Jue 2 - Northern Tepehuan Bible

⁷ Go Josue ïmadï go gaa bhaitï gukakami ix makïdï ïpïan ïxi ïr kïkïrhiodami ïr nïijadamikatadai xïï gïdukami soiñi idui Gïr Nukadakami abhana go Israelitas gïn bubaidakai ïgai Ejiptuañdïrï. Ïgai kïï ïïgidi Gïr Nukadakami. Dai ix xïï tïbïpi ukami óídakatadai go kïkïrhiodami ïgai kia dai ïïgidi Gïr Nukadakami, po kaxi tïbïpi kïï ïïgidi go gaa Israelitas Gïr Nukadakami ïpï.

⁸ Dai go Josue ugidagai ïmo ciento dan bhaibuxtama umigi biakatai.

⁹ Dai ïïgi dïbïragadïrï go Josue gï yaasatu ïgai ami Kanaanïrï. Timnatsera tïgidu dïbïragadïrï go Josue. Gaas tubidakiañdïrï norte amakoga bipiïyi gobai xako Efraín tïgidu oidigi.

¹⁰ Dai tïbïpikïdï koi go gaa bhaitï gukakami ïpï ix makïdï ïpïan ïxi ïr kïkïrhiodami ïmadï Josue. Dai abhiadïrï bhaitiakoga go Israelitas ka dagitoimi Gïr Nukadakami. Go utu iimïdami mai maatïkana ix tuiga Gïr Nukadakami dai tomarhi mai maatï ïgai ix maaxi idui ïgai soiñi abhana go Israelitas.

¹¹ Dai go Israelitas gïïpi soi maaxi idui Gïr Nukadakami bui. Daaxi ïgai buxtaki go ubixi ix makïdï Baal tïgidu tudu.

¹² Go ïkidï piipixaradï go Israelitas gia buaboitudaiña Gïr Nukadakami. Buaboitudaiña ïgai gobai ix makïdï bubaitu Ejiptuañdïrï ïïki tudu. Dïï xibi go utu iimïdami ka dagitoimi. Ka mai buaboitudai. Adaimïi ïgai buaboidaradï jaa óídakami ix makïdï no aipako óídaga. Dai buidïrï kuiki ïgai jaa ix makïdï didiuxi aagaiña óídakami. Podukai bhamutu ïgai Gïr Nukadakami.

¹³ Go Israelitas dagito Gïr Nukadakami dai oigïda ño buidïrï uubixi ix makïdï Baal dai Astarte tïtïïgidu.

¹⁴ Kaxkïdï Gïr Nukadakami bhamu buidïrï go Israelitas dai otoxi ïïxibogami ix makïdï gaïxi buxtuidadï. Dai xibhïadïrï óídakami daibïiña dai bui susurhigïiña go Israelitas dai go Israelitas maiti ixtutuidikïi bui.

¹⁵ Xudu kokodiïrï gakokoada agadagi go Israelitas Gïr Nukadakami sobhikïiña sai mai kïï ïldana. Ka ïkiaxdïrï agaitadai Gïr Nukadakami xi poduñi agai dai ka pobï dui. Daidi podukai soi dukai óídakana go Israelitas.

¹⁶ Tomaxi pobuadana go Israelitas bïïxkïrï Gïr Nukadakami ïko bubaidiña ïïmadutai go Israelitas dai kakaigi dadasaiña. Go kakaigi ïgai soikïiña go Israelitas dai bui susurhigïiña go ïïxibogami.

¹⁷ Dïï modukai go Israelitas mai ïïgidi go kakaigi. Dagito ïgai Gïr Nukadakami bhaiyoma dai Diuxi agai ïgai jaa ix makïdï mai buaboikïdï ïr Diuxi. Piipixaradï ïkidï gia ïïgidiña Gïr Nukadakami sïïrhikamigadï dïï idi ka maiti ipïrhi.