DANIEL 1 - Navajo Bible

Daniel áádóó bik'isóó ídahooł'aah

¹ Júdah kéyahgi aláahgo naat'áanii Jiihóíyakim nazhnit'áago táá' náhááh góne', Bábilandóó aláahgo naat'áanii Nébukadnézzar nínáago Jerúsalem kin haal'áii yináshzhiizh.

² Áko Bóhólníihii éí Júdah dine'é aláahgo binanit'a'í Jiihóíyakim wolyéii Nébukadnézzar yílák'eidíí'ą́, áádóó Diyin God bikin bii' sohodizindę́ę́' łeets'aa' chodao'į́į́ nít'éé' yę́ę ła' ch'íiníjaa'. Áko Sháínar kéyahgi bidiyin bidi'níinii bikin bił haz'ą́ą́góó yiníjaa'go yódí bá haz'ą́ą́ góne' yah ayííjaa'.

³ Áádóó Áshpenaz joolyéii naalte' binanit'a'í jílį́įgo éí aláahgo naat'áanii áhodííniid, Ízrel dine'é bitahdóó tsíłkéí ła' áádóó aláahgo naat'áanii bik'éí ła' índa aląąjį' naazíinii ba'áłchíní ła' nídeididoo'ish.

⁴ Ashiiké ániid nidaakaii doo tídílyaii, dabííyisii, t'áá íiyisí hóyą́ągo da'iichįįhii, át'é hwiindzin bee dahólóonii, ídahooł'aahgo ak'idadi'yiitįįhii índa aláahgo naat'áanii bighan haz'ą́ągi na'al'a' yídaneel'áanii éí naal'a'í Áshpenaz joolyéii Kaldíya dine'é bizaad bee ak'e'alchíigo áádóó yee yádaałti' doo biniyé yíneiniłtin doo.

⁵ T'áá ákwíí jį́ aláahgo naat'áanii bich'iyą' nídajidį́įhgo índa wáin néídlį́hígíí nídajidlį́įhgo haidiní'ą́, áko t'áá ídahojiił'aahgo táá' nídoohah áádóó bik'ijį' nidajil'a' doo biniyé aláahgo naat'áanii bidááhdę́ę́' nihizhdookahgo bá nidajil'a' doo.

⁶ Júdah dine'é bitahdóó ashiiké ániid nidaakaii nídii'nilígíí éí Daniel, Hananáíyah, Mísheiyel áádóó Azaráíyah daolyé.

⁷ Naalte' binanit'a'í éí daházhi' dooígíí yee dahóózhi'. Daniel éí Bélteshazar yee hóózhi', Hananáíyah éí Shéídrak yee hóózhi', Mísheiyel éí Mííshak yee hóózhi' índa Azaráíyah éí Abédniigo yee hóózhi'.

⁸ Nidi Daniel éí aláahgo naat'áanii bich'iyą' índa biwáin yidlánígíí ts'ídá doo bee ádizhdoolchxǫǫłgóó bee ádiih tsídzookééz. Éí bąą ts'ídá doo bee ázhdidoolchxǫǫłgóó naa'nil binanit'a'í bíjííkeed.

⁹ Áko Diyin God éí naa'nil binanit'a'í Daniel yich'oo'néego índa yaa a'ááh nízingo áyiilaa.

¹⁰ Áko naa'nil binanit'a'í éí Daniel áyidííniid, Aláahgo naat'áanii shinanit'a'í nilíinii na'ałtso' doogo áádóó ni'iiłdlą́ą doogo niidiní'ánígíí binásdzid, háálá ashiiké ániid nidaakaii biláahgo t'óó naa hojoobá'í yíleełgo niidoołtsééł, áko niniinaa aláahgo naat'áanii bik'ehgo shitsiits'iin k'ídookał.

¹¹ Ákohgo naa'nil yaa áhályáanii jílį́įgo éí Daniel, Hananáíyah, Mísheiyel índa Azaráíyah baa áhojilyą́ą doo biniyé naa'nil binanit'a'í nihoníłtíinii Daniel áhodííniid,

¹² Háni'dii nanise' bił da'adáanii t'éí deiidą́ągo índa tó t'éí deiidlą́ągo neeznáá yiską́ąjį' ná nidaal'a'í niidlíinii haa daniit'ée doo nił bééhodoozįįł.

¹³ Áko nihí índa ashiiké ániid nidaakaii aláahgo naat'áanii bich'iyą' deiyáanii bił hanihidíísiłgo haa daniit'éego nił bééhodoozįįł áádóó nił bééhoozinii bik'ehgo ná nidaal'a'í niidlíinii ánihíł'į́į doo.

¹⁴ Ákódaaníigo hoł t'áá ííkoh áádóó hoł bééhodoozįįł biniyé neeznáá yiską́ąjį' ákójiilaa.

¹⁵ Neeznáá yiską́ąjį' ashiiké ániid nidaakaii t'áá ałtso aláahgo naat'áanii bich'iyą' deiyą́ągo nidaneelk'aaígíí biláahgo yá'ádajít'éehgo bił bééhoozin.

¹⁶ Ákohgo haa áhályáanii éí ch'iyáán áádóó wáin há nahjį' kóyiilaa, áko nanise' bił da'adáanii dajiyą́ą doogo haidiní'ą́.

¹⁷ Díí ashiiké ániid nidaakaii dį́lt'éhígíí éí ił ééhózin áádóó iichįįhgo óhoo'aah índa bee hódzáanii t'áá ałtso Diyin God beidiní'ą́, áko Daniel éí ił áhát'į́ índa na'iigeeł t'áá ałtso bik'izhdiyiitįįh.

¹⁸ Ákohgo t'áá ałtso aláahgo naat'áanii ts'ídá yah aho'di'doot'ishgo yee hooł'a'ii baa hoolzhiizhgo aláahgo naat'áanii Nébukadnézzar bidááhdę́ę́' naa'nil binanit'a'í nihoní'eezh.

¹⁹ Áádóó aláahgo naat'áanii bił ałch'į' hadadziisdzíí', áko Daniel, Hananáíyah, Mísheiyel áádóó Azaráíyah éí aláahgo naat'áanii bidááhdę́ę́' nidzizį́įgo ániid nidaakaii bitahdóó ts'ídá t'áadoo hógi ádaat'éhí da lá. Éí bąą nidajil'a' doo biniyé aláahgo naat'áanii bidááhdóó dadziizį'go bá dazdees'a'.

²⁰ Áko hódzą́ áádóó ak'idi'yiitįįh t'áá ałtso aláahgo naat'áanii hazhó'ó yínahódíłkidgo álílee k'ehgo ída'ooł'įįłii índa déest'į́į́' ádeił'íinii aláahgo bee hóhólníihgo bił haz'ą́ą́dę́ę́' nidahaaskaígíí t'áá ałtso biláahgo neeznáadi ahą́ą́h nániiláago yá'át'éehgo ak'idazhdiitánígíí bił bééhoozin.

²¹ Áko Sáíras aláahgo naat'áanii náádoodleełii átsé baa yíhááh biná Daniel nijil'a' nít'éé'.