Markos 14 - Northern Tepehuan Bible

Go gubukadagai bipiakami gaagai ix dukatai muagi go Suxi

¹ Bhodïrï ka miadaimitadai go bagimi daibundigïrï tïgidukïdï. Aidï bagimiïrï go judidiu kuayi pan mai kopodakami. Kaxi mos arhi goka tasai biïgatadai ix aiyagi go bagimi. Dai go tïtïanïdamigadï go daxdadami ïmadï go maatïtuldiadami sïïrhikami gaagaimitadai ixdukatai yaatagidakai bhïiyagi go Suxi dai muagi.

² Daidi ikaitiña ïgai aidï, —Bhaiyoma daibunukai go xia dudagai bhïimu aatïmï bai mai bakoikagi odami gïr bui— ikaiti ïgai.

Ïmo oki toidi perfume Suxi modï

³ Dai Suxi Betaniana dakatadai kiidïrï ïmo kïïrhi Ximuñi tïgidukami. Go Ximuñi biakana go kokodagai lepra agaikïdï dïï mos xibi ka duayi ïgai. Dai mesa buidïrï dajatadai go Suxi daidi gakuayi bai ami dibia ïmo oki. Bhïkati ïgai ïmo tukayu kïï namïakami dai sudakami perfume kïï namïakami ïpï. Nardo tïgidu go perfume. Dai murhi ïgai go tukayu kugadï dai Suxi modïana toi go perfume.

⁴ Dai ami kiiyïrï darajatadai jaa odami ïpï tai ïgai bhaakoi go oki bui daidi ikaitimi aipako, —¿Ix tuixidï mos ïgikïdï xia buayi gobai go perfume?

⁵ Bhaiyoma gagaaramudai gobai dai ïgaikïdï soiñamudai soititigami. Ïmo umigi aïkami maitïkidï namïga gobai di— ikaitimi go odami dai mos bhagaimi go oki.

⁶ Dïï mos go Suxi potïtïdai aidï, —Dagito bïrai. Maiti abïr ñokada. Xigiamaaxi gobai ix makïdï in duñi gobai— itïtïdai.

⁷ —Daiñi, go soi titiigami toma xïxkadï oidakamu gïn saagida di. Dai kïï bhaiga aapimï xi soikïdagi ïgai mïx xïïxkadï ipïrhiadagi. Dïï aanï gia mai xii tïbïpi dakamu kia gïn ïmadï— itïtïdai.

⁸ —Dïï idi oki gia in duindi xïïxi ixtui ïgai. Kaxi in toi ïgai perfume ïkiaxdïrï bhaiduñaragai gin tukuga yaasaragai bïïtarï. Ka miadaimi xïxkadï mukia iñagai kaxkïdï.

⁹ Dai aanï aagai sai bïïxi oidigi daama xako gï aagadagi Diuxi ñokidi bhai ïrhiarakami sai ami gï aagada agai idi oki ixtumaxi in duñi— itïtïdai aidï Suxi go odami.

Go Udaxi gatïïgida agai go Suxi dudunukamiïrï

¹⁰ Bhodïrï go kïïrhi Udaxi Iskariote tïgidukïdï dai ix makïdï ïr ïmadutai go bhaibuxtama dan goka mamaatïrdami, jii dai mïï aataga ïmadï tïtïanïdamigadï go daxdadami. Aagidi ïgai sai tïïgida agai go Suxi.

¹¹ Daidi go tïtïanïdami bhai gïn ïrhi kaïkai aatagidï. Dai aagai sai oida agai tuminxi xudu gïn tïïgidagi ïgai go Suxi. Daidi abhiadïrï go Udaxi kaxi gï aagakai gaa ixdukatai tïïgidagi go Suxi.

Suxi gauu daibundigïrï bagimi kuadagadï ïmadï go mamaatïrdami

¹² Bhodïrï ayi go Daibundigïrï bagimi. Daidi go mamaatïrdamigadï Suxi potïtïdai, —¿Bako ipïrhidi aapi tïx bhai duñagi kuadagai pai kuada aapi xibi daibundigïrï?— itïtïdai.

¹³ Taidi Suxi otoi goka gï mamaatïrdamiga dai potïtïdai, —Iimibïrai Jerusalenamu. Ami tïïgimu aapimï ïmo kïïrhi bai modïana baigïtika agai ïmo ayi sudagi. Bïrai oida dai ayi kiiyana xako aiyagi ïgai.

¹⁴ Ayimu ïgai ïmo baaki dai baakïkai ïgai bïrai ami tïda go oidakami sai, —Gïr maatïtuldiadami gaagai ïmo tukabi xako ugiagi go daibundigïrï kuadagai gïr ïmadï— abïr tïda.

¹⁵ —Dai gïn tïïgidamu ïgai ïmo tukabi gïdukami gokoadaama kiiyïrï tïkabiakoga. Ami ka biakamu ïgai bïïxi ixtumaxi gï agadagi, bïrai ami bhai duñi kuadagai— itïtïdai aidï Suxi.

¹⁶ Tai iji ï goka mamaatïrdami Jerusalenamu dai bïïxi tïï ixdukatai agaitadai go Suxi. Dai ami bhai dui ïgai go kuadagai daibundigïrï bïïtarï.

Suxi aagai xorai ïgai dai gatïïgida agai

¹⁷ Bhodïrï ka didia xi ayi go Suxi ïmadï go gaa mamaatïrdami.

¹⁸ Dai ka mesa buidïrï daraja ïgai dai Suxi potïtïdai, —Gïn aagidamu aanï ïmo ixtumaxi dai buaboi aagai aanï— itïtïdai. —Ïmadutai aapimï ix makïdï gin ïmadï gakuayi gin tïïgida agai dudunukami xi ïgai gin muamu— itïtïdai.

¹⁹ Dai kabami soi gïn ïldatu go mamaatïrdami daidi gatïkakaimi go Suxi, —¿Aanï xi ïgai ïpï dai gï tïïgida agai?— ikaitimi bïïxkatai.

²⁰ Dai Suxi potïtïdai aidï, —Bhaibuxtama dan gokadu aapimï dai gin ïmadï gakuayi dïï makïdï gabaagai pan idi baaxi asokorhiïrï gin ïmadï abïr ïgai dai gatïïgida agai— itïtïdai.

²¹ —Daiñi aanï ïr Diuxi otosadï ix makïdï aagai Diuxi ïïki dai gï aagai xi jaa gin duiñdagi ix duu ojixi ïïki. Gï aagai ix mukiagi aanï. Dïï gia sogigi go ix makïdï gin tïïgida agai. Gïïpi biakamu ïgai soi ïrhiaragai. Xioma ïr kïïgaitadai ïgai bïïtarï ix mai busaimudai ïgai oidigi daama— itïtïdai Suxi.

²² Bhodïrï aidïxi gakuadatadai ïgai tai Suxi bhïiyi pan dai aagai xïï bhaigïrhidi Diuxikïdï gïn urhiñakai go pan. Dai bhodïrï saasasakai maa go mamaatïrdami daidi potïtïdai, —Ugabïrai, idi ïr gin tukuga gï dukami— itïtïdai.

²³ Dai bhodïrï bhïiyi ïgai ïmo arhi baso biakami bino dai aagai xïï bhaigïrhidi Diuxikïdï gïn urhiñakai gobai. Dai maa ïgai go mamaatïrdami dai bïïxkatai ii.

²⁴ Dai Suxi potïtïdai, —Idi bino ïr gin ïra dukami ix makïdï gï aaxta agai mukukai aanï mui odami bïïtarï. Gin ïrakïdï namïakan duu biïyi go ñoki utudukami ix makïdï bhai buayi Diuxi odami ïmadï.

²⁵ Dai xibi ka mai yïïdamu aanï bino asta xïïxkadï bhïiyi aanï gin sïïrhikamiga ix makïdï gin maa Diuxi. Aidï gia gayïdamu aanï bino utudui— itïtïdai Suxi go mamaatïrdami.

²⁶ Bhodïrï ganïyi ïgai bïïxkatai ïmo nïidagai dai iji maigobai gidamu xako Olibo tïgidu gidi.

Piduru aagai sai mai dagito agai ïgai go Suxi

²⁷ Dai ami gidana go Suxi maa aatagi go mamaatïrdami daidi potïtïdai, —Aapimï bïïxkatai gin dagito agai xibi tukarï. Ka podukai ojixi di. Go ojai ikaiti sai, Gï muatuda agai go paxturu xi go kañiñiru aipako bopiagai, ikaiti go ojai— itïtïdai Suxi.

²⁸ —Iimimu aapimï Galileamu dai aanï gïn bhaitïki imimu duakakai aanï— itïtïdai.

²⁹ Daidi go Piduru potïtïdai aidï, —Tomaxi go gaa gï dagito aanï an gia maiti gï dagitoagi— itïtïdai.

³⁰ Dai Suxi potïtïdai, —Daiñi Piduru— itïtïdai, —Aanï aagai sai xibi tukarï mai kia gokoaja kujukai takuku, aapi baikojo mai maaxi aaga agai pïxi gin maatï— itïtïdai.

³¹ Daidi go Piduru mos bamioma gubuakami aagai daidi ikaiti, —Cho xadïrï— itïtïdai, —tomaxi gï ïmadï muu xadïrï ïxtoagi aanï in xi gï maatï— itïtïdai. Dai go gaa pokaitimi ïpï, —Ïjï— ikaitimi ïgai. —Xadïrï gï dagitona aatïmï— ikaitimi.

Suxi atagai ïmadï Diuxi Getasemaniïrï dakatai

³² Bhodïrï iji ïgai xako Getsemani tïgidu ïmapïkïrï Olibo gidi uta. Dai Suxi potïtïdai go mamaatïrdami, —Tami abïr gin nïnïraka nai aanï mïï aataga iñagai ïmadï Diuxi— itïtïdai.

³³ Dai ïko baidaja ïgai go Piduru ïmadï Juan dai Jakobo dai karhioga mukiadan taadatu ïgai soi ïrhiarakïdï.

³⁴ Dai aagidi ïgai go Piduru ïmadï go gaa bïï goka, —Karhioga mukiadan taadaga gin ibhïdaga soi ïldakai— itïtïdai, —Tami abïr gin nïnïraka kia dai maiti abïr kokosïda— itïtïdai.

³⁵ Bhodïrï bhaitï jii ïgai lïïchi dai ami kopurhi boi dïbïrapi. Kaxi miadaimitadai go kaduku xi ïgai taata agai ïmo gïïdukami soi ïrhiaragai dai daanïi ïgai Diuxi sai ïgai maigobai dasana.

³⁶ Daidi potïtïdai ïgai Diuxi, —Gin oga, aapi bïïxi aïkatai ixtutuidikïi xi duñagi di. Kaxkïdï xibi maiti dagito xi soimaaxi taata aanï— itïtïdai. —Dïï aanï bhai aagai xi gin duiñdagi ixdukatai aapi ipïrhidi dai mai xu ixdukatai aanï ipïrhidi tomaxi kabami soi taadakagi— itïtïdai.

³⁷ Dai bhodïrï jii ïgai xako daraja go gaa bai go gaa kokosotadai. Daidi potïtïdai ïgai go Piduru, —Ximuñi, ¿Koso pïxi? ¿Maiti pïx ixtui xi nïadagi tomaxi ïmo hora?

³⁸ Maiti abïr kokoxi. Daiñi go diabora gïn tïïgida ïrhidi soimaaxi tïgibudagai sa bhai ïïgidana aapimï. Daanïdabïrai Diuxi tudu xi maiti gïn aiyagi gobai. Tomaxi ipïrhidi aapimï ix gupurtudagi gïn iibhïdaga soi ïrhiaragai bïïtarï bïïxkïrï mai gupuka aapimï dai mai nakogimu— itïtïdai.

³⁹ Dai maigo jii go Suxi ïpamu dai ïpamu go baa ñokikïdï aatagidi Diuxi.

⁴⁰ Daidi ïpamu dibia xako daraja go gaa bai go gaa kokosotadai ïpamu. Arhiï kokoximuka ïgai, ka mos susurhigïi bupuidï. Dai ka mai tïï ïgai ix dukatai tïdagi go Suxi.

⁴¹ Bhodïrï ïpamu jii Suxi dai aataga ïmadï Diuxi dai ïpamu dibiakai potïtïdai ïgai go mamaatïrdami, —¿Kia mïx bïïtï dai kokosïtadai? Nïnïababïrai tudu, aanï ïr Diuxi otosadï ix makïdï aagai Diuxi ïïki dai ka ayi kaduku xi gin tïïgida agai ïmoko go soimaaxi ibuadami.

⁴² Bapañigibïrai, timïda. Kaxi bhodïrï imïi ix makïdï gin tïïgida agai— itïtïdai Suxi.

Gï bhïitu go Suxi

⁴³ Kia pokaititadai go Suxi tai ami dibia go Udaxi. Ïgai ïr ïmoko go bhaibuxtama dan goka mamaatïrdamigadï Suxi. Dai jaa mui odami oiditadai go Udaxi dai bhïkati ïgai mamaaxtai dai uxi. Ojotosadï ïgai go tïtïanïdamigadï daxdadami daidi ïr ojotosadï ïpï go maatïtuldiadami sïïrhikami ïmadï jaa bhaitï gukakamigadï judidiu.

⁴⁴ Daidi go Udaxi ka ïkiaxdïrï bhai duitadai ñoki ïmadï ix makïdï oidi dai potïtïdaitadai, —Ix makïdï usupagi aanï, ïgai abïr ïgai, bïrai bhïiyi dai kïï nukadatai bhïka— itïtïdai.

⁴⁵ Dai mos aïkai ïgai tai otoma mïï biaturhi go Suxi, —Gin maatïtuldiadami— itïtïdai. Dai bhodïrï usupi.

⁴⁶ Mïtai oton bhïiyi go Suxi.

⁴⁷ Dai ïmadutai go ix makïdï ami guka busaitu gï kuxirui dai guikuta naakadï ïmoko go ix makïdï bhïiyi go Suxi. Go ix makïdï gabhïiyi ïr pioñigadï go gïï bhaitï kïakami daxdadami.

⁴⁸ Dai Suxi potïtïdai go odami, —¿Tuma bïïtarï tïgito aapimï go mamaaxtai dai uxi? ¿Ïmo ïïxibogami mïx gin ïrhidi xi kaxkïdï gokïdï in bhïiyi?

⁴⁹ Bïïx tasai gïn ïmadï dakana aanï amïka go gïï kiupaigadïrï judidiu dai ami gamaamakaiña aanï ñoki. Kïï bhaigakatadai aapimï xi ami gin bhïiyagi. Dïï mos gï aagai tudu xi gin duiñdagi ix dukai ojixi ïïki abhiadïrï, kaxkïdï gï agaitadai xi ïmo ïïxibogami dukai gin nïijada aapimï— itïtïdai Suxi.

⁵⁰ Daidi go ix makïdï Suxi ïmadï iimïitadai bïïxi dïgabuna boopoi dai ïïgi bia go Suxi.

⁵¹ Ïmoko bhaiton mai yukusukatadai, mosïka ïmo manta gï bhixaka ïgai. Dai aidïxi go kïkïïrhi bhïiyi go manta

⁵² tai ïgai mos mïï dai amaxi bia go manta dai modukai mai yukusukatai mïï duadimukatai.

Dudunukamiïrï bhïkai ïgai go Suxi

⁵³ Bhodïrï baan kïi ïgai go Suxi buidïrï go gïï bhaitï kïakami daxdadami dai ami gïn ïmpagi sonoïrï gukakamigadï ïpï bïïxkatai ïmadï jaa bhaitï gukakamigadï judidiu dai maatïtuldiadami sïïrhikami.

⁵⁴ Dai go Piduru mïkaxdïrï oi go Suxi dai ayi tuixikigadïrï ukami go gïï bhaitï kïakami daxdadami. Ami ukadai ïgai táí ïmadï sandadaru ix makïdï nukadai go kiupai.

⁵⁵ Dai Suxi tukabi kïakatadai buidïrï go daxdadami bhaitï gukakïdï dai buidïrï bïïxi go gaa dudunukami ïpï. Go dudunukami tïañia ïrhiditadai muaragai go Suxi dïï mos mai tïï ixtukïdï gïpiïrï buajagi.

⁵⁶ Muidutai gïpiïrï buaja ïrhiditadai yaatagikïdï dïï ïïmoko ïmo dukai aagai dai jaa ïma dukai xi mos gïn bupui kaatïkan duu busai ñokidï.

⁵⁷ Ïïmoko ami gukiba dai mos yaatadan kaiti,

⁵⁸ —Aatïmï kaï baidi kaiti sai daituda agai go gïï kiupai ix makïdï odami idui dai sai baika tasaikïdï ïpamu iduñi agai ïmai dai ïgai gia as maiti ïr odami duñidїka agai— ikaiti go yaatabogami.

⁵⁹ Pokaititadai ïgai dai bïïxkïrï mai ïmadugan dukai kaiti.

⁶⁰ Daidi go gïï bhaitï kïakami daxdadami ami kïkiba buitapi go gaa daidi potïtïdai go Suxi, —¿Buaboi xi ix duu aagai gobai? ¿Maiti pïx aa noragida agai?— itïtïdai.

⁶¹ Dïï mos go Suxi mos dodorhi bii dai mai taadaga. Daidi go gïï bhaitï kïakami daxdadami potïtïdai aidï, —Aatïmï bïïxkatai gia buaboitudai Diuxi. ¿Aapi pïxi ïr ïgai daidi ïr Diuxi otosadï gïr bhaitï kïakami dai Diuxi maradï?— itïtïdai.

⁶² Dai Suxi potïtïdai, —Ïjï, kïï aagai aapi. Aanï ïr Diuxi otosadï ix makïdï aagai Diuxi ïïki. Ayimu ixtuigako gin tïïgimu aapimï sai sïïrhixapadïrï Diuxi daibamu aanï. Diuxi bïïxi adama ïr gubukadagai biakami tudu, dai ïgai gin maaki agai sïïrhikami xi ami daibamu aanï. Dai gin tïïgimu aapimï ïpï xudu tïbagiañdïrï daibuña aanï iikomai saagida— itïtïdai.

⁶³ Daidi go gïï bhaitï kïakami daxdadami ïïgi sasarai yukuxidï bhamukatai mos kaïkai ix kaiti Suxi. Daidi ikaiti ïgai, —Duna aatïmï bamioma ñoki buidïrï idi kïïrhi.

⁶⁴ Mos parunadan kaiti gobai Diuxi buidïrï dai aapimï bïïxkatai kaï. Diuxi maradï gï aagai ïïgi ïgai di. ¿Dukatai nïidi aapimï?— itïtïdai. Bai go gaa bïïxkatai aagidi sai tïanïna muaragai go Suxi.

⁶⁵ Ïïmoko gaxixibidimi dai iiñapai bupuidï go Suxi dai bhodïrï gïbaimi daidi ikaitimi, —Gïr aagidañi xorai gïïgï— ikaitimi. Dai go kïkïïrhi nukadakami kiupai gagïbaimi ïpï.

Piduru aagai ix mai maatï go Suxi

⁶⁶ Daidi go Piduru maigo tuixikana dajatadai tai ami dibia ïmo kuxnirugadï go gïï bhaitï kïakami daxdadami.

⁶⁷ Tïï ïgai go Piduru xi ami gï ukadai tai dai kabami nïnïidi daidi potïtïdai, —Aapi ïpï ïmadï aimïraiña Suxi go Nasaretañdïrï oidakami ïrhi aanï— itïtïdai.

⁶⁸ —Cho— itïtïdai Piduru. —Aanï mai maatï go kïïrhi tomarhi mai maatï aanï tuixi pokaiti aapi— itïtïdai. Dai maigobai kidigamadïrï kïkiba ïgai kuuparagai abhana.

⁶⁹ Daidi go baa oki ïpamu tïï go Piduru dai aagidi go ix makïdï ami guka, —Gobai abïr aaduñi ïmadï go maixapikïdï— itïtïdai.

⁷⁰ —Cho— ikaiti Piduru, —Maiti ïr buaboi— ikaiti. Dai laachkïdï go ix makïdï ami guka potïtïdai go Piduruïpamu sai, —Gia ïr aaduñi aapi ïmadï Suxi. Ïpïamaaxi ñokai aapi, Galileañdïrï oidakami aapi ïpï, aapi ïmadï go Suxi tudu— itïtïdai.

⁷¹ Daidi go Piduru galnaaxi ñokimi daidi potïtïdai, —Maiti an maatï go kïïrhi ix makïdï aagai aapimï— itïtïdai. —Ix mai buaboi ñokai aanï di aidï gia gin abhana daituldamu Diuxi ïmo gïïdukami gïgïbituldaragai— itïtïdai.

⁷² Mos potïi ïgai tai ïpïpï kujui go takuku dai tïgito go Piduru xi Suxi ïkiaxdïrï potïtïdai ïgai, —Piduru, mai kia gokoaja kujukai go takuku pai aapi baikojo potïimu ix maiti gin maatï aapi— itïi go Suxi ïkiaxdïrï. Dai go Piduru tïïtïitoi ix ka yaata ïgai aagaitai ix mai maatï go Suxi dai kabami suakai.