HEBREWS 1 - Navajo Bible

Diyin God biYe' yinahjį' haadzíí'

¹ Ałk'idą́ą́' Diyin God éí bá dahalne'ii binahjį' danihizhé'é yę́ę lą'ídi índa lą'ígóó yich'į' hahaasdzíí',

² nidi díí nihooghááh bich'į' yoołkáłígíí biyi' t'áá bí biYe' yee nihich'į' haadzíí'. T'áá ałtsoní hóó' dooleełgo nihoníłtį́, t'áá hó ałdó' hwee yádiłhił biyi'di dah hiníláii áyiilaa.

³ T'áá hó Diyin God yee ayóó át'éii bee bits'ádi'nílíidii bee hats'ádi'nídíín, índa Diyin God át'éhígíí ts'ídá t'áá éí jílį́įgo, t'áá náhwiiz'ą́ą́ nít'éé' hazaad ayóó ábóodziilii bee hoogááł. Nihibąąhági át'éii nihąąh táádzízgizdóó bik'ijį' aghánáhóó'áadi Diyin God Ayóó'át'éii binish'náájígo dasneezdá.

Christ éí diyingo nidaal'a'í biláahdi ájít'é

⁴ Diyingo nidaal'a'í dabízhi' ayóó ádanoolninii biláahdi át'éii yízhí ayóó ánóolninii Diyin God haidiní'ą́. Éigi át'éego diyingo nidaal'a'í biláahdi ájít'é dzizlį́į́'.

⁵ Háálá Diyin God éí diyingo nidaal'a'í doo ła' kwíidííniid da, ShiYe' nílį́, díí jį́ nishchíinii sélį́į́'. Áádóó ałdó', Hó haTaa' nishłį́į doo, áko hó t'éí shiYe' jílį́į doo.

⁶ Áádóó náá'áłdó', Diyin God éí áłtsé yizhchíinii nahasdzáán yikáa'gi yiníł'a'dą́ą́' ání, Bíni'dii Diyin God bidiyingo nidaal'a'í t'áá ałtso bich'į' nidahałáa doo.

⁷ Diyin God éí diyingo nidaal'a'í kwííłní, Bidiyingo nidaal'a'í níłch'i danilį́įgo, índa bá nidaal'a'ii kǫ' dah nídadino'ii danilį́įgo ánáyoodlííł.

⁸ Nidi biYe' nilíinii éí kwííłní, Diyin God nílíinii, bikáá'dóó nahó'áii bikáá'dóó hóó'áałgo hool'áágóó ahóyéel'á, bee nóhólníihgo bił haz'áanii biyi' nóhólníihgo bee nééhózingo naat'á gish éí ts'ídá t'áá ákogi át'éego dah yítį́į́ł.

⁹ Ts'ídá t'áá ákogi é'ét'é ayóó'ííní'ní índa bąąhági át'éii éí jiiníłá, éí bąą Diyin God, niDiyin God nilíinii nándiiłtį́įgo ak'ah nik'i yayiiziidgo bił da'ahíínítą'ii biláahdi át'éego nił hózhǫ́ǫgo ániilaa.

¹⁰ Áádóó Diyin God ánáádí'ní, Bóhólníihii nílíinii, ni lą́ą hodeeyáadi nahasdzáán nee niłdzil, índa níla' bee yót'ááh hiníláii binishínílnishii át'é.

¹¹ Éí ádadoodįįł, nidi ni t'éí honílǫ́; éí t'áá ałtso éé' nahalingo hadadootih,

¹² beeldléí nahalingo dadíídis, áko łahgo ádadoonííł. Nidi ni t'éí t'ááłáhígi ánít'é, índa nee nináháháahii doo nidoot'ih da.

¹³ Diyin God éí bidiyingo nidaal'a'í doo ła' kwíidííniid da, Nida'ana'í bik'i dííníl'eezgo ániishłaajį' shinish'náájí dah sínídá.

¹⁴ Ákoshą' diyingo nidaal'a'í ha'át'íí danilį́? Jó, níłch'i danilį́įgo Diyin God yá nidaal'a' áádóó yisdá'iildééh hwíí' dadooleełii háká anájah doo biniyé adabi'diis'a'.