JONAH 1 - Navajo Bible

Jónah éí Bóhólníihii hólǫ́ǫ́dóó yóó'ajilyeed

¹ Amítai biye' Jónah éí Bóhólníihii bich'į' haadzíi'go ábíłní,

² Nídiidáahgo nílááh, Níneveh kin haal'áágóó dínááh, éí ayóó át'éego kin haal'áii bi'ayíłníihgo bich'į' ahidílgháásh, háálá éí ts'ídá bidoo yá'áshǫ' shinááł yaa deeskai.

³ Nidi Jónah dah diiyáago Társhish kin haal'áajigo Bóhólníihii bits'ąą yóó'ajilyeedgo Jápa kin haal'áá góyaa ajííyá áádóó Társhishgóó tsinaa'eeł deez'éél léi' bik'ízhníyá, áko bik'é nazh'níláago biih jííyáago Társhish kin haal'áajigo atah hoł dah adii'éelgo Bóhólníihii hólǫ́ǫ́dóó yóó'ajilyeed.

⁴ Nidi Bóhólníihii éí ayóó át'éego tónteel bich'į' níyolgo áyiilaa, áko t'óó báhádzidgo deeyolgo tsinaa'eeł t'áá ádeígo neheltǫ'.

⁵ Ákohgo nida'ał'eełii nídaasdzíidgo t'ááłá'í nítínígo bidiyin dabidi'níinii yich'į' hadadeeshghaazhgo tsinaa'eeł ászólí dooleeł biniyé naalyéhé dajíyeehígíí taah dadziistł'ííd. Nidi Jónah éí t'ah doo diyóółgóó tsinaa'eeł biih jííyáago ná'áyaídi jineeztį́įgo ajiiłhaazh.

⁶ Ákohgo nida'ał'eełii binanit'a'í haa níyáago áhodííniid, Haa lá áhoodzaa, ałhoshí nílíinii? Nídiidáahgo nidiyin néinikąąh; eii shį́į́ nidiyin nihąąh tsídookosgo doo ádiidįįł da.

⁷ Áádóó áda'ahidoo'niid, Hágo, haa'íshą' yáá'iilt'e' ádadiilníiłgo díí doo yá'áshóonii nihik'i hoole'ígíí baa ákodadíníidzįįł. Áko yáá'iilt'e' ádayiilaa, nít'éé' Jónah bik'i hodiit'ą́.

⁸ Áádóó ádahodííniid, Nihił hólne', baa nídaniikąąh. Háishą' díí doo yá'át'éehii nihik'ijį' kóyiilaa? Ha'át'íishą' ninaanish? Háádę́ę'shą' naniná? Háadish nikéyah? Ha'át'íí dine'é shį́įshą' nílį́?

⁹ Áádóó ábizhdííniid, Hííbrew dine'é nishłį́, áko Bóhólníihii dinisin; éí Diyin God yá'ąąshdi hólóonii, tónteel áádóó nahasdzáán áyiilaii nilį́.

¹⁰ Ákohgo diné t'áá íiyisí nídaasdzíidgo ádahodííniid, Ha'át'íishą' biniyé ánít'į́? Háálá nida'ał'eełii Jónah éí Bóhólníihii hólǫ́ǫ́dóó yits'ąą yóó'eelwodígíí bił béédahoozin; jó, t'áá ákót'éego bił hojoolne'.

¹¹ Áádóó ádahodííniid, Haashą' dandiilníiłgo tónteel nihá ánáhodidoolzih? Háálá tónteel t'áá íiyisí náádadiidáahgo yéego yilk'ooł.

¹² Áádóó ábizhdííniid, Nídashidoołteehgo tónteel biih dashiyołhan, áko tónteel nihá ánáhodidoolzih, háálá shił bééhózingo shí shiniinaa ayóó át'éego nihich'į' deeyol.

¹³ Azhą́ ákózhdííniid nidi, nida'ał'eełii táłts'á da'diil'oł daznízin, nidi ch'ééh ádajíít'įįd, háálá tónteel t'áá íiyisí hak'ijį' náádadiidáahgo yilk'ooł.

¹⁴ Ákohgo Bóhólníihii yich'į' hadadeeshghaazhgo ádaaní, Nídaniikąąh, Bóhólníihii, nídaniikąąh, t'ááká díí diné be'iina' biniinaa ánihóółdįįh lágo; dił doo bohodiit'i'ii bee doo nihik'i hodidíí'áał da, háálá, Bóhólníihii nílíinii, nił yá'át'éhígi íinidzaa.

¹⁵ Ákohgo Jónah nídeidiiłtį́įgo tónteel yiih dayiisxan, áko tónteel t'óó báhádzidgo náádadiidáhígíí áhodiilzee'.

¹⁶ Áádóó diné éí Bóhólníihii yik'ee t'áá íiyisí bił yéé' dahazlį́į'go yich'į' nááda'iisnii' índa yich'į' ádee hadaasdzíí'.

¹⁷ Ákohgo Bóhólníihii éí łóó' ayóó áníldíilii hasht'eyiilaago Jónah iidoołnah yiniyé yiníł'a', áádóó Jónah éí łóó' bibid biyi' dziztį́įgo tágí jį́ áádóó tágí tł'éé' azlį́į́'.