Markos 7 - Northern Tepehuan Bible

Suxi aagai ixdukatai gï tukurhiadan buayi odami iibïadï

¹ Dai Jerusalenañdïrï dada fariseos ïmadï mamaatïtuldiadami sïïrhikami dai gïn ïmpagi ïgai xako dajatadai Suxi.

² Dai gïn tïgito tïï ïgai xi ïïmo mamaatïrdamigadï Suxi maiti gïn iikomaiña ix dukai gïn biturhi ïgai xudu gaugia aagadagi.

³ Go fariseo ïmadï bïïxkatai go gaa judidiu bïïxkïrï gïn iikomaiña ïmo xadutudaragai dukai xudu gaugia agadagi ïgai, podukai gïn biturhi kïkïrhiodami ïïki.

⁴ Kaxkïdï xudu dadiagi ïgai plasañdïrï biakana xi kïïga gïn iikomakagi ïpïgioma ix duu gïn biturhi ïgai dai gokiïrï gaugiagi. Dai ïkobïrako naana maaxi bamioma gïn biturhi ïgai, dukami biakana ïgai ixdukatai gï agaitadai xi bakuanadagi gïn ajasokorhi danï gïn ajaa danï gïn papaiñomi idorakaru ïpï.

⁵ Daidi go fariseo ïmadï maatïtuldiadami sïïrhikami bui ño go Suxi daidi potïtïdai, —¿Ix tuixidï gï mamaatïrdamiga mai xadutudai bituldaradï go kïkïrhiodami? Mos apia dukai gakuayi ïgai mai kia gïn iikomakai noonobidï— itïtïdai.

⁶ Taidi go Suxi potïtïdai, —Aapimï aagai ïmo ixtumaxi dai ïma maaxi ibuayi. Aapimï gïn agaitadai go Isaias ïïki tudu. Ïgai oja sai Diuxi ikaiti, —Gin xadutuadan kaiti aapimï dïï mos gajiadïrï bïïtï gïn tïgibudaga, ikaiti Diuxi. Daiñi, ikaiti. Aapimï pokaitiña sai gïn bituldaraga ïr aanï gin tïgibudaga dïï aanï aagai saidi ïr ïïgi odami tïgibudadï gobai bhaiyoma.

⁷ Bamioma abïnakidi aapimï odami bai buaboitudaiña kïkïrhiodami aatagadï dai aanï gin ñoki gajiadïrï bipiayi aapimï. Pokaiti aapimï xi aanï ïr gïdukami dïï modukai mai namïakan dukai nïidi aapimï gin ñoki. ¿Bhai ix ïr soiñi go tïgibudagai gobai? ikaiti Diuxi. Podukai tudu oja Isaias ïïki— itïtïdai Suxi.

⁸ Dai Suxi apia bhagaimi go fariseo ïmadï maatïtuldiadami sïïrhikami daidi potïtïdai, —Aapimï gajiadïrï biayi Diuxi ojadï sïïrhikami dïï gia ix makïdï odami gïn biturhi gobai gia kïïga gïn tïgitokatai ïïgidi aapimï— itïtïdai.

⁹ —Kïï sastudaga aapimï dagitoda bïïtarï Diuxi ojadï sïïrhikami mos ïïgida ïrhiditai ïïgi gïn bituldaraga.

¹⁰ Daiñi, ¿Maiti ix oja Moises ïïki sai, gï agai ix xadutuada ïmoko ogadï ïmadï dïïdï? Dai xorai soi maaxi ñokada ogadï bui xiïpï dïïdï bui gobai gï agai xi baan kïïsagi dunukamiïrï dai muagi, podukai oja Moises tudu— itïtïdai.

¹¹ —Potudu kaiti Diuxi ojadï sïïrhikami— itïtïdai Suxi —Dïï aapimï ïma dukai aagai. Aapimï pokaiti sai xorai mai maaki ïrhiada soiñi bïïtarï dïïdïdï mosïkaxi gï agai xi adukai tïiyagi sai, kaxi ïr korban bïïxi buxtuidadï. Sai ka maa ïgai Diuxi buxtuidadï tudu, ikaitiña aapimï.

¹² Dai aapimï pokaiti sai ix potïiyagi ïmoko ka mai bia ïgai xi maakiagi soiñi dïïdïdï bui.

¹³ Ka mai namïakami dukai biayi aapimï Diuxi ñokidï potïkai aapimï tudu dai ïïgi gïn bituldaragakïdï maakai aapimï ñoki. Dai jaa naana maaxi ibuayi aapimï podukai ïpï— itïtïdai Suxi.

¹⁴ Dai bhodïrï Suxi ïpamu bai go odami daidi itïtïdai, —Kïïga abïr tïgito kaï gin aatagi— itïtïdai.

¹⁵ —Daiñi, tomarhi ïmo kuadagai ix makïdï kuayi odami mai tukurhimadai iibïadï, dïï gia naana maaxi ix makïdï ïrabiadïrï odami ibhïadïañdïrï busakïi, dukami soi maaxi tïgibudagai maaxi dai soi maaxi aaduindagai maaxi, gobai gia tukurhimadai iibhïadï.

¹⁶ Kïïga abïr tïgito kaï idi aatagi— itïtïdai.

¹⁷ Bhodïrï kiiyïrï baa go Suxi dai go odami kidigamadïrï bii bai go mamaatïrdami gatïkakai go Suxi ix tïiya ïrhidi ïgai go maaxidaragai aatagikïdï.

^18-19 Dai Suxi potïtïdai, —¿Aapimï ïpï mïx mai maatï kaï? Daiñi, kuadagai ix makïdï kuayi odami mosïkaxi bokadïrï ukami ajïi dai bhodïrï maigobai busakïi ïpamu tukugadïañdïrï. Mai ajïi gobai ibhïgadïrï tudu. Kaxkïdï ¿Dukatai tukurhimadana gobai ibhïadï di?— itïtïdai. Pokaiti go Suxi dai podukai kaxi aagai ïgai sai tomarhi ïmo kuadagaikïdï maiti gïn tukuturïi odami iibhïadï.

²⁰ Dai Suxi potïtïdai ïpï, —Ix makïdï odami ïrabiadïrï busakïi ïgai dai tukurhimadai iibïadï,

²¹ ix makïdï iibïadïañdïrï busakïi tudu. Abhiadïrï busakïi naana maaxi soimaaxkami, dukami, soimaaxi tïgibudagai maaxi dai ïmadï boiyagi jaa oki dai ïïxidaragai, kodaragai, ïïxidaragai jaa oñigadï,

²² biaka ïrhiadagi ix makïdï ïr tuidadï ïmai, soi buidadagi jaa, yaatagidaragai, mukimudagai, ïgamudagai, naana kaitadagi, soi dukai nïijadagi jaa, dai naana maaxi buirudagai ïpï.

²³ Bïïxi go maaxi odami iibhïadï ïrabiadïrï busakïi dai gobai ïgai dai tukurhimadai iibhïadï odami— itïtïdai Suxi go mamaatïrdami.

Go Siropenixiañdïrï oidakami oki

²⁴ Taidi go Suxi jii abhiadïrï dai ayi miadïrï xako Tiroana tïgidu ïmo gïï bhaabhaki dai ami gï urhi ïgai ïmo kiiyïrï. Ipïrhiditadai ïgai xi odami mai maatiagi xi ami daja ïgai dïï mai tiputadai ixdukatai gï ïxtoagi ïgai. Otoma máí go odami tudu.

²⁵ Dai mos aïkai go Suxi tai ïmo oki kajioma dai ami dibia dai totonakïdï kïïkiba sonoana Suxi ïïkasodï. Dïïdï ïgai ïmo arhi tïji ix makïdï bia ïmo Diabora tïañikarudï.

²⁶ Dai Siropenixiañdïrï oidakami go oki dai ñokai griego ñokidï. Dai gï totonakïdï kïïkibakai daañimi ïgai go Suxi sai maradïañdïrï maigobai bubaidana go diabora tïañikarudï.

²⁷ Dïï mos go Suxi potïtïdai, —Dagitoñi kia xi gïn tataxkoñikagi go aarhi. Maiti gï agai ïïxiadagi bhiadї aarhi dai oidagi aarhi googoxi— itïtïdai.

²⁸ Daidi go oki potïtïdai aidï, —Buaboi aba ix dukai aagai aapi. Aatïmï ix makïdï griegokïdï ñokai googoxi gïr aagai ixtumaxi. Dïï mos bïïxkïrï go googoxi ix makïdï mesa uta bïïtïkana kuadana sasakigadï ix makïdï surhigaiña aarhi— itïtïdai.

²⁹ Taidi go Suxi potïtïdai, —Kïïga pïaagai— itïtïdai. —Xibi noragiñi gï kiiyamu. Arhiïxi kïïga gin aa noraidi aapi ñoki kaxkïdï xibi ka busai go Diabora tïañikarudï ix makïdï gï maara ïrana dajatadai— itïtïdai.

³⁰ Dai aidïxi ayi go oki kiiyïrï go maradï kaatïkatadai dai go Diabora tïañikarudï ka dagitotadai.

Suxi duadi ïmo kïïrhi mai tïkaidakami dai mudugami

³¹ Taidi go Suxi nora Tiroañdïrï. Sidoniamu sïïrhi daibusai ïgai dai sïïrhi daibusai xako Dekapolixiana tïgidu oidigi ïpï dai bhodïrï ayi ïgai go gïï sudagi Galilea tïgidukïdï.

³² Mïtai ami buapi ïmo kïïrhi mai tïkaidakami dai mudugami, dai daañimi ïgai go Suxi sai daama dasana gï nobi.

³³ Taidi go Suxi ïkobai baidaja go kokoadï xako ïjïgika ïgai dai bhodïrï naanakadï ïrana baapa gï mamaspiga dai xixibi dai nïnïdïana toidi gï xixibi.

³⁴ Dai tïbagiamu nïnïaba go Suxi dai sobhïbïi daidi potïtïdai, —Efata— itïtïdai. Gobai itïiya ïrhidi, gï kupiokoñi.

³⁵ Mos potïkai go Suxi tai duayi naanakadï go kokoadï dai nïnïdï gï moikatu dai ka kïïga ñokai bii.

³⁶ Taidi go Suxi arhiïxi dáí go odami sai mai aagidana tomarhi ïmadutai. Dïï mos ix xïïxi kabamioma daidimi ïgai go kaaki bamioma aipako aagaiña odami.

³⁷ Dai bïï mai tïtïgaiña odami ixdukatai gïn tïtïgitoagi daidi ikaitimi, —Bïïxi aïkatai kïïga ibuayi go Suxi. Asta ix makïdï mai tïtïkaidakana tïtïkaidatudai dai ix makïdï mumudu ñokitudai ïgai— ikaitiña odami.