LAMENTATIONS 1 - Navajo Bible

Záíyan bi'disnáago yínííł nilį́

¹ Dooládó' kin haal'áii diné t'óó ahayóí kééhat'į́į́ nít'éé' yę́ęgi doo naagháhí da hazlį́į́'! Dooládó' bąąh áhásdįįdii dzizlį́į' da! Dadine'é bitahgi ayóó át'éii jílį́į́ nít'éé' yę́ę hakéyah hadahwiisdzogóó asdzą́ą́ naat'ááh jílį́į́ nít'éé' yę́ę, dooládó' náánáła' hwee ádíhólníihgo bich'į' ni'jiilée da!

² Tł'ée'go yéego yicha; yił ałch'į' dah daalwo'ii bitahgi t'áadoo haho'ayółníhígóó haniitsį' bąąhdę́ę́' hanák'eeshto' nidaazlį́; hak'is danilíinii t'áá ałtso hak'ijį' daazlį́į'go hwe'ana'í daazlį́į́'.

³ Júdah dine'é bich'į' nidahwii'náago áádóó naalte' daazlį́į'go t'ah yówehgo dabi'disná; ał'ąą dine'é bitahgóó kéédahojit'į́įgo háá'áyį́į́h há ádin áádóó atídahał'ínígíí t'áá ałtso łah hont'éhígi jideesdee'go dahasnááh.

⁴ Záíyangóó da'nítiingóó diné atínídadindleeh, háálá hodílzingo áłah nída'adleehíjį' doo ła' yígháhí da; yah ada'iiztiinígóó doo nidaagháhí da, índa há nááda'iiłniihii danilíinii ádił hadahadzoołgo áádóó ch'ikéí danilíinii yínííł yił nidaakaigo t'áá íiyisí hajéí yineesgai.

⁵ Hats'ą́ą́jí danilíinii éí hananit'a'í daazlį́į́'; hwe'ana'í k'ee'ąą dadeeshzhiizh, háálá lą'ídi ni'dziisí'ígíí biniinaa Bóhólníihii hach'į' hodiis' náá'; ákót'éego hwe'ana'í bilą́ąjį' ha'áłchíní deisnáago deinééłkaad.

⁶ Záíyan bich'é'é yee baa dzólníí nít'éé' yę́ę ałtso bits'ą́ąjį' kódzaa índa binanit'a'í danilíinii éí bįįhką' deidoołchoshii ch'ééh hadeintá nidahalingo bidiyoołhéełii yilą́ąjį' doo dabidziilgóó adahineezhchą́ą́'.

⁷ Jerúsalem kin haal'áádóó dine'é bi'ana'í yílák'ee níídee'go t'áadoo ła' háká eelwodí da áádóó hach'į' nahwii'náago bik'ee haa'í shį́į́ doo nijighááhgóó ałk'idą́ą́' yá'át'éehgo hoł áhoot'éé nít'éé' yę́ę bééjoolnii'; hats'ą́ą́jí danilíinii dahoołtsą́ągo hach'į' nahwii'nánígíí t'óó yee há nidahast'i'.

⁸ Jerúsalemgi kéédahat'íinii t'áá íiyisí ádił da'dzisiihgo bąą doo da'jílį́į da dzizlį́į́'; bił jílį́į́ nít'éé' yę́ę t'áá ałtso daha'į́ daazlį́į́', háálá ha'éé' ádingo dahoołtsą́; t'áá aaníí, ádił háádzídzołgo bits'ąą dashdiiyá.

⁹ T'óó baa'ihígi ájíít'įįdii éí ha'éé' bik'i sinilgo bee há nihonít'i'ii t'áadoo bik'ísízníłkéez da; éí bąą doo shóhoot'éedi nihoníłt'e'go háká adoolwołii ádin nít'éé'. Bóhólníihii nílíinii, shich'į' nahwii'nánígíí níníł'į́, háálá ana'í ádaa has'nih.

¹⁰ Hats'ą́ą́jí nilíinii hanaalye'é da'ílíinii t'áá ałtso néidiinil. Hanahagha' bá haz'ą́ góne' ał'ąą dine'é yah aheeskai; éí naa áłah néidleehgi doo nihitah hidookahgóó bee nihá háínídzíí' nít'éé'.

¹¹ Hadine'é t'áá ałtso ádił háádaadzoł; ch'iyáán hadeintá; yee dabidziil doo biniyé binaalye'é da'ílíinii ch'iyáán yik'éndayiinííł. Níníł'į́, Bóhólníihii nílíinii, áádóó baa nitsíníkees, háálá t'áadoo biniyéhígóó naashá sélį́į́'.

¹² T'áá ánółtso shą́ą́h nídadohkahii, da' doósh nihida'diił'áa da? Shoo, Bóhólníihii t'óó báhádzidgo hashké nídzingo shich'į' hodiis'ná'ígíí éí yínííł shik'i yayiiyínígi át'éegoósh haa'ída yínííł náádaah'į́.

¹³ Wót'ááhdę́ę́' shits'in bii'jį' kǫ' yi'níłnii'go shik'eh deesdlį́į́'; shidááhgóó biih dideeshtałii neineesdizgo t'ą́ą́' kónáshiidlaa; shinaagi doo naagháhígóó áshiilaago shá bíighah doo shidziilgóó i'ii'aah.

¹⁴ Bee haz'áanii héti'ii éí yishbizhgo ałk'ístasgo shizéédéeláago áádóó doo shidziilgóó áshiilaa. Bóhólníihii éí shi'ana'í doo bílák'ee haosha' át'éii yílák'ee shidíí'ą́.

¹⁵ Kééhasht'į́ biníí'dóó Bóhólníihii éí diné dabidziilii shits'ą́ą́' yik'i naayá áádóó shitsíłkéí éí dabidi'dooljish biniyé dadine'é áłah áyiilaa; Júdah bitsi' ch'ikę́ę́h nilíinii ch'il na'atł'o'ii yiljizhígi át'éego Bóhólníihii hashjizh.

¹⁶ Díí biniinaa yishcha; t'áá íiyisí shinák'eeshto' náálį́, háálá shíká adoolwołii doo deeghánídi shits'ą́ądi hólǫ́; ana'í bik'eh dadeesdlį́į'go biniinaa sha'áłchíní t'áá ádzaagóó ch'éékai.

¹⁷ Záíyan k'ídeeshchidgo doo ła' habi'iyółníhí da. Jéíkab bídéét' i'go Bóhólníihii haadzíí'; hwe'ana'í danilíinii honás'áa doo. Jerúsalem éí hatahgi asdzání ąądii nilį́ nahalin.

¹⁸ Bóhólníihii éí t'áá ákogi át'é; jó, bibik'eh ó'oo'níiłii bik'ijį' naasdzil. Ánihidishní, dine'é t'áá ánółtso da'íísółts'ą́ą'go yínííł nishłínígíí danół'į́; shich'eekę'í t'ah doo diné bee haleehii áádóó shitsíłkéí ałtso dabi'disnááh.

¹⁹ Bił ałch'į' dah daashwo'ii hágo bidííniid, nidi éí shinda'azlo'; shá nááda'iiłniih nít'éé' yę́ę índa aląąjį' naazį́į́ nít'éé' yę́ę kin haal'áágóó ch'iyáán bee dahadziil dooleełii ch'ééh hadazhnitáago dichin dahóóghą́ą́'.

²⁰ Shoo, Bóhólníihii nílíinii, yéego shich'į' nahwii'náago shide áhoot'é; yínííł bik'ee shijéí neezgai, háálá t'áá íiyisí nich'į' nisisdzil. Tł'óó'góó diltłish bits'ą́ą́dóó yínííł hólǫ́; dahooghan góne' bik'ee da'dootsaałii hólǫ́.

²¹ Ádił hanásdzołgo dashidiizts'ą́ą'go t'áadoo hashi'iyółníhí da. Shich'į' nahwii'náago shi'ana'í t'áá ałtso yaa dahodiizts'ą́ą́'; ákót'éego íinilaaígíí yaa bił dahózhǫ́. Baa hodoolzhishígíí baa ch'íhwííní'ánígíí baa honíyáago t'áá shígi ádajít'ée doo.

²² Bíni'dii doo yá'áshǫ́ǫ́góó ádadziidzaii nidáahgi hólǫ́ǫ doo, índa t'áá shí bee haz'áanii héti'ii biniinaa áshiinilaaígi át'éego áhólééh, áko ádił hahasdzoołii t'óó ahayóigo bik'ee shijéí bąąh nahóókaad.