Tito 3 - Northern Tepehuan Bible

Pabora aagai ix dukatai gï agai xi óídakagi buaboitudadami

¹ Aapi Tito, maakañi ñoki go buaboitudadami ami Kretana ixdukatai gï agai xi óídakagi ïgai. Tadu mai tïgito ïgai sai gï agai xi xadutuadagi gubukadagai bipiakami kïïga ïïgiditai ïgai. Gï agai xi kïïga abokan dukai ibuadagi aaduindagai ixtumaxi ïr soiñi tudu.

² Maiti gï agai ïmo buaboitudadami xi galnaaxi ñoki aagiadagi tomarhi ïmadutai tomarhi xi gabupui ñokidaragakagi. Gï agai bhaiyoma xi kïï tuigakagi ïgai bïïxi óídakami bïïtarï dai mai xu xi ïmo gïdukami gï ïrhiadagi ïïgi.

³ Daiñi, maiti gï agai xi soi dukai nïijada aatïmï go jaa ix makïdï mai buaboitudai. Aatïmï ïpï maiti ïr buaboitudadamikana ïkioma tudu dai ïpïan tutiakana aatïmï ïgai dai ïpïamaaxi ibuadana. Aidï mai ïïgidiña aatïmï Diuxi dai buaboitudaiña aatïmï ixtumaxi ïr yaatagi. Mai bhaigakana aatïmï xi dagitoagi go soimaaxkami ix makïdï ibuada ïrhidiña aatïmï gaagaitai ïmo bhai ïrhiaragai. Aidï ïjïgakoitïrïkana aatïmï dai gïr kïïdaiña aatïmï aipakoga. Pomaaxi tutiakana aatïmï mai kia buaboitudakai tudu.

^4-5 Dïï gia Diuxi kïïgakïrï gïr bubaitu dai podukai maaxitu bïïxi óídakami buitapi xïï kïï tuiga ïgai dai xïï kïïga gïr oigïdai. Ïgai tudu kïïgakïrï ïr gïr bubiadamiga. Dai mai xu xi kïïga idui aatïmï xi kïïgakïrï gïr bubaitu ïgai. Mai buañixikatadai gïr iibhïdaga toma lïïchi tudu. Dïï bïïxkïrï soi gïlda gïr tïï Diuxi dai gïr buañidi dai kïïgakïrï gïr bubaitu. Dai aidï gïr buañidakai ïgai gïr utuduturhi Diuxi Ibhïadï.

⁶ Kaxkïdï tudu Diuxi gïr maa Ibhïadï buaboitudakai aatïmï Suxi Kristo gïr kïïgakïrï bubiadamiga.

⁷ Aidï ïr soimaaxi ibuadamikana aatïmï dai maiti ïr gïr ajïakamikatadai xi kïï tuigakagi Diuxi gïr bïïtarï dïï bïïxkïrï buañixikami gïr aa ïgai. Podui ïgai saidi ïr maamaradïkana aatïmï dai sai bhïna aatïmï ixtumaxi bia ïgai gïr bïïtarï. Dai xibi nïnïraka aatïmï ixtumaxi bia ïgai gïr bïïtarï maatïkatai sai bïïxkïrï bïïtarï óídaka ragai.

⁸ Idi ñoki ix makïdï gï ojidi aanï kïïga ïr buaboi. Kaxkïdï gï agai xi mai duadikuitai gamaakada aapi aatagi aagaitai gobai. Podukai soiñamu aapi go ix makïdï buaboitudai Diuxi sai tïgito ajiopada ïgai ix dukatai kïïga ibuadagi. Idi ñoki ix makïdï gï ojidi aanï kïïga ïr soiñi bïïxi óídakami bïïtarï tudu.

⁹ Dïï gia oidaga ïïmo odami ix makïdï dudatai gïn bupui ñokaiña aagaitai ix tïtïgidutadai ïïki óídakami dai aagaitai sa xorai ïr piipixaradï ïgai. Dai gïn bupui ñokaiña ïgai aagaitai ix kaiti go judidiu sïïrhikamigadï ïpï. Maiti gï bapasïda aapi pomaaxi aatagiïrï. Maiti ïr soiñi gobai.

¹⁰ Aapi Tito, kïïga gï tïgito nïida ix makïdï gï urapïkïi gï aaduindagïrï. Dai ix oidakagi xorai gatïtïïgiadagi aatagi ix makïdï maiti ïr buaboi dai podukai ïjïkobai darasadan buadagi go buaboitudadami gï agai xi daidagi aapi. Gï agai xi aagidagi sai ix apia oijadagi ïgai gïpiïrï gïximu. Bhaiga aapi xi asta gokoakoga podukai maakadagi ñoki ix makïdï pomaaxi ibuadagi. Dïï gia ix mai ïïgiadagi ïgai gï ñoki aidï gia ka mai uurapïkïda aapi.

¹¹ Kïïga gï maatï tudu sai ka maiti ipïrhi ïgai xi buaboitudagi ixtumaxi ïr buaboi dai xibi apia adaimïi ïgai soimaaxkami kïï maatïkatai sai soimaaxi ibuayi. Kaxkïdï ka maiti uurapïkïda aapi.

Pabora kugaitu ojadï dai otoxi ïmo biatuldaragai go Tito ïmadï go gaa buaboitudadami ami Kretana óídakami

¹² Ipïrhidi aanï xi Nikopolixiana daibuñagi go toomoko dai ipïrhidi aanï xi gin ïmadï dakagi aapi ïpï. Kaxkïdï otosamu aanï go Artemas xiïpï go Tikiko amïka xako daja aapi Kretana. Dai mos aïkai ïgai pai otoma imïda Nikopolixiamu sai ami daibuña aatïmï go toomoko.

¹³ Ami Kretana daraka goka kïkïïrhi Apolos dai Zenas tïtïgidukami. Go Zenas ïr ïmoko ix makïdï soikïiña odami dudunukamiïrï. Ñokiturhiña go odami dudunukami buidïrï tudu. Kïïga soikïda aapi go Apolos dai Zenas asta xako ukami ixtutiadagi aapi. Dai xïxkadï imïda aagadagi ïgai mïkadïrï gï agai xi maakadagi aapi ixtumaxi tïgitokagi ïgai sai mai biïgakagi ixtumaxi imidadïrï bïïtarï.

¹⁴ Pobuadatai tïïgidamu aapi go gaa ix dukatai gï agai xi buidadagi buaboitudadami. Gï agai tudu xi gïr aaduñi ix makïdï gïr uurapïkïi ami Kretana ïïmadadagi xi soikïdadagi jaa xïïxkadï kabami tïgitokagi. Podukai ïïmadadamu ïgai xi kïïga ibuadagi. Ix pobuadagi ïgai aidï gia kïïga ïr soiñikamu ïgai.

¹⁵ Diuxkïdï gï biaturhi bïïxkatai ix makïdï gin ïmadï daraka. Dai Diuxkïdï biatulda aapi gïr aaduñi amïka ïpï ix makïdï buaboitudai. Daanïi aanï Diuxi sai kïï tuigakana ïgai bïïxkatai aapimï gïn bïïtarï. Mosïkaxi.