LEVITICUS 1 - Navajo Bible

Didlidgo náádahaniihii

¹ Áádóó Bóhólníihii éí Mózes yíká ádííniidgo yich'į' haadzíí'; níbaal bii' dahozdísinii biyi'dóó ábíłní,

² Ízrel dine'é bich'į' handziihgo ábidiní, Nihitahdóó ła' Bóhólníihii bich'į' náázhdi'yoołnihgo éí béégashii áádóó dibé ła' nááhizhdoołnihgo éí jidoolóós.

³ Nááhizhdoołnihii éí béégashii jidiłidgo nááhizhdoołnih ládą́ą́' biką'ii hadaałt'éii nízdidoolóosgo t'áá hó íiznízingo níbaal bii' dahozdísinii bich'éédą́ą'gi Bóhólníihii binááł jidiłidgo nááhizhdoołnih.

⁴ Áádóó didlidgo náájiiłniihígíí bitsiit'áagi dashdidoolnihgo há dínóodzįįł; éí bee há k'ééhodoodǫǫł biniyé ách'ą́ą́h nááhizhdoołnih.

⁵ Áádóó Bóhólníihii binááł dóola jidiyoołhééł, áko nááda'iiłniihii Éran biye'ké éí dił nídeidiyiikaahgo níbaal bii' dahozdísinii bich'éédą́ą'gi bikáá' náá'iiniihí bikáa'gi t'áá át'é yik'ínídeiłka' doo.

⁶ Ákohgo didlidgo nááhidoonihígíí néidooł'ah áádóó niidiyoołgish.

⁷ Náá'iiłniihii Éran biye'ké éí bikáá' náá'iiniihí bikáa'gi kǫ' iididoołt'áałgo ákwii hazhó'ó chizh deididoonił.

⁸ Áádóó nááda'iiłniihii Éran biye'ké éí nááhidoonihígíí bitsiits'iin índa bik'ah t'áá bił ałkéé' sinilgo bikáá' náá'iiniihí bikáa'gi chizh diltłi'ígíí yikáá' nideidoonił.

⁹ Nidi bitsą́ siláí áádóó bijádígíí éí táádoogis. Áko náá'iiłniihii éí bikáá' náá'iiniihí bikáa'jį' didlidgo nááhániihii t'áá át'é Bóhólníihii bich'į' łikání halchingo néidiyoołnih.

¹⁰ Áádóó nááhizhdoołnihii éí dibé bitahdę́ę́' dibé ła', doodaii' tł'ízí ła' didlidgo nááhizhdoołnihgo éí biką'ii hadaałt'éii nááhizhdoołnih.

¹¹ Áko éí bikáá' náá'iiniihí si'ánídóó náhookǫsjígo Bóhólníihii binááł jidiyoołhéełgo nááda'iiłniihii Éran biye'ké éí diłígíí bikáá' náá'iiniihí bikáa'gi yik'ínídeiłka' doo.

¹² Áádóó diné éí nááhizhdoołnihígíí nihizhdoołgishgo atsii' áádóó ak'ah t'áá bił ałkéé' sinilgo náá'iiłniihii éí bikáá' náá'iiniihí bikáa'gi chizh diltłi'ígíí yikáá' niidoonił.

¹³ Nidi bitsą́ siláí áádóó bijáád táidoogis. Áko náá'iiłniihii éí t'áá ałtso néididooniłgo bikáá' náá'iiniihí bikáa'jį' yididoołił; díí didlidgo nááhidoonihii éí Bóhólníihii bich'į' łikání halchingo nááhániihii át'ée doo.

¹⁴ Didlidgo nááhániihii éí Bóhólníihii bich'į' nááhizhdoołnihígíí éí tsídii át'éego nááhizhdoołnihígíí éí hasbídí, doodaii' hasbídí łigaii biyázhí át'éego jidoojih.

¹⁵ Áko náá'iiłniihii éí bikáá' náá'iiniihí si'áníjį' yidoołtéełgo bik'os haidoonishgo bikáá' náá'iiniihí bikáa'jį' yididoołił; bidiłígíí éí bikáá' náá'iiniihí bitsį́įjį' yąąh haidoonih.

¹⁶ Áádóó yii' iiłneehígíí índa ats'osígíí t'áá bił haidoonishgo bikáá' náá'iiniihí bíighahgi ha'a'aahdę́ę'go łeeshch'iih yahiikaahjį' iidiyoołtł'ił.

¹⁷ Áádóó bit'a' t'áá yił ąą yididoozǫ́ǫ́s, nidi doo aháidoonił da, índa náá'iiłniihii éí bikáá' náá'iiniihí bikáa'gi chizh diltłi'ígíí yikáá' niidooniłgo yididoołił, áko didlidgo nááhidoonihii éí Bóhólníihii bich'į' łikání halchingo nááhániihii át'ée doo.