Markos 5 - Northern Tepehuan Bible

Suxi duadi ïmo Gedarana oidakami ix makïdï biakana ïmo Diabora tïañikarudï

¹ Dai bhodïrï Suxi ïmadï mamaatïrdamigadï ayi basadïrï go gïï sudagi xako óídaga go Gedareno agaikïdï.

² Dai mos tïbanïkai go Suxi barkoañdïrï tai ami dibia ïmo kïïrhi biakami ïmo Diabora tïañikarudï. Tïtïjobiañdïrï busai ïgai xako yaasapi koidadï.

³ Ami tïjobiana oidakami ïgai dai tomaxi gïn aajagaiña ami miadïrï óídakami mai bhaigakana xi burhiagi tomarhi kadenakïdï.

⁴ Muiyoko bupuraiña odami kadenakïdï modukai noonobidï dai ïïkasodï dïï mos ïïkibudaiña ïgai bai mai tiputadai xorai ixtuidana xi dodorhi daasakagi.

⁵ Dai kamposantoana dai oidigana xako gigidaga aimïraiña ïgai dai iñakaiña modukai tasïrï dai tukarï. Dai ïïgi saasasaiña ïgai tukugadï ojodaikïdï.

⁶ Daidi tïïgakai ïgai go Suxi mïkaxdïrï mïï ïgai dai buidïrï gï totonakïdï kïkiba.

^7-8 Dai Suxi potïtïdai, —Aapi Diabora tïañikarudï dagitoñi idi kïïrhi— itïtïdai. Baidi go Diabora tïañikarudï gïïgïrï iñakitu go kïïrhi daidi potïtïdai, —¿Tui pïxi dibia aapi Suxi tami xako aimïrai aanï? Aapi ïr maradï Diuxi ix makïdï bïïxi adama ïr gïïdukïdï. Gï daanïi aanï gïr nïiditai Diuxi pïxi maiti gin soi duada— itïtïdai.

⁹ Daidi potïtïdai Suxi go Diabora tïañikarudï, —¿Tïgidu aapi?— itïtïdai. Tai ïgai potïtïdai, —Legion antïïgidu aanï— itïtïdai. —Muidu aatïmï kaxkïdï po tïtïïgidu aatïmï— itïtïdai.

¹⁰ Daidi go Diabora tïtïañikarudï daañimi go Suxi sai mai otosana maigobai.

¹¹ Bai no mianai gidana gukatadai mui tataixorhi daidi gakuadatadai.

¹² Taidi go Diabora tïtïañikarudï gatai oigaragai go Suxi daidi potïtïdai, —Gïr dagitoñi tïtai bapakïna aatïmï go tataixorhiïrï— itïtïdai.

¹³ Dai Suxi maa oigaragai go Diabora tïtïañikarudï dai kïïrhiañdïrï bubuaja dai xibi go tataixorhi ïrana baapa. Goka mirhikatadai go tataixorhi dai mos baapa go Diabora tïtïañikarudï tai koidamu boopoi go tataixorhi dai gïï sudaïrï surhi dai bhaikoi.

¹⁴ Taidi go nukadakami tataixorhi boopoi dai mïï aagidi óídakami ix makïdï go gïï kiikiïrï óídaga ïmadï ix makïdï mïïmïkaxi óídaga ïpï. Tai mïï dada odami dai nïida agai ix tumaxi pogïduitadai.

¹⁵ Dai aidïxi ayi ïgai ami xako dajatadai go Suxi tai tïï ïgai go kïïrhi ix makïdï ïgiañdïrï bubuakatadai go Diabora tïtïañikarudï dai xibi ka kïï bhïitadai ïgai tïgibudagai dai ka dodorhi daja dai kïï yukusu. Taidi go odami arhiï duduadimu.

¹⁶ Dai ix makïdï ïr nïijadami ixdukatai pogïduitadai go kïïrhikïdï dai go tataixorhikïdï bïï aagidi go gaa.

¹⁷ Taidi go odami guguama oi go Suxi sai imïna abhiadïrï.

¹⁸ Dai Suxi ïpamu ayi xako kïïka go barko dai ïpan tïsai baidi go kïïrhi xajadïrï bubuajatadai Diabora tïtïañikaru daañimi go Suxi sai dagitona ix oidagi.

¹⁹ Dïï go Suxi mai maa oigaragai. Bhaiyoma potïtïdai ïgai, —Imïdañi gï kiiyamu xako daraja gï aaduñi daidi aagida xïï kïïga gï buididi aanï soi gin ïrhiditai gï nïiditai. Dai aagida xi aanï ïr gï Nukadakami— itïtïdai Suxi.

²⁰ Taidi jii go kïïrhi dai mïï aiturhi ñoki bïïxi óídakami Dekapolixiana dai aagidi bïïxi ixdukatai duñi Suxi bai bïïxkatai mai tïtïïgaitadai ixdukatai gïn tïtïïgitoagi kaïkai aatagidï go kïïrhi.

Ïmo kïïrhi Jairo tïgidukami daanïi Suxi sai duadana maradï

²¹ Dai jii go Suxi abhiadïrï dai mos ayi ïgai mïï basadïrï go gïï sudagi tai ami dada mui odami. Taidi go Suxi mo baaxi sudagi ugidïrï ukami bii.

²² Tai amaxi ami dibia ïmo kïïrhi Jairo tïgidukami. Ïgai ïr gubukadagai biakami ïmo kiupaigadïrï judidiu. Dai mos tïïgakai ïgai go Suxi gï totonakïdï kïïkiba go Suxi ïïkasodï abhana.

²³ Dai sïïrhikïdï daañimi ïgai go Suxi, —Gin maara oki karhioga mukimi. Gin oigïdakai mïï daama darasa aapi gï noonobi bai duadïna xi mai mukiagi ïgai— itïtïdai go Jairo.

²⁴ Taidi go Suxi oi go Jairo. Dai jaa odami oi ïpï dai ka mos nïituskimi ïgai go Suxi mos ïï muidukatai.

Suxi duadi ïmo oki

²⁵ Daidi go odami saagida imïitadai ïmo oki ix makïdï ka bhaibuxtama dan goka umigi abhiadïrï kokokatadai ïradïkïdï.

²⁶ Dai arhiï soi gï ïrhi ïgai mos ïï mui duduadadami ïmadï imïkai dai moduu mai duayi. Ka bïï xia dodai ïgai tuminxigadï dai moduu maiti idui soiñi, mos baamuimi bhaiyoma.

^27-28 Dai kajioma go oki xi Suxi gaduadidiña kokokoñiadï daidi poïrhidi, —Tomaxi mosïkaxi yukuxidï taata aanï kaxkïdï ka gin duadi antaada aanï— gï ïrhidi ïgai. Dai miadïrï kïkiba ïgai go Suxi odami saagida dai gokiamadïrï taata yukuxidï.

²⁹ Mos taata ïgai tai uu ïradï dai otoma maatï taata ïgai ix ka maigo jii kokodagai.

³⁰ Taidi go Suxi máí ix duadi ïgai ïmadutai gï gubukadakïdï dai aa kïkiba odami saagida kïakatai daidi ikaiti, —¿Borai taata gin yukuxi?— ikaiti.

³¹ Taidi go mamaatïrdamigadï potïtïdai, —Maiti ix aipadïrï gï nïituskïi odami di. ¿Dukatai gatïkakai aapi sa xorai gï taata?— itïtïdai.

³² Daidi go Suxi aipako nïjimi dai nïida agai xorai ïgai dai taata.

³³ Baidi go oki kïï maatïkatadai ixdukatai pogïduitadai ïgaikïdï dai duadimu ïgai dai mïï totonakïdï kïkiba buidïrï go Suxi dai aagidi bïïxi ixdukatai pogïdui.

³⁴ Taidi Suxi potïtïdai go oki, —Sogigi aapi— itïtïdai. —Gin buaboitu aapi kaxkïdï duayi. Xibi imïdañi dai mai buamï ïrhiatuda, ka maiti gï oidamu ïpamu go kokodagai— itïtïdai Suxi go oki.

Suxi duakaturhi Jairo maradï oki

³⁵ Dai kia ñokai go Suxi tai dada ojotoxikami kiidañdïrï Jairo daidi potïtïdai ïgai go Jairo, —Kaxi ti muu gï maara— itïtïdai. —Ka mai tipu ixtukïdï soi gï buada go Suxi dai gamo imiagi— itïtïdai go ojotoxikami.

³⁶ Dai Suxi kaï ix kaiti go ojotoxikami dïï mai ïïgidi ñokidï ïgai. Bhaiyoma potïtïdai ïgai go Jairo, go ix makïdï ïr gubukadagai biakami judidiu kiupaigadïrï tudu, —Maiti duadikuda, mos sai gin buaboituda— itïtïdai. Dai bhodïrï Suxi ka ïpamu bhïiyi boi Jairo kiidamu.

³⁷ Daidi go Suxi mai dagito go odami xi oijadagi, mosïkaxi go Piduru dai Jakobo daidi go Juan. Go Juan ïr sukurhidï Jakobo.

³⁸ Dai mïï aïkai ïgai go gubukadagai biakami kiidïrï, kaï ïgai go odami bai xia kaiti, gïïgïrï suanïi ïgai dai iiñakai.

³⁹ Taidi go Suxi baa daidi potïtïdai go odami, —¿Tuimïxi mos ïï xixiokai dai mos gïïgïrï suanïi? Go arhi oki maiti ïr mukiadï, mos gakoso— itïtïdai go Suxi.

⁴⁰ Baidi go odami mos parunai potïkai go Suxi. Kïï maatï ïgai xi ïr mukiadï go arhi oki. Taidi go Suxi bïïxi bubaitu odami abhiadïrï. Mosïkaxi go arhi oki dïïdïdï dagito ïgai ix bapakiagi ïmadï go kïkïïrhi ix makïdï baidatikatadai ïgai. Dai baapa ïgai xako kaatï go mukiadï.

⁴¹ Taidi go Suxi nobiañdïrï bhïiyi daidi itïtïdai, —Talita kumi— itïtïdai. Gobai itïiya ïrhidi, bañigiñi aapi arhi oki.

⁴² Tai otoma bañi go arhi oki dai no aimïrai. Bhaibuxtama dan goka umigi biakatadai ïgai. Taidi go odami mai tïtïgaitadai ixdukatai gïn tïtïgitoagi.

⁴³ Taidi go Suxi sïïrhikïdï dáí go odami ix aagada go maaxi. Dai bhodïrï gatïjai mïxi bhidagi go arhi oki.