Genesis 2 - Northern Tepehuan Bible

¹ Dai podukai natorhikami bia Diuxi go tïbagi ïmadï oidigi ïmadï bïïxi ixtumaxi ami oidaga.

² Dai bhodïrï xadiko ka mai aatadui Diuxi ïmo tasai ka natorhikatai aaduindadï.

³ Dai aagai Diuxi ïmo bhai ïrhiaragai ñoki aagaitai go kubarakami tasai daidi itïi —Takabo kugaitu aanï gin aaduindaga dai xibi ka mai aatadui aanï ïmo tasai ka natokai gin aaduindaga kaxkïdï xibi idi kubarakami tasïrï xadutudikami biamu aanï— itïi ïgai.

^4-5 Podukai idui Diuxi go tïbagi ïmadï oidigi. Tukamïrï aidïxi Diuxi Gïr Nukadakami utudami idui go tïbagi ïmadï oidigi sai mai kia otoitadai ïgai duki dai mai tipukatadai kia xorai aatabuadagi dïbïraïrï. Kaxkïdï mai tipukatadai ïxikami kia dai tomarhi basoi.

⁶ Aidï busanïitadai sudagi dïbïrai utamajadïrï dai baadïrïiña go dïbïrai.

⁷ Bhodïrï Diuxi Gïr Nukadakami idui ïmo kïïrhi dïbïraikïdï dai buxta dakadïrï bai abhiadïrï ka ibhïiba kïkiba ïgai.

^8-9 Dai bhodïrï xarhi utamajako bhai dui Diuxi Gïr Nukadakami xako oidaka agai go kïïrhi. Eden tïgidu xarhiapako oidigi ïgai xako bhai dui ïgai. Dai ami dáí ïgai go kïïrhi ix makïdï idui ïgai. Bhodïrï ami Edenïrï tutu Diuxi kïïga mui uxi dai kïï bïïñiakami ibhiadï dai kïï titiodikami. Dai ami ïxikami ïrana ïxi tutu ïgai goka uxi ix makïdï mai ïpïamaaxi go gaa uxi. Ïmoko xi odami ugiagi ibhiadï ka mai mukiagi tomaxi xïï kïrhimuagi ïgai. Dai go gïmai uxi ïgaikïdï bïïxi aajïi tïgibudagai modukai kïïgadukami dai ix makïdï mai kïïgadu.

¹⁰ Aidïpïrï ami Edenañdïrï daibunuga ïmo gïï aki daidi ïxikamiana daibusai dai badaidiña go dïbïrai. Bhodïrï ïxikamiañdïrï busai daidi ka sasaraka aipakoga. Abhiadïrï xajadïrï busai gobai abhiadïrï bhaitiakoga kaxi maakoadukana gobai mamaradï.

¹¹ Ïmo mamaradï go aki ïgai dai Pixón tïgidukana. Gobai ïgai dai bïï xikorhi ajïi xako Abilana tïgidu oidigi.

¹² Ami Abilana oidaga kïï buañixikami oro ïmadï usabhai ixtukïdï ibuadagi xigian ubadami perfume dai oidaga ojodai kïïga namïakami ïpï.

¹³ Ïmai mamaradï go aki ïgai dai Gijón tïgidu. Gobai ïgai dai bïï xikorhi ajïi oidigi xako Kuxana tïgidu.

¹⁴ Dai ïmai mamaradï go aki ïgai dai Tigrixi tïgidu. Gobai ïgai dai sonoana kaatï Asiriana xarhi apako. Go gïmai mamaradï go aki ïgai dai Eufrati tïgidu. Pomaaxkana go aki ix makïdï go gïï ïxikamiañdïrï daibunuga.

¹⁵ Ami Edenïrï dáí Diuxi Gïr Nukadakami go kïïrhi ix makïdï idui ïgai. Dai nukaturhi ïgai ïxikami sai aatabuada ïgai dai bhaibuadana ïxikami.

¹⁶ Dai maa oigaragai sai kumuda ïgai uxi ibhiadï bïïxi tomax makïdï uxi ix makïdï ami ïxikamiana guka.

¹⁷ Mosïkaxi ïmo uxi ïgai dai mai maigarxi ix kukumiagi, go ix makïdï ïgaikïdï bïïxi aïkatai aajïi tïgibudagai modukai kïïgadukami ïmadï ix makïdï mai kïïgadu. Gokïdï gia aagidi ïgai sai mai ugana. Potïtïdai ïgai aidï sai, —Ix ugiagi aapi gobai aidï gia gïgïbituldamu aanï xi mukia aapi— itïtïdai.

¹⁸ Bhodïrï saidi itïi Diuxi Gïr Nukadakami, —Maitï gï agai ix ïïgi daakagi go kïïrhi. Iduiñtuldamu aanï aduñdï saidi soiñana ïgai— itïi ïgai.

^19-20 Dai bhodïrï Diuxi Gïr Nukadakami bui dïbïrai dai ïgaikïdï idui bïï sudakami go oidigi dama ajiopadami dai ujurugi. Dai tïïgi ïgai go kïïrhi sai ïgai darasana tïtiaradï. Dai ka potïtïgidukami bii ïgai aidï abhiadïrï ix dukai tïïtï go kïïrhi. Dïï modukai ka mai tïï go kïïrhi aduñdï xorai ïgai dai soikïdagi.

²¹ Daidi bhodïrï Diuxi Gïr Nukadakami kabami koxitu go kïïrhi dai busaitu ïmo onomadï dai ïpamu kuu tukugadï.

²² Dai go kïïrhi onomaiñdïrï idui Diuxi ïmo oki daidi tïïgi ïgai go kïïrhi.

²³ Daidi itïi go kïïrhi tïïgakai go oki, —Idi gia ïr aanï gin aduñi. Kaxi ïr ïïgi gin oañdïrï dai gin tukugañdïrï duñixi di— itïi ïgai. —Kïïrhiañdïrï duñixi gobai kaxkïdï oki aagamu aanï— itïi go kïïrhi. (Go Hebreo ñokidïkïdï bhaiton ïpïan tïtïïgidu oki ïmadï kïïrhi tudu.)

²⁴ Kaxkïdï aidï abhiadïrï daadagitoi kïïrhi ogadï dai dïïdï dai oki ïmadï bipiïyi xi bhodïrï bhaitiakoga kaxi ïmo odami dukai bipiïyi go oki ïmadï kïïrhi.

²⁵ Dai tomaxi mai yukusukana go kïïrhi ïmadï go oki ka bïï mai maatïkana ïgai ix tumaxi ïr xaïraragai.