Markos 12 - Northern Tepehuan Bible

Aatabuadami mai kïï tutuigakami aatagadï

¹ Bhodïrï apia aatagai Suxi ïmadï dudunukami daidi potïtïdai, —Xibi an gïn aagidagi ïmo maaxidaragai ñoki— itïtïdai. —Ïmo imidagai ïmo kïïrhi bhai dui ïmo ïxikami uba. Kïïga kuraratu ïgai dai bhodïrï dïgara ïgai ïmo aiti xako soñiba agai uba dai busaida agai baragadï dai bhodïrï idui ïgai ïmo baaki tïkabakami dai abhiadïrï nukadaka agai go ïxikami. Bïïxi nato bhai dui ïgai ïxikami daidi bhodïrï tajukamikïdï maa ïgai jaa odami dai mïkaxi jii xibhïakoga.

² Dai xudu ka ayi yoobaragai otoi ïgai ïmoko gï pioñi sai mïï tanïna go aatabuadami go uba baragadï xïïxi ajïga.

³ Dïï mos go aatabuadami bhïiyi go otoxikami dai gïikakarai dai mai maa toma lachi dai maigobai otoi.

⁴ Taidi amudï otoi aidï ïmai pioñi, mïtai ïgai maikakarai, dai saasarai modï dai galnaxi ñoki aagidi dai mos otoi ïpï.

⁵ Taidi amudï ïpï ïmai otoi pioñi, mïtai ïgai mua. Dai gokiïrï amudï mui otoi jaa pipioñi mïtai ïïmoko gïikakarai ïgai dai jaa koi.

⁶ Daidi go tuidakami dïbïrai mos arhi ïmaduga maradï. Kïïrhi ïgai maradï dai kïï oigïdaitadai ïgai. —Otosamu aanï gin maara. Gobai gia xadïrï mai xadutuadana ïgai— as ïrhidi go tuidakami dïbïrai. Dai otoi maradï.

⁷ Dai go aatabuadami tïïgakai mos aipako gïn aatagidimi daidi ikaiti, —Gobai aba ïgai dai bïïxi aji agai go ogadï buxtuidadï. Tïtai muagi bai aatïmï gïr biïna gobai— ikaitimi ïgai.

⁸ Dai bhïiyi ïgai dai mua dai bhodïrï maigobai daitu tukugadï kurarai ïbhïgi— itïtïdai Suxi. Gobai ïr go maaxidaragai ñoki ix makïdï aagidi ïgai go dudunukami.

⁹ Bhodïrï Suxi gatïkakai ïgai, —¿Dukatai nïidi aapimï? ¿Ix dukatai duñimu go amudï go aatabuadami? Aanï pokaiti sai dibiamu ïgai dai kodamu dai tïïgidamu ïxikami jaa— itïtïdai.

¹⁰ Bhodïrï apia ñokidi ïgai go dudunukami daidi potïtïdai, —¿Maiti mïx kia nïnïidi Diuxi ojadï? Gïn aagidamu aanï ix kaiti gobai. Ikaiti gobai sai, Diuxi otosadï bhaitï kïakami ïr ïmo kïïgadukami odai dukai kïïsaragai bïïtarï baaki. Dai pipioñi pupuirugami kïïsa agai baaki dai máí daitu go odai poïrhiditai ix maiti ïr soiñi toma lachi. Dïï mos Diuxi gia ojoida bhïiyi go baa odai dai dáí daagïka bïïtarï xiixodï baaki ix makïdï kïsaimi ïgai.

¹¹ Gïr Nukadakami tudu ïgai dai pomaaxi idui. Dai aatïmï ix makïdï buaboitudai kïï tïgito nïidi xi podukai dáí ïgai gïr bhaitï kïakamiga dai kïï bhai gïrhi aatïmï nïiditai— itïtïdai Suxi aagaitai go ojai.

¹² Dai go dudunukami abïnïrhidi aidï, —Aatïmï gïr aagai go Suxi mos aagaitai go pipioñi pupuirugami— gïn ïrhidi ïgai kaïkai ix kaiti go ojai. Dai bhakoi ïgai Suxi bui dai bhïiya ïrhidi dai maixa ïrhidi. Dïï mos dagito ïgai dai maigobai iji. Ïbhïidi ïgai odami. Mui odami oigïdai go Suxi kaxkïdï ïbhïidi ïgai.

Go dudunukami gïpiïrï buaja ïrhidi go Suxi

¹³ Dai gokiïrï go dudunukami otoi ïïmadutai go fariseos ïmadï aaduñdï go Rey Erodïxi. Ïgai mos kaïka agai aatagidï Suxi sa bhai tïïgana ixtukïdï gïpiïrï buajagi go Suxi dunukamiïrï.

¹⁴ Mïï dada ïgai xako daja go Suxi daidi potïtïdai, —Maatïtuldiadami, kïï maatï aatïmï sai go ïïgi buaboi ñoki aagai aapi. Kïï tuiga aapi dai ïmadugan dukai nïidi aapi odami tomaxi ïr gïn bipidakami xi ïr soi titiigami ïpï. Aapi maatïturhiña odami sai maatïkana ïgai Diuxi tïgibudadï, kaxkïdï gï tïkaka rïrhidi ixtumaxi— itïtïdai. —¿Bhai ix ïr sïïrhi xi tïïgidagi aatïmï go kuota ix makïdï gïr tanïi go Rey César tïgidukïdï?— itïtïdai.

¹⁵ —¿Gï agai tïxi tïïgidagi go kuota, ix cho ïpï?— itïtïdai ïgai go Suxi. Dïï mos go Suxi kïï maatï ix mos yaatabogan dukai ñokai ïgai. Daidi potïtïdai aidï, —¿Tui mïxi gin buirumada ïrhidi?— itïtïdai. —Bhaigobai abïr buapa ïmo tuminxi, nïida iñagai ix maaxi— itïtïdai.

¹⁶ Mïtai buapi Suxi ïmo tuminxi. Dai Suxi potïtïdai, —¿Borï modï dai borï tïtiaradï bia go tuminxi?— itïtïdai. Daidi go gaa potïtïdai aidï, —Go gïï Rey César tïgidukïdï modï bia gobai ïmadï tïtiaradï— itïtïdai.

¹⁷ Dai Suxi potïtïdai aidï, —¿Maiti ix ïr César tuidadï go tuminxi biakatai modï ïmadï tïtiaradï? Tïïgidabïrai César tuduidï ixtumaxi ïr ïgai tuidadï dai ixtumaxi ïr tuidadï Diuxi bïrai tïïgida Diuxi ïpï— itïtïdai. Dai go ix makïdï gïpiïrï buaja ïrhiditadai go Suxi ka mai tïï ixdukatai gïn tïgitoagi kaïkai aatagidï.

Go Saduseos gatïkakai go Suxi ïmo ñoki

¹⁸ Bhodïrï ami dada kïkïïrhi ix makïdï Saduseo agaiña odami. Ïgai mai buaboitudai xi oidakagi duakaragai koidadï bïïtarï. Dai ïgai ïpï mos parunadan kaiti dai potïtïdai aidï ïgai go Suxi,

¹⁹ —Maatïkami, go kïrhiodami Moises gïr bia ïmo ojixikami ïïki dai ikaiti ïgai sai ix ïmo kïïrhi ontagi dai gokiïrï mukiagi ïgai mai kia mamaatakai oñigadï abhana saidi sukurhidï gï agai ix ïmadï biiyagi go biudu dai mamaatagi abhana go mukiadï bïïtarï— itïtïdai.

²⁰ —Xibi gï aagidamu aatïmï ïmo aatagi ixdukatai pogïdui— itïtïdai. —Ïmo imidagai kubarakamikatadai kïkïïrhi dai mos ïmo gïn xïgïmï ïgai. Taidi ix makïdï bïïxi ïr gaxïgi oñigai dai bhodïrï muu mai kia mamaatakai.

²¹ Dai ïmo sukurhidï ïma bii go biudu dai muu ïpï mai kia mamaatakai. Taidi go gïmai sukurhidï ïma bii ïpï dai muu ïpï mai kia mamaatakai.

²² Mos podukai bïï kubarakami ïma bii go baa oki dai bïï koi mai kia mamaatakai. Dai gokiïrï muu go oki ïpï.

²³ Xibi gïr aagidañi ixdukatai maaxi gobai, ¿Borai oñigadïka agai go oki gïmai oidigïrï? Ka bïï kubarakami ïmadï bii di— itïtïdai go Saduseos. Mos parunai ïgai dai ikaiti.

²⁴ Dai Suxi potïtïdai aidï, —Aapimï Saduseos mai kïï aagai. Mai maatï aapimï ix kaiti Diuxi ojadï di. Tomarhi mai maatï xïïxi ïr gubuakami Diuxi.

²⁵ Daiñi— itïtïdai, —Xïïxkadï duduakagi koidadï ka mai kukuntai ïgai tomarhi mai ontai, mos ïpïan dukamikana ïgai Diuxi tïtïañikarudï ix makïdï Diuxi ïmadï daraka.

^26-27 Kïï maatï aanï ix mai buaboitudai aapimï xi oidakagi duakaragai koidadï bïïtarï. Dïï aanï aagai sai gia duduakai ïgai. Daiñi, Diuxi pokaiti sai go Abraam, ïmadï go Isaak ïmadï go Jakobo bïïxi buaboitudai Diuxi tomaxi aidïpïrï xi pokaiti ïgai ka ïïki abhiadïrï ka mai tiputadai ïgai bïï baikatai tami oidigi daama. ¿Dukatai buaboitudana ïgai Diuxi ix mai duakakagi di? Diuxi kïïga duduakakami aagai go Abraam ïmadï Isaak dai Jakobo tudu tomaxi ka koitadai ïgai. Kïï maatiga maaxi ix mai kïï aagai aapimï potïkai sai mai tipu duakaragai bïïtarï koidadï di— itïtïdai Suxi. —¿Maiti mïx kia nïidi Moises ojadï xako aagai go uparai kïakami biakami tai? Ami tudu aagai gobai idi aatagi— itïtïdai Suxi go Saduseos.

Go ojixikami sïïrhikami ix makïdï bamioma ïr namïakïdï

²⁸ Kia aatagai go Suxi ïmadï go Saduseos tai ami dibia ïmo maatïtuldiadami sïïrhikami. Dai kaï ix gïn bupui ñokaitadai go Suxi ïmadï Saduseos dai tïgito nïidi xi go Suxi kïï saitudagan dukai aa noraidi go gaa. Dai go maatïtuldiadami sïïrhikami potïtïdai go Suxi aidï, —¿Makïdï bïïxi go ojixikami sïïrhikami ïgai dai gï aagai ix bamioma ïïgiadagi?— itïtïdai.

²⁹ Dai Suxi potïtïdai, —Gï aagidamu aanï ix kaiti go bamioma namïakïdï ojai, gobai ikaiti, Kaïkabïrai aapimï Israelïrï óídakami, Mos arhi ïmaduga ïgai dai ïr Diuxi gïr Nukadakami. Mai tipu ïmai.

³⁰ Bïïxi gïn iibhïdagakïdï dai gïn tïgibudagakïdï dai gïn gubukarhigakïdï abïr oigïda nïijada Diuxi Gïr Nukadakami, itïtïdai Suxi. Gobai ïr go bamioma namïakïdï ojai.

³¹ Dai ix makïdï oidi ikaiti sai, Ix xïïxi gï oigïdai ïïgi aapi go kaaki gï aagai pïxi oigïada gï aaduñi ïpï. Potudu ikaiti go ojai bïï gokatai ix makïdï bïïxi adama gï aagai xi ïïgiadagi— itïtïdai Suxi.

³² Daidi go maatïtuldiadami sïïrhikami potïtïdai aidï, —Agia kïï aagai aapi maatïkami. Buaboi aba ix duu aagai aapi sai ïmaduga ïgai dai mai tipu ïmai.

³³ Dai gï aagai tïxi oigïada nïijada ïgai bïïxi gïr ibhïdagakïdï dai gïr tïgibudagakïdï dai gïr gubukarhigakïdï. Dai gï aagai ïpï tïxi ïpïan ïxi oigïada nïijadagi gïr aaduñi ix xïïxi gïr oigïdai aatïmï ïïgi. Xi pomaaxi ibuada aatïmï, gobai bamioma namïga Diuxi bui xi bhai bïïxi ix makïdï ibuadagi odami xadutudaragai bïïtarï Diuxi, dukami kodaragai dai mïmïidagi buxtaki— ikaiti go maatïtuldiadami sïïrhikami.

³⁴ Dai Suxi kïï sïïrhiñikami dukai kaï aatagidï go maatïtuldiadami sïïrhikami daidi potïtïdai, —Aapi katoma baakiadan buayi xako tïanïi Diuxi— itïtïdai. Dai bhodïrï abhiadïrï go odami ka maiti ipïrhi ix tïkakagi bamioma.

Diuxi otosadï gïr bhaitï kïakami ïr pipiixaradï Dabidkaru

³⁵ Bhodïrï ïmo imidagai go Suxi gamaakaitadai ñoki odami. Kiupaigadïrï judidiu dajatadai ïgai daidi ikaiti, —¿Ix dukatai maaxi gobai dai go maatïtuldiadami sïïrhikami aagai Diuxi otosadï gïr bhaitï kïakami dai Dabid pipiixaradï aagai ïgai?

³⁶ Daiñi, Diuxi Ibhïadï ñokiturhi go Dabidkaru ïmo imidagai baidi ikaiti Dabid, —Diuxi Gïr Nukadakami aatagidi gin bhaitï kïakamiga daidi potïtïdai, Dakañi aapi gin sïïrhixapadïrï nai aanï dumaltudana gï sasayu pai daama tuaja aapi gï ïïkaso pai kïixana aapi, itïtïdai Gïr Nukadakami— ikaiti Dabid.

³⁷ ¿Dukatai maaxi gobai aidï? ¿Dukatai bhaitï kïakami aagai ïgai ïïgi pipiixaradï di?— itïtïdai Suxi. Dai sïïrhikïdï mui odami kaï aatagidï dai arhiï ojoida kaï ïgai.

Go mamaatïtuldiadami sïïrhikami bïïtïkami biaka agai gïgïbidaragai

³⁸ Dai Suxi apia gamaakaitadai ñoki go odami daidi potïtïdai, —Gïn nukadabïrai xi maiti gïn bupuirumadagi go mamaatïtuldiadami sïïrhikami. Ïgai arhiï ojoidi xi aadadagi bapasaragai tïïtïbïdukami dai sai kïï xadutuadan dukai gïn biatuldada odami kayana.

³⁹ Ojoidi ïgai xi go kïïgadukïdioma bhïiyagi daikarui kiupiïrï xiïpï bagimiïrï. Ipïrhidi ïgai xi odami maatïkagi xïïxi ïr gïïgïrdukïdï ïgai.

⁴⁰ Mos gaïïxidiña ïgai bipiudu bhaabhakidï dai bhodïrï tïbïpi gamamaadaiña xi bhodïrï mos kïï tutuigakami ïrhidiña odami. Ïgai gïïpioma biakamu gïïgïbidaragai gïn abhana— itïtïdai aidï Suxi go odami.

Ïmo biudu buapi Diuxi ïmo oidaragai

⁴¹ Kia kiupiïrï dajatadai Suxi tai daiba ïgai buidïrï go kajoñi xako gatuajaidana odami tuminxi Diuxi aaduindadï bïïtarï. Dai mos nïnïidimi ïgai go odami ix tuma buadana. Nïidi ïgai ix makïdï ïr gïn bipidakami dai ïgai mumui tuayi tuminxi ami kajoñiïrï.

⁴² Tai bhodïrï ami ayi ïmo biudu soitigami dai ïgai mos arhi goka aarhi tuminxi tua.

⁴³ Dai Suxi báí mamaatïrdamigadï daidi potïtïdai, —Aanï aagai sai idi biudu soitigami bamioma tua xi go gaa ix makïdï ami tuajaimi tuminxi. Go gaa mos bhaibitukami bia tuminxi dai abhiadïrï maa ïgai. Dïï gia go oki soitigami mos arhi goka tuminxi biakatadai ixtukïdï oidakagi dai bïïxi tua ïgai.

⁴⁴ Go gaa mos bhaibitukami bia tuminxi dai abhiadïrï maa ïgai. Dïï gia go oki soitigami mos arhi goka tuminxi biakatadai ixtukïdï oidakagi dai bïïxi tua ïgai— itïtïdai.