Lukas 15 - Northern Tepehuan Bible

Suxi aagidi go odami sai bhai gï ïrhidi Diuxi xïïxkadï ïma dukai gï tïgitokagi ïmo soimaaxi ibuadami

¹ Dai aidï dudatai daibuiña taanïdami kuota ïmadï jaa ix makïdï soimaaxi ibuadami aagaiña odami. Daibuiña ïgai ami xako dakatadai Suxi kaïka ïrhiditai aatagidï.

² Dai kaxkïdï soi kaitiña bïïxi go fariseos ïmadï tïtïgiadami sïïrhikami dai ñokaiña ïgai Suxi bui daidi ikaitiña, —Daiñi, go Suxi mai kïïga ibuayi. Uurapïkïi gobai soimaaxi ibuadami di— ikaitiña.

³ Daidi go Suxi aagidi ïmo maaxidaragai aatagi gokïdï daidi potïtïdai,

⁴ —Ix ïmadutai aapimï sosiakagi ïmo ciento kañiñiru dai ïmoko kuga imiagi, ¿Mai ix no baaxi oidigana biayiña ïgai go gaa kañiñiru dai maigobai gaagaiña ix makïdï xibhï jii asta xudu tïï?

⁵ Dai ka tïïgakai bhai gï ïrhidiña ïgai dai motaiña dai buapaiña.

⁶ Dai ka aïkai kiiyïrï bapaidiña aaduñdï sai urabaiña bhai gï ïrhiditai daidi itïtïdaiña, —Gimibïrai dai gin uraba ïmo bagimiïrï. Ka tïï aanï go kañiru ix makïdï xibhï jiitadai— ikaitiña ïgai. Pobuayi aapimï tudu xïïxkadï xibhï imiagi ïmoko gïn sosoiga kañiñiru. Gaagaiña aapimï dai bhai gïn ïrhidiña tïïgakai.

⁷ Dai aanï aagai sai podukai ïpï kabami bhai gïn ïrhidiña tïbagiana óídakami xïxkadï ïma dukai gï tïgitokagi tomaxi mos arhi ïmo soimaaxi ibuadami. Dïï gia mai pokaxi kabami bhai gïn ïrhidiña ïgai go gaa ïmadï ix makïdï ka buañixi gïn ïrhidi iibhïadï dai po ïrhidi sai mai bia xi ïma dukai gïn tïtïgitoagi podukai— itïtïdai Suxi go fariseos ïmadï go tïtïgiadami sïïrhikami.

Suxi aagai ïmo maaxidaragai aatagi aagaitai ïmo oki ix makïdï xibhï bua ïmo tuminxi

⁸ Daidi Suxi potïtïdai go odami ïpï, —Kïï maatï aapimï sai tomax makïdï oki ix makïdï biakagi bhaibuxtama plata tuminxi kiiyïrï dai xibhï buajagi ïmoko, kïï maatï aapimï sai kabami gï aga gaagamu. Kudana ïgai ïmo kudakarui tudu dai kïïga boixikaiña go kii gaagaitai.

⁹ Dai gokiïrï ka tïïgakai bapaidiña ïgai aaduñdï ïmadï jaa ix makïdï miadïrï óídaga dai aagidiña bïïxkatai sai bhai gïn ïrhiada ïgai ïmadï ka tïïgakai go tuminxi. ¿Mai ix pomaaxi gobai?—

¹⁰ —Daiñi— itïtïdai. —Aanï aagai sai pomaaxi xako daraka Diuxi tïtïañikarudï ïpï. Gïïpi oidaga bhai ïrhiaragai amïka xïxkadï ïma dukai gï tïgitoagi ïmo soimaaxi ibuadami— itïtïdai.

Suxi aagai ïpï ïmo maaxidaragai aagaitai ïmoko ix makïdï bia ïmo maradï ix makïdï mai kïï idui oiditai ïïgi tïgibudadï

¹¹ Daidi Suxi potïtïdai ïpï, —Ïmo imidagai ïmo kïrhiodami maamarakatadai goka kïkïïrhi.

¹² Dai go gokiïrdadï potïtïdai, —Gin oga— itïtïdai. —Gin óídañi xibi otoma gï buxtuidaga xïïxi gin ajïga— itïtïdai. Dai go kïïrhiodami ïïgidi dai takogi xïïxi ajïakatadai maamaradï.

¹³ Dai chïki tasaikïdï sai go ix makïdï bamioma ïr gïïrhitadai gagara buxtuidadï ix makïdï buitadai ïgai dai no xibhï mïkaxi jii dai amïka naato xia dodai go tuminxi buirudagïrï.

¹⁴ Dai gokiïrï ami dibia ïmo gïï bhiugigai ami xako jiitadai go gïrhi bai ïgai kabami bhibhiugïi.

¹⁵ Daidi tïï ïgai aaduindagai ïmo kïïrhi ami oidakami ïmadï dai ïgai gatïjai nukadaragai tataixorhi oidigana.

¹⁶ Kabami bhiugimu go gïrhi tudu dai asta ugi antaadatu go uparai ibhiadï ix makïdï bhibhiditadai ïgai go tataixorhi. Mai tipukatadai xorai óídagi ixtumaxi ugiagi.

¹⁷ Daidi bhïiyi ïgai kïïga tïgibudagai daidi pobïrhi, —Tami karhioga muu aanï bhiugigaikïdï dai amïka kiidïrï gin oga gia asta pipionigadï bhaibitukami bia ixtuma ugiagi— gï ïrhidi.

¹⁸ —Imimu aanï kiidïrï gin oga dai potïdamu, —Gin oga, ka arhiï soimaaxi idui aanï Diuxi buidïrï dai aapi gï buidïrï ïpï.

¹⁹ Ka mai bia aanï sïïrhikami xi gï maara gin aagadagi aapi. Gin maakañi oigaragai xi ïr gï pioñikagi aanï xibi bhaiyoma, tïdamu aanï— gï ïrhidi go gïrhi.

²⁰ Dai bhodïrï jii ïgai abhiadïrï dai imi agai kiidïrï ogadï. Dai kia mïkaxdïrï imïi ïgai bai ogadï tïï dai soi gïlda tïï dai mïï buidïrï mïï dai komitu dai usupi.

²¹ Daidi go gïrhi potïtïdai, —Gin oga, ka arhiï soimaaxi idui aanï Diuxi bui dai aapi gï bïïtarï ïpï. Ka mai bia aanï sïïrhikami xi gï maara gin aagada aapi— itïtïdai.

²² Dïï mos ogadï mai poduu aagai dai bhaiyoma potïtïdai pipioñigadï, —Otoma abïr buapa go kïkïïgadukïdioma yukuxi dai aadida gin maara. Dai daxdabïrai ïmo aniyu nobidïrï dai aadidabïrai sususaka ïpï.

²³ Buapabïrai go baka maara ix makïdï gimutudai aatïmï ïpï dai mua tïtai iduñi bagimi.

²⁴ Ka mukiadï ïrhiditadai aanï idi in maara di. Dai xibi tami duakakami kïïka. Xibhï imiadïkatadai gobai dai xibi ka tïï aatïmï ïpamu— itïtïdai go kïrhiodami go pipioñi daidi idui bagimi.

²⁵ Daidi xïgidï go gïrhi no xibhï gaatabuadatadai no dïjoana. Dai laachkïdï ka aijimi ïgai kiiyana ïpamu dai kaï go ibaragai ïmadï go tudaidagai ami.

²⁶ Dai báí ïgai ïmadutai go pipioñi dai gatïkakai sa tuma bïïtarï go bagimi.

²⁷ Baidi go pioñi potïtïdai, —Kaxi ti dibia gï sukurhi xi kaxkïdï tïjai gï oga muaragai go baka maara ix makïdï gimudaitadai aatïmï dai gabagimadai. Bhai gï ïrhidi ïgai kïïgakïrï dibiakai gï sukurhi kaxkïdï— itïtïdai.

²⁸ Dai bhamutu go gaxiïgi kaïkai ix kaiti go pioñi daidi maiti ipïrhi xi baan kïkibagi ami bagimiana. Dai busai ogadï dai kabami abïnakidi sai urabana.

²⁹ Dïï modukai maiti ipïrhi ïgai dai bhaiyoma potïtïdai ïgai ogadï, —Daiñi gin oga— itïtïdai. —Ka mui umigi gï soikïiña aanï aaduindagïrï ïmo gï pioñi dukai dai bïïxi aïkatïrï gï ïïgidiña aanï. Dïï gia tomarhi ïmo imidagai maiti gin maa aapi tomarhi ïmo arhi xibato ixtukïdï ibuadagi aanï bagimi ïmadï gin aaduñi ix makïdï ïïmadai aanï— itïtïdai.

³⁰ —Dai xibi mos dibiakai gin sukurhi ïgai bïïtarï gia mua aapi go baka maara ix makïdï gimudaitadai aatïmï tomaxi ka bïïxi xia dodai ïgai gï buxtuidaga oki kïkïïrhimïrhiakami ïmadï— itïtïdai.

³¹ Dai ogadï potïtïdai, —Gin maara— itïtïdai. —Aapi bïïxkïrï gin ïmadï dakana dai bïïxi ixtumaxi bia aanï ïr aapi gï tuidaga.

³² Dïï gia xibi ka dibia gï sukurhi. Aatïmï ïmo mukiadï ïrhiditadai dai xibi ka duakatu. Xibhï imiadïkatadai ïgai dai xibi ka tïï aatïmï ïpamu. Kaxkïdï gï agai xi bagimituda aatïmï di— itïtïdai.