Genesis 5 - Northern Tepehuan Bible

³ Go kïïrhi Adán ka biakatadai ïmo ciento dan ïmokobhai dan bhaibuxtama umigi aidïxi maara ïgai Set. Kïïrhi ïgai dai kïïga ïpïamaaxkana ïgai go Adán.

⁴ Bhodïrï ka kïkibakai go Set oidigi daama abhiadïrï bhaitiakoga ïpï mamaako ciento umigi kia oidakatadai go Adán dai maamara ïpï jaa.

⁵ Tuxtan ciento dan ïmokobhai dan bhaibuxtama umigi aitu go Adán tudu dai bhodïrï ugidagai.

Idi ojai aagai go kïïrhi Enok tïgidukïdï ïmadï maamaradï

²² Go kïïrhi Enok tïgidukami kïï kaidakana, kïï ïïgidarakan dukai ïgai Diuxi. Ïgai maara ïmo kïïrhi Metusalen tïgidukami ka biakatai baikobhai dan taama umigi. Dai bhodïrï ka kïkibakai go Metusalen bhodïrï bhaitiakoga kia oidakatadai go Enok ïpï baika ciento umigi dai maamara ïgai aarhi bamioma.

²³ Baika ciento dan baikobhai dan taama umigi aitu go Enok oidigi dama tudu.

²⁴ Dai bhodïrï Diuxi modukai duakakami baidaja go Enok dai ka mai tiputa ïgai oidigi dama. Kïï ïïgidiña ïgai Diuxi tudu dai kaxkïdï baidaja ïgai.

²⁵ Bhodïrï ïmo maradï Enok ix makïdï Metusalen tïgidu maara ïmo kïïrhi dai Lamek tïïtï. Metusalen ka biakatadai ïmo ciento dan maakokobhai dan kubarakami umigi aidïxi kïkiba go Lamek oidigi dama.

²⁶ Bhodïrï ka kïkibakai go Lamek abhiadïrï ïpï kubarakan ciento dan maakokobhai dan goka umigi kia oidakatadai go Metusalen dai maamara aarhi bamioma.

²⁷ Dai bhodïrï ugidagai go Metusalen ka biakatai tuxtaan ciento dan baikobhai dan tuxtama umigi.

^28-29 Bhodïrï go Lamek ka biakatadai ïmo ciento daan maakokobhai daan goka umigi aidïxi maara ïgai go kïïrhi Noé tïgidukïdï. Kïï bhai gï ïrhidi go Lamek nïiditai maradï daidi itïi, —Ka arhiïxi soi dodai Diuxi go dïbïrai kaxkïdï soi taadakatai aatabuayi aatïmï xibi dïï idi gin maara aba ïgai dai gïr maakimu gïr ibhïxtaraga— itïi ïgai.

³⁰ Dai bhodïrï ka kïkibakai go Noé oidigi dama abhiadïrï kia oidakatadai go Lamek ïpï taan ciento dan maakokobhai dan bhaibuxtama dan taama umigi dai maamara aarhi bamioma.

³¹ Dai ugidagai go Lamek ka biakatai kubarakan ciento dan baikobhai dan bhaibuxtama dan kubarakami umigi.

³² Dai go Noé ka biakatadai taan ciento umigi dai bhodïrï maamara ïgai baika kïkïïrhi. Ix makïdï ïr gaxïgi Sem tïgidu dai ix makïdï oidi Kam dai gasukurhi Jafet tïgidu.