Jonas 4 - Northern Tepehuan Bible

¹ Dïï gia kabami bhamutu go Jonas maatïkatai sai ka ïma dukai gï tïgito Diuxi dai ka mai xadodai go gïï ki.

² Dai daañimi ïgai Gïr Nukadakai daidi potïtïdai, -Gïr Nukadakami, mai ix pokaititadai aanï aidïxi kia gin kiyana dakatadai aanï? Kaxkïdï otoma daibuna mïï aani Tarsiamakoga. Kïïga maatïkatadai aanï sai kïï tuiga aapi oidakami bïïtarï dai sai otoma oigïrhiña aapi. Mai otoma bhamokïi aapi tudu dai kïïga mai ugutai oigïdai aapi oidakami. Kïïga maatïkatadai aanï sai mai otoma xia buayi aapi oidakami tudu.

³ Kaxkïdï xibi gin muamudai aapi Gin Tïanïdamiga. Ka mai oidaka iñïrhidi aanï tudu- itïtïdai.

⁴ Daidi Gïr Nukadakami potïtïdai aidï, -Bhai ix kïïgadu gobai ix bhamu aapi?- itïtïdai.

⁵ Dai bhodïrï busai go Jonas ami go gïï kiikiañdïrï dai jii xiarhiamajako laachi dai ami idui ïmo ukusai dai ami ïkapiana daiba dai nïida agai sa gï duna go gïï kiiki.

⁶ Dai Gïr Nukadakami gïrhitu ïmo uxi ami sai kïï xioma dakana go Jonas ami ïkapiana. Podukai ka mai soitaadatu ïgai go tasaikïdï dai kïï bhai ïrhidi go Jonas go uxikïdï.

⁷ Dïï gia xiadiko otoi Diuxi ïmo batopadagai dai soidodai gobai go uxi bai gakixa gobai.

⁸ Dai laachkïdï ka buasaikai tasai sai xiarhi amajadïrï otoi Diuxi ïbïrhi kaban toñikami dai go tasai kabami toñikatadai ïpï dai kabami soi taadatu go Jonas gokïdï. Sïïrhikïdï ugitu antaadatu Jonas gubukarhigadï tudu asta xako ka mukia ïrhiditadai. Daidi ikaiti ïgai, -Xioma ipïrhidi aani ix mukiagi. Ka mai oidaka iñïrhidi podukai- ikaiti go Jonas.

⁹ Dai Diuxi potïtïdai, -Kïïga pïx ibuayi bhamukatai aapi mos gakixakai go uxi?/ Bhai ix ïr sïïrhi sai bhamu aapi gakixakai go uxi?****** Dai go Jonas potïtïdai, -ïjï bia aanï aba ix tuixi bhamuka aanï. Karhioga mukiada antaada aanï bhamukatai tudu- itïtïdai.

¹⁰ Dai Gïr Nukadakami potïtïdai, -Buamï ïrhidi aapi go uxikïdï ix makïdï gïï ami tomaxi aapi maiti idui ixtumaxi dai mai gïrhitu. Otoma gïï gobai mos arhi ïmo tukagikïdï tudu dai otoma gakixa ïmo tukagikïdï ïpï.

¹¹ Dai go Ninibeana oidaga bhaibitukami ïmo ciento dan ïmo kobhai mirhi oidakami ix makïdï tukamukan dukai oidaga mai maatïkatai ixtumaxi ïr buaboi. Dai ïkobïrakoga muidu buxtaki ïpï- itïtïdai. -Mai ix gï agaitadai sai buamï ïrhida aapi ïgaikïdï dai mai xuu xi go uxikïdï? itïtïdai.