JUDE 1 - Navajo Bible

K'é ha'níinii

¹ Shí Jude, Jesus Christ yá naal'a'í, James yił háá'áázh nishłíinii, Diyin God aTaa' nilíinii diyingo ádahoolaii, Jesus Christ haa áhályą́ągo bíí' dajílínígíí, Diyin God háká ádííniidii, hach'į' naaltsoos áshłééh:

² Diyin God bibee aa a'ááh hasinii, áádóó bibee ach'į' hózhǫ́ náhásdlį́į'ii, índa bibee ayóó'ó'ó'níinii k'ee'ąą yilzhishgo yee nihik'ijidlíi doo.

Doo ákǫ́ǫ́ nida'nitinii

³ Shik'isóó ayóó'ánihósh'níinii, yisdá'iildééh bee łá'í niidlínígíí bee nihich'į' ak'e'deeshchííł niizį́į́', nít'éé' na'nitin woodláanii t'ááłáhádiígíí hool'áágóó Diyin God bidiyį́į́' danilíinii yeidiyiiz'ánígíí bee yéego nidaahbaah dooleełjígo t'áá ákónéehee baa nánihooshkąąhgo nihich'į' ak'e'deeshchííł néiniisdzį́į́'.

⁴ Háálá diné ła' Diyin God doo deidísinii t'áá nanit'inee nihitah dahakááh, éí badaa'ihgo adáhonooní deinízinígíí biniinaa Diyin God bibee ajooba' bee na'nitinígíí łahgo ádeile', índa Jesus Christ t'áá éí t'éiyá nihiNanit'a'í áádóó nihiBóhólníihii nilíinii doo deinízin da. Éí t'áá shiidą́ą'di atídabidi'doolníiłgo bá nidahodiist'ą́.

⁵ Azhą́ t'áá íídą́ą́' díí t'áá ałtso nihił béédahózin nidi béénihiyiishnííh, jó, Ííjip dine'é bits'ą́ą́dóó Ízrel dine'é hwéédahideeshchidgo Bóhólníihii yisdáhóójaa', áádóó bik'ijį' doo da'joodlánígíí áho'disdįįd.

⁶ Díí ałdó' béénihiyiishnííh, diyingo nidaal'a'í bee óhólníihii doo deiniizį́į' dago dahólónídóó yits'ą́ąjį' dah diikai; éí ts'ídá hodiłhiłgo chahałheeł góyaa bá nihodiyoot'ááł beiníłką́ąjį' hool'áágóó beda'astł'ǫ́ǫgo Diyin God ákóne' bidá'di'níłkaal.

⁷ T'áá ákót'éego Sádam áádóó Gomárah índa binaagóó kin hadaas'áá nít'é'ígi diné baa'ihgo na'ageh yee tsi'deeskai, áádóó ahaa nináldeehgo ałdádanoolníí nít'éé', éí hool'áágóó hodook'ą́ą́ł bee até'él'į́įgo ti'hoo'níhígíí yee k'ééhodidoodlííł bee na'nitinii át'é.

⁸ T'áá ákót'éego ałdó' díí diné t'áá ádzaagóó nida'nitinii yaa nidayiiyeeł nahalingo t'óó bił ádaat'íinii biniit'aa ahíldahgo nída'ahi'iilnaadgo nida'ádiilchxǫǫh, áádóó bee ídahólníihii ts'ídá doo deidísingóó ayóó ádaat'éii nidi yił nida'í'įįh.

⁹ Azhą́ Máíkel aláahgo diyingo naal'a'í nilį́į nidi t'áadoo ákódííniid da. Jó, éí Mózes yę́ę bits'íís biniinaa níłch'i bida'iiníziinii binanit'a'í yił ałgha'dit'ááh yę́ędą́ą́', doo t'áá k'ad yiyíí'įįdgo yá nihoní'ą́ą da, nidi ádííniid, Bóhólníihii nididooteh.

¹⁰ Nidi díí t'áá ádzaagóó nida'nitinii t'áadoo ééhóziní ił nida'í'įįh áádóó naaldlooshii doo nitsídaakeesii nahalingo t'áadoo tsíhodeeskézí t'óó nida'ádiilchxǫǫh.

¹¹ Éí bá doo hojooba' ájíníi da! Kéin áát'įįd yę́ęgi át'éego diné k'ad ákódaat'į́, áádóó Béílam diné achxáazhii nilį́įgo áát'įįd yę́ęgi át'éego díí diné t'áá bizááká a'ídeeł yíká naanánoodah, índa Kórah éí bee ídahólníihii yich'į' nídiidzáago biniinaa ábi'disdįįd yę́ęgi át'éego díí diné ałdó' bee ídahólníihii yich'į' nídahidiikaígíí biniinaa ádabidi'dooldįįł.

¹² Christ bee ahił danohdlį́įgo ánída'óohsįįhgi doo ádaa nídaat'íinii danilį́įgo nihits'ą́ą́' nída'adį́įhgo t'áá bí t'éí aghá'ádadees'á. Éí dinéhígíí k'os bił yóó'iiyołgo t'áadoo nahałtį́įh da łehígi ádajít'é: aak'eejį' tsin bineest'ą' t'áadoo bąąh nídahasdlį́į'ii, naakidi ałkéé' nídaazganii, áádóó bihétł'óól t'áá bił hadahaastł'íidiigi ádajít'é.

¹³ Tónteel bíígháán t'óó báhádzidgo náádadiidáahii bizhéé'ígi át'éego t'óó baa yáhásinígi ádajit'į́; sǫ' wót'áahdi hidijeehígíí hool'áágóó ts'ídá diłhiłgo chahałheeł bee bá nahaz'ánígíigi ádajít'é.

¹⁴ Ádam áho'diilyaadóó wóshdę́ę́' tsosts'idi ałk'i ná'ázhchį́į́ góne' bi'dizhchíinii Íínak wolyéii díí t'áá ádzaagóó nida'nitinii nee'nijį' kóníigo yaa hoolne', Jó'akon, Bóhólníihii éí bidiyį́į́' t'áadoo bee néelą́'ígóó yił nánízą́ągo,

¹⁵ diné t'ááłá'í jinítínígo haa nídahódóot'įįł, áádóó Diyin God doo dazdísinii t'áá ádzíłtso bąąhági ádajíít'įįdii biniinaa há nidahwiist'ą́ągo atídaho'di'doolnííł, índa Diyin God nichxǫ́'ógo baa yádajííłti'ii bee ák'ijį' dahojoolchį' doo.

¹⁶ Díí t'áá ádzaagóó nida'nitinii ts'ídá t'áá áłahjį' t'áadoo biniyéhígóó saad dahółǫ́, índa t'áá hó ádajit'į́ daaníigo saad dabighą́; k'ad yidáahjį' bi'niináanii t'éiyá yik'ehgo deíkááh; t'áá bí t'éiyá alááh ída'dees'áago ádaa daha'niih; t'óó ádaaníigo aa dahaniihgo yee diné łídeichxáázh.

Jude i'níłnii'go ná'ookąąh

¹⁷ Nidi, nihí ayóó'ánihósh'níinii, nihiBóhólníihii Jesus Christ yá daal'aadii nee'ni'jį' saad yaa dahoolne'ii ts'ídá béédaałniih.

¹⁸ Éí ádanihiłní, Łahgo náhodoodááł baa hoolzhiizhgo diné ándahałt'i' doo, t'áá bí yidáahjį' bi'niináanii yik'ehgo deíkáah doo.

¹⁹ Díí diné ałts'á'áldahgo ádeile'ii danilį́ ni, ts'ísee k'ehgo dahináanii índa Níłch'i Diyinii bee ádaadinii danilį́.

²⁰ Nidi, nihí ayóó'ánihósh'níinii, ts'ídá diyingo deinohdláanii bikáá'dóó bidziilgo danóohséełgo áda'díí'nółzin; Níłch'i Diyinii bee sodadołzin.

²¹ NihiBóhólníihii Jesus Christ nihaa a'ááh nízingo iiná doo ninít'i'ii nihaididoo'áłígíí bíká dadínóh'į́į'go Diyin God bibee ayóó'ó'ó'ni' bii' dahonohłǫ́ǫgo áda'díí'nółzin.

²² Diné ła' bi'oodlą' bił naaki nilíinii nihił baa dahojoobá'ígo aa a'ááh hasin bee bił dahołne'.

²³ Náádaała' bá bik'ee nihił daayée'go baa dajiinohba'go kǫ' bii'dę́ę́' yisdádahohdzį́į́s nahalinígi át'éego Christ bee yisdádahizhdookah, nidi bąąhági át'éii bee bi'éé' dááchxǫ' nahalinígi át'éego bibąąhági ádaat'éii dajiinohłá.

Jude sodilzingo Diyin God yaa haniih

²⁴ Doo t'ą́ą́' anídínóohdahgóó Diyin God nihaa áhályą́ągo yilááh neel'ą́. Áádóó t'áadoo bee nihik'ídahót'ahígóó t'áá íiyisí nihił dahózhǫ́ǫgo Diyin God t'áá bí bee bits'ádi'nílíidii yidááhdę́ę́' ninihidiyoo'ishgo yilááh neel'ą́.

²⁵ Diyin God t'áá éí t'éiyá hóyáanii, Yisdánihiiníiłii, [nihiBóhólníihii Jesus Christ] bee baa ha'niihii, yee ayóó át'éii, bibee óhólníihii índa yee ayóó ábóodziilii éí hodeeyá bítséedidą́ą́' áádóó k'ad índa hool'áágóó bíi'go ahool'á. T'áá ákót'ée doo.