JAMES 1 - Navajo Bible

K'é ha'níinii

¹ Shí James, Diyin God índa Bóhólníihii Jesus Christ yá naal'a'í nishłíinii, naakits'áadahgo Ízrel dine'é danohłíinii tadanihidi'nooskaadígíí nihich'į' naaltsoos áshłéehgo k'é nihidishní.

Hwe'oodlą' áádóó bee hódzáanii

² Shik'isóó danohłíinii, ał'ąą át'éego nanihídahodi'nitaahgo, baa hózhǫ́ǫgo baa nitsídaahkees,

³ háálá nihe'oodlą' nabídahonitaahígíí bee nízaadgóó ha'jólní áhooł'įįhgo nihił béédahózin.

⁴ Áko bíni'dii ha'ahóní nihinaalnishgo ałtso ła'yilééh, ákót'éego nihe'oodlą' bee ts'ídá t'áá ákóne' ádanoht'éego índa t'áadoo bee nihich'į' anáhóót'i'ígóó dahinohnáa doo.

⁵ Nihí ła' bee hódzáanii bídin nohłį́įgo Diyin God bíídóohkił, éí bił hadlee'go índa doo ak'íhá'ááhgóó t'áá ałtso aidii'aah, áko honohsą́ągo ánihidoolííł.

⁶ Nidi ts'ídá t'áadoo nihił naaki nilíní iinohdlą́ągo yídóohkił, áko doo nihił naanááyoł nidahonohłin da doo. Háálá hoł naaki nilínígíí níyol yááhoołgohgo tónteel yilk'oołígíí nahojílin.

⁷ Diné ákójít'éii éí t'áadoo le'é Bóhólníihii bits'ą́ą́dę́ę́' nídideeshłééł t'áadoo jiníziní nijigháa doo.

⁸ Diné naakigo nitsídzíkeesii éí t'áá ałtsojį' doo bééhózingóó nijighá.

Badahojoobá'íii índa da'at'íinii

⁹ Ak'is hojooba' át'éii bohónéedzą́ ábi'diilyaago yaa bił hózhǫ́ǫ le',

¹⁰ áádóó ak'is at'íinii bahojoobá'í ábi'diilyaago yaa bił hózhǫ́ǫ le', háálá ajit'íinii ch'ilátah hózhóón niiłnahígi át'éego ahwíidoołkááł.

¹¹ Jó, hadoh bił háá'át'áahgo ch'il néízis, áádóó ch'ilátah hózhóonii ninádahinidah, áko doo t'áá nizhónígo ahool'áa da. T'áá éigi át'éego diné ajit'íinii t'áá joolnishgo ahwíidoołkááł.

Ach'į' nahwii'ná índa na'íhonitaah

¹² Diné nabóhonitaahgo ha'ólnínígíí bik'ihojidlí, háálá na'íhonitaah bik'esdeesdlį́į'go bééhoozingo iináájí naat'á ch'ah Diyin God haididoo'ááł, éí Bóhólníihii ayóó'ádabó'níinii bíí' dooleełgo yee yich'į' haadzíí'.

¹³ Nahóhodi'nitaahgo, Diyin God nashínítaah, doo jiníi da, háálá Diyin God éí nichxǫ́'íii doo yee na'ínítaah da, áádóó t'áá bí diné doo ła' nayínítaah da.

¹⁴ Nidi diné t'ááłá'í jinítínígo nahóhodi'nitaahgo t'áá hó bidázhnoolníinii hodíní'ah áádóó nichxǫ́'íii yiih honi'ah.

¹⁵ Áko bąąhági át'éego adáhonooní i'niiltsąąhgo bąąhági át'éii yiłchííh, áádóó bąąhági át'éii niniséehgo aniné nádleeh.

¹⁶ Shik'isóó ayóó'ánihósh'níinii, nihida'dódleeh lágo.

¹⁷ Yá'ádaat'éehii índa ts'ídá t'áá ákóne' ádaat'éii t'áá ałtso yá'ąąshdę́ę́' aTaa' bee da'di'nídíín áyiilaii bits'ą́ą́dę́ę́' nihaa hidit'aah. Diyin God doo łahgo óonééh át'ée da, doo chaha'oh náhoodleełígi át'ée da.

¹⁸ T'áá bí íinízingo hane' t'áá aaníinii bee nínáádanihi'dizhchį́, jó, nihí alą́ąjį' ba'áłchíní nídasiidlį́į́'.

Saad jidiits'a'go bik'eh hojíł'į́

¹⁹ Éí bąą, shik'isóó ayóó'ánihósh'níinii, diné t'ááłá'í jinítínígo hazhó'ó ajíists'ą́ą' doo, nidi tąądee háádziidziih doo, tąądee hánáháchįįh doo.

²⁰ Háálá Diyin God ts'ídá t'áá ákogi át'éego yinaha'áhígíí éí diné bi'áháchį' doo yee ła'yidoolíił da.

²¹ Éí bąą badaa'ihii índa bąąhági át'éego nitsáhákees k'ee'ąą dadínées'ąądii t'áá ałtso yóó'adahidoh'aah áádóó a'ohgo áda'díínółzingo Diyin God bizaad ayi'di k'ididoolyéełii nídadoohłé, éí nihii' naazíinii yisdáyiiníiłgo yíneel'ą́.

²² Diyin God bizaad bik'eh dahonoł'į́, t'áadoo t'óó dadoohts'a'go ádinida'ohdlo'í.

²³ Háálá t'áá háiida t'óó bizaad jidiits'a'go doo bik'eh hojíł'ínígíí éí diné kót'éii nahojílin, diné bii' adéest'į́į́' yii' hazhó'ó ádiníl'įįh,

²⁴ nidi ádiníl'įįhgo áádóó dah diigháahgo ánoolninii t'óó yaa yoonah.

²⁵ Nidi t'áá háiida Diyin God yee has'áanii hadaałt'éii diné yéédiyiichíidii hazhó'ó yii' déez'į́į'go yíhooł'aahígíí, éí ha'át'íhída yaa naagháago Diyin God bik'izhdoodliił, háálá yidiits'a'ii doo yaa yoonééhgóó yik'eh hół'į́įgo át'į́.

²⁶ Diné t'áá háiida shinahagha' hólǫ́ jinízingo, yájíłti'gi doo baa áhojilyą́ą́góó t'óó ádinijidlo'go ájít'į́, éí dinéhígíí hanahagha' t'áadoo nánídlíní da.

²⁷ Áłchíní bizhé'é ádaadinii índa sáanii bąąh ádahasdįįdii bich'į' nidahwii'náago bíká aníjílwo'ígíí, índa nihokáa'gi bąąhági át'éii ádąąh jit'ínígíí éí Diyin God aTaa' nilíinii binááł nahadlá t'áá aaníinii índa t'áá ákogi át'éii át'é.