HOSEA 1 - Navajo Bible

Hozéíya be'asdzą́ą́ doo ba'ahódlíii áádóó ba'áłchíní

¹ Azáíyah, Jótham, Éíhaz índa Heziikáíyah éí Júdah dine'é aláahgo binanit'a'í danilį́įgo yoołkááłdą́ą́' áádóó Jó'ash biye' Jerobówam éí Ízrel dine'é aláahgo binanit'a'í jílį́įgo yoołkááłdą́ą́' Bóhólníihii éí Biyérai biye' Hozéíya yich'į' haadzíí'.

² Bóhólníihii ts'ídá átsé Hozéíya yich'į' haadzíí' yę́ędą́ą́' Bóhólníihii éí Hozéíya áyidííniid, Nílááh, ałjiłnii asdzání ła' bá'iiyehgo éí nidi'yoołchíiłgo na'áłchíní ádíílííł, háálá díí kéyahgi na'ageh ayóó át'éego yee tsi'naakaigo Bóhólníihii yóó'adeideez'ą́.

³ Ákohgo Hozéíya dah diiyáago Dibléíyim bitsi' Gómer wolyéii yá'ázyeh áádóó i'niiltsąądgo ashkii yishchį́.

⁴ Áko Bóhólníihii áhodííniid, Jézriyel bee yídíízhiił, háálá Jézriyelgi kéédahat'íinii nidabi'diztseedgo bidił dadeezna' yę́ę biniinaa t'óó hodíína'ígo Jííhu bikindóóígíí atíhodeeshłííł áádóó bee óhólníihgo bił haz'áanii Ízrel bee wójíhígíí áádeesįįł.

⁵ Áko éí bijį́ áhodooníiłgo Jézriyel honíteel góyaa dine'é Ízrel bee wójíii be'ałtį́į́' k'ídeeshtih.

⁶ Gómer anáá'niiltsąądgo bich'é'é yishchį́. Áko Bóhólníihii éí Hozéíya áyidííniid, Loruhámah bee yídíízhiił, háálá dine'é Ízrel bee wójíii doo haa a'ááh náádínéesįįł da índa ádił nida'dziisí'ígíí ts'ídá doo hats'ánídideesh'áał da.

⁷ Nidi Júdah dine'é baa a'ááh dínéesįįł. Éí Bóhólníihii biDiyin God ádayósingo biniit'aa yisdádeeshnił. Ałtį́į́', doodaii' diltłish, doodaii' anaa', doodaii' łį́į́', doodaii' łį́į́' nidabiyéii doo bee yisdáhodeeshnił da.

⁸ Gómer éí Loruhámah ho'díít'óodgo anáá'niiltsąądgo biyáázh ła' náánéíshchį́.

⁹ Áko Diyin God ádííniid, Lo'ámai bee yídíízhiił, háálá doo shidine'é danohłį́į da áádóó doo nihiDiyin God nishłį́į da doo.

¹⁰ Azhą́ ákót'ée nidi, Ízrel ba'áłchíní éí tónteel bibąąhjį' séí táłts'áyiił'eełígíí ts'ídá doo jóołta' ánéelą́ą' daígi át'ée doo. Doo shidine'é danohłį́į da, bi' doo'niidígi ts'ídá t'áá éí haz'ą́ągi Diyin God hináanii biye'ké danohłį́, bi'di'níi dooleeł.

¹¹ Ákohgo Júdah dine'é áádóó Ízrel dine'é t'áá áłah ahiih nídookahgo binanit'a'í t'ááłá'í ádá nideidoołtééł índa éí kéyahgi háádínóot'į́į́ł, háálá éí bijínídóó Jézriyel dine'é ayóó át'éego bíyoołkáał doo.