Numeros 21 - Northern Tepehuan Bible

⁴ Bhodïrï go Israelitas bubuaka Hor tubidakiañdïrï dai iji gïï sudagi amakoga ix makïdï Bïgikïdï tïgidu. Xikorhi dïgabusai ïgai xako Edomïrï tïgidu mai bapakia ïrhiditai ami. Boiyamu iimïitadai dai ka ojorhi ïgai imidagai.

⁵ Dai kaxi gïn aaga bui ñiño ïgai Moises ïmadï Gïr Nukadakami, —¿Tuixidï gïr bubaitu aapimï Ejiptuañdïrï?— ikaitimi. —¿Gïr koda mïx ïrhidi tanai oidigana dai gïr baidati? Tami mai tipu sudagi dai tomarhi ixtuma ugiagi aatïmï. Idi kuadagai arhiïxi soi maaxi ix makïdï gïr maakai Diuxi. Ka ojorhi aatïmï bïïx tasai kuadatai aatïmï bapaiborhi ïmadï go tojakïdï kuadagai— ikaitimi ïgai.

⁶ Dai Gïr Nukadakami otoi kookoyi ix makïdï mukiga kïkïidï dai mui koi go Israelitas kïkïidïkïdï.

⁷ Kaxkïdï go Israelitas mïï aagidi Moises, —Kaxi aatï gïïpi soi maaxi idui aatïmï aidïxi bui ñiñokai aatïmï Gïr Nukadakami dai aapi ïpï. Daañiñi Gïr Nukadakami xi maigobai imitudagi ïgai go kookoyi— ikaiti go Israelitas. Dai go Moises daanïi Gïr Nukadakami xi oigïldana go Israelitas soimaaxkamigadï.

⁸ Dai Gïr Nukadakami itïtïdai go Moises, —Duñiñi ïmo kooyi ïpïamaaxkami go ix makïdï mukiga kïidï dai ïmo bandera uxiaradïana xixa baida xorai biakagi ïmo kooyi kïidï dai nïijadagi go uxiana kooyi ka kïïgakïrï busaimu dai ka mai mukimu mos nïidakai— ikaiti Gïr Nukadakami.

⁹ Daidi podui go Moises. Idui ïgai ïmo kooyi bhronsekïdï dai ïmo bandera uxiaradïana xixa. Dai xorai biakagi kooyi kïidï mosïkaxi gï agaitadai xi nïñiada ïgai go bhronsekïdï kooyi dai ka kïïgakïrï bubuakïna.