné bił aha'díínít'ánígíí t'áá ałtso kéyah nineel'ą́ąjį' adanizlóóz; diné bił k'é da'ahidí'níinii nida'deezlo' índa nik'eh dadeesdlį́į́'; nibááh dayííyą́ą'ii ná nida'az'ą́. Éí doo ak'i'diitįįh da.

⁸ Bóhólníihii ání, Éí bijį́įdi Íídam kéyahdóó hastóí dahóyáanii ts'ídá ádeeshdįįł; Íísa bidziłdóó ak'i'diitįįhii ádeeshdįįł.

⁹ Tííman nílíinii, kin haal'á nitahdóó diné dabidziilii nani'eeshígíí biyadahodidoolyis, áko Íísa bidziłdóóígíí t'ááłá'í jinítínígo nidahodi'dootsiłgo ádazhdoodįįł.

¹⁰ Baa yáhásinii nik'iidooldohgo hool'áágóó ándi'dooldįįł, háálá nik'is Jéíkab atíinilaa.

¹¹ Éí bijį́ łahjí yinizį'go t'áadoo baa nítsínít'įįd da; éí bijį́ dé'éyóní bisiláo yisnááh hats'ą́ą́' adayiizh'eezh índa ana'í danilíinii yah a'atiin góne' yah aheeskaigo Jerúsalem biniyé yáá'iilt'e' yaa naaskai, índa éigi ánít'éé nít'éé'.

¹² Nidi nik'is nilíinii yisnááh silį́į'go doo baa ts'ííd nínízin da doo nít'éé'; Júdah dine'é danilíinii atídabi'diilyaa góne' doo baa nił nihoozhǫǫh da doo nít'éé'; yínííł bił beiníłką́ągo doo ádaa hó'niihgóó hadíídzih da nít'éé'.

¹³ Ti'hoo'nííhtsoh béé'oo'nííh beiníłką́ą́ góne' shidine'é bich'é'étiin góne' doo yah adíínáał da nít'éé'; ti'hoo'nííhtsoh béé'oo'nííh beiníłką́ą́ góne' doo baa ts'ííd nínízin da doo nít'éé'; ti'hoo'nííhtsoh béé'oo'nííh beiníłką́ągo yá'át'éehii bee hólónígíí doo ła' nídidííléeł da nít'éé'.

¹⁴ Yóó'adahinichéhígíí ádííłdįįł biniyé bá ch'íhonít'i'gi doo sínízį́į da doo nít'éé'; yínííł beiníłką́ą́ góne' ch'ída'iisdįįdígíí yisnááh dadooleeł biniyé doo ninádidíí'áał da nít'éé'.

¹⁵ Jó, Bóhólníihii beidoołkáłígíí ał'ąą dine'é t'áá ałtso bik'i hwiidooleeł. T'áá íínít'įįdígi át'éego nich'į' áhodoonííł; íinidzaaígíí nik'ijį' nídoodleeł.

¹⁶ Áko shidził diyinii bighą́ą'di íínídlą́'ígi át'éego ał'ąą dine'é t'áá ałtso da'adlą́ą dooleeł; idadí'nóodlį́įłgo nídadí'nóodlį́į́ł índa ts'ídá t'áadoo nidahaazhchį́į da nidahalin doo.

Ízrel dine'é bidziilgo ádabidi'doolnííł

¹⁷ Nidi Dził Záíyan bighą́ą'di ła' yisdáhidookahgo hodiyin dooleeł áádóó Jéíkab bighandóó danilínígíí t'áá daabíí' nít'éé' yę́ę bíí' nídadoodleeł.

¹⁸ Jéíkab ba'áłchíní náás ahoolchíiłii kǫ' nidahalin, áádóó Jóseph ba'áłchíní náás ahoolchíiłii éí kǫ' dah nídíno'ii nidahalin, nidi Íísa ba'áłchíní náás ahoolchíiłii ehégod nidahojílingo hohodidoo'niłgo ahodi'doolk'ą́ąłgo doo ła' doodzih da, háálá Bóhólníihii yee haadzíí'.

¹⁹ Shádi'áahjigo kéédahojit'ínígíí Íísa bidził hóó' dadooleeł; dzígaigi kéédahojit'ínígíí Filístiya kéyah hóó' dadooleeł; Íífreiyim bikéyah áádóó Samériya bikéyah ałdó' hóó' dadooleeł, áádóó Bénjamin éí Gíliyad kéyahígíí bíí' dooleeł.

²⁰ Ízreldóó siláo danilíinii dabi'disnááh yę́ę éí Kéínan kéyahdóó Zárefathjį' bíí' dadooleeł, índa Jerúsalemdóó dabi'disnááh yę́ę Siiféíradgi nidaakaígíí éí shádi'áahjigo kin hadaas'áhígíí bíí' dadooleeł.

²¹ Nídabisnánígíí Dził Záíyan si'ánígóó hadookahgo Íísa bidził si'ánígi áadi nidant'áa doo; aláahgo bee óhólníihgo bił haz'áanii éí Bóhólníihii bí doo.