ACTS 1 - Navajo Bible

Níłch'i Diyinii bee nihoot'ą́

¹ Thiyáfilas yinílyéii, ts'ídá áłtséedi Jesus yaa naayáhígíí áádóó yee na'neeztą́'ígíí naaltsoos áłtséhígíí bikáá' íishłaa

² áádóó wóshdę́ę́' dadool'aałii bitadziizlá'ígíí bee hodzis'áanii Níłch'i Diyinii bee baazhdiní'ą́ áádóó índa yá'ąąshgóó aho'dooltį́įjį', éí t'áá ałtso naaltsoos bikáá' íishłaa.

³ Áko ti'hodzooznii'dóó dízdiin yiską́ąjį' hódahooł'aahii bich'į' yit'íní ánízh'diil'įįhgo, t'áá aaníí jiináago bee bééhózinii lą'ídi bee bich'į' ízh'diilyaa, áádóó Diyin God bee bóhólníihgo bił haz'áanii baa yájíłti'.

⁴ Bił nidzíiztą́ągo hach'į' haadzíi'go áhodííniid, T'ááká Jerúsalem bits'ą́ąjį' dah doohkááh yíila', nidi aTaa' eidiní'ánígíí biba' ádanoht'ée dooleeł, éí bee nihił hweeshne'go dasidoots'ą́ą́'.

⁵ Háálá John éí t'áá aaníí tó yee asį́į́h nít'éé', nidi kodóó t'áadoo lą'í yiłkaahí Níłch'i Diyinii bee nihidi'doolzįh.

Jesus yá'ąąshgóó anáádzá

⁶ Hódahooł'aahii ahíikaigo, nidahódééłkidgo ádadííniid, Bóhólníihii, da' k'adísh Ízrel bee bóhólníihgo bił haz'áanii bá hasht'éédíídlííł?

⁷ Áko ábizhdííniid, Ałkéé' bee dahwéelzhíishii índa dayíłkaahii nihił béédahózin doogo doo nihaa deet'ą́ą da, éíyee' aTaa' t'áá bí bee bóhólníihgo yee nihoní'ą́.

⁸ Nidi nihí Níłch'i Diyinii nihik'i hoole'go bee adziilii nihee dahodooleeł, áko Jerúsalemgi, índa Judíyagi t'áá át'éé nít'éé' áádóó Samériyagi, índa nahasdzáán nidanees'ą́ą́góó shá dahołne' dooleeł.

⁹ Áko díidí yee hahaasdzíi'go t'áá dazhníł'į́įgo, dego dah bi'diiltį́ áádóó k'os biyaa aaldohgo bee doo yit'į́į da silį́į́'.

¹⁰ De hooleełgo yá biyi' góde hazhó'ó dazdéez'į́į́' nít'éé', jó'akon, diné naaki algaigo hadít'éego hwíighahgi yiizį',

¹¹ áko áhodííniid, Gáliliidóó hastóí danohłíinii, ha'át'íísh biniyé yá biyi' góde dasídóo'į́į'go nisoozį́? Díí Jesus nihits'ą́ą́' yá'ąąsh góde abi'dooltínígíí, t'áá yá'ąąsh góde hooleełgo daołtsánígi át'éego nínáádoodááł.

Júdas yitsásk'ehjį' ííyáii

¹² Áádóó Dził Álivet hoolyéhídóó Jerúsalemjį' níjíkai, éí Jerúsalemdóó áyídíyee' háá'áyį́į́h jį́ na'adáhígi ánízah.

¹³ Ákwii níjíkaigo, ná'ádeídi nidzíiztání góne' yah aníjookai, éí díí ádaat'į́, Peter áádóó John áádóó James áádóó Andrew, Philip áádóó Thomas, Barthálemew áádóó Matthew, James éidí Alfíyas biye', áádóó Sáíman Zélat yolyéhígíí índa Júdas éí James yił háá'áázh nilínígíí.

¹⁴ Díí t'áá ádzíłtso aheełt'éego nitsídadzikeesgo, Jesus bimá Mary áádóó sáanii náádaała', índa Jesus bitsilíké éí bił t'áadoo ádahozdiilzéhí sodazdilzingo hoolzhish.

¹⁵ Áko ákwii neiłka' yę́ędą́ą́' ałk'isóó danilíinii (t'ááłáhídi neeznádiindóó ba'aan naadiin daats'í yilt'é áłah silį́į'go), biníi'gi Peter yiizį'go ání,

¹⁶ Shik'isóó, Júdas éí Jesus dayiiłtsoodii bá hojoo'į́įgo jiní'eezhígíí, éí Níłch'i Diyinii t'áá átséedi David binahjį' Diyin God bizaad bee ak'e'ashchíinii yee yaa ch'íhoní'áanii ts'ídá bohodoolnííł biniyé ádzaa.

¹⁷ Háálá Júdas éí hoł nihi'déélta', díidí Jesus bá nideiil'a'ígíí łahjį' ałdó' haa deet'ą́ą́ nít'éé'.

¹⁸ Éí Júdas doo ákǫ́ǫ́ áát'įįdii bik'é bich'į' naalyáii yee kéyah nayiisnii'; ákwii bitsii' ha'yaago, hadáágo'go biníí' gónaa yisdoh, áádóó bich'íí' t'áá át'é hááłhęęzh.

¹⁹ Áko Jerúsalemgi kéédahat'íinii t'áá ałtso bił béédahoozingo biniinaa t'áá bí dabizaadígíí bik'ehgo éí kéyah Akéldama hoosye', éí kéyah diłii jiníigo óolyé.

²⁰ Háálá naaltsoos Sin yolyéhígíí biyi' bee bik'e'ashchį́, Bíni'dii bighangi doo naagháhí da doo, índa doo ła' yii' kééhat'íní da doo. Áádóó, Bee bóhólnííh nít'é'ígi náánáła' hatsásk'ehjį' anáádoodááł.

²¹ Éí biniinaa diné ła' náho'didooltééł. Bóhólníihii Jesus nihitah naaghá yę́ędą́ą́' t'áá nihił tázhdookaígíí éí

²² John tó yee asį́į́h yę́ędóó wóshdę́ę́' nihits'ą́ą́' Jesus dego abi'dooltį́ bijį́įjį' nihił tázhdidookah biniyé ła' náho'didooltééł, áko Jesus daaztsą́ą́dę́ę́' náábi'diilzáhígíí nihitahdóó atah baa hojilne' doo.

²³ Áko naaki nídazhdiinil, Jóseph éí Barsábas yolyéego akéédę́ę́' bízhi'ígíí éí Jústas yolyé, áádóó Matháíyas ałdó'.

²⁴ Áádóó sodazdilzingo ádazhdííniid, Bóhólníihii nílíinii, diné t'áá ałtso bijéí ádaat'éegi nił bééhózin, áko díí diné nidilt'éego, háidíígíí nídiniłtį́ nihił bééhonísįįh,

²⁵ áko éí Júdas t'áá bí bá haz'ą́ąjį' dah didoogáałgo díí naanish bich'į' danihi'dool'aadígíí yits'ąą ádił asiihii bitsásk'ehjį' azhdoogááł.

²⁶ Áko nídidooltéełii biniyé yáá'iilt'e' ádajiilaa, nít'éé' Matháíyas nídiiltį́, áko éí daal'aadii ła'ts'áadahígíí bił ho'déélta'.