Galatas 3 - Northern Tepehuan Bible

Pabora aagidi go buaboitudadami Galasiïrï óídakami sai Diuxi kïïgakïrï bubaidi odami mos buaboitudaitai ïgai

¹ Aapimï gin aaduñi Galasiïrï óídakami, sïïrhikïdï mai kïïgadu gïn tïgibudaga. Gïn bupuirumagi ïrhi aanï ixtumaxi. ¿Xorai ïgai dai gïn bupuirumagi tudu? ¿Mai ix kïïga gïn tïtïgidi aatïmï ix tuma bïïtarï muu Suxi Kristo kuruxiana?

² Kïï maatï aapimï sai buaboitu aapimï go bhai ïrhiaragai aatagi kaïkai aapimï dai kaxkïdï dibia Diuxi Ibhïadï gïn ïmadï. Dai mai xu xi dibia ïgai ïïgiditai aapimï go Moises sïïrhikamigadï.

³ Daiñi, aidïxi tukamïrï buaboitu aapimï kïïga oiditadai aapimï gïn buaboidaraga Diuxi Ibhïadï gubukarhigadïkïdï. ¿Dai xibi ix tuixi po gïn ïrhidi aapimï sai ïïgi gïn gubukarhigakïdï bhaigakamu aapimï xi apia kïïga oijadagi gïn buaboidaraga? ¿Dukatai mos ïï bupuirukana aapimï?

⁴ Daiñi, aidï abhiadïrï xi tukamïrï buaboitu aapimï kabami soimaaxi gïn buididiña jaa gïn buaboidaragakïdï. Ïgai ipïrhidi xi oijada aapimï go sïïrhikami dai mai xu xi buaboitudada aapimï Suxi Kristo. Dai xibi xi dagitoagi aapimï gïn buaboidaraga dai ïpamu oijadagi go sïïrhikami ix duu agai go gaa aidï gia mos ïgikïdïkamu bïïxi gobai ix makïdï soimaaxi taata aapimï. Maiti gï agai gobai.

⁵ Daiñi, kïï maatï aapimï sai Diuxi ïgai dai gïn maa Diuxi Ibhïadï. Dai Diuxi Ibhïadï gubuakami aatabuayi gïn saagida saidi ibuada aapimï naana maaxi maaxidaragai ix makïdï odami ïïgi mai bhaiga xi ibuadagi. Gobai ïr ïmo gïdukami bhai ïrhiaragai gïn bïïtarï. Dïï gia gin aagidabïrai ix tuixi podukai gïn maa gubukarhigai Diuxi sai pomaaxi ibuada aapimï. ¿Kïïga mïx ïïgidi go sïïrhikami xi kaxkïdï podukai aatabuayi Diuxi? Cho. Daiñi, gïn aagidamu aanï ix tuixi pomaaxi ibuayi maaxidaragai Diuxi gïn saagida. Kïïga buaboitu aapimï go bhai ïrhiaragai aatagi mos kaïkai aapimï dai kaxkïdï aatabuayi Diuxi podukai gïn saagida ibuadatai naana maaxi maaxidaragai. Podukai nïidi aatïmï sai Diuxi gïr urhiñdi naana maaxi bhai ïrhiaragai mos buaboitudakai aatïmï dai mai xu xi ibuadatai aatïmï ixtumaxi.

⁶ Dai pomaaxkatadai go Abraamkaru ïmadï ïpï. Kaxkïdï Diuxi ñokidïrï pokaiti sai, Go Abraam buaboitu ixtumaxi aagidi Diuxi dai gobai namïi ïgai bïïtarï dai Diuxi kïïgakïrï tïï mos buaboitudakai ïgai, ikaiti go ojai.

⁷ Kaxkïdï gï maatï sai odami ix makïdï ïpïan dukai buaboitudai go Abraamkaru buaboidaitai ixtumaxi gïr aagidi Diuxi, ïgai kïïgakïrï ïr piipixaradï dukami go Abraamkaru. Go Abraam tudu ïr ogadï dukami bïïxi buaboitudadami.

⁸ Dai Diuxi aagidi go Abraamkaru ïmo bhai ïrhiaragai ñoki ïïki dai potïtïdai, Aapikïdï aituldamu aanï ïmo gïdukami bhai ïrhiaragai bïïxi oidigi daama óídakami, itïtïdai. Ka podukai gï tïgitotadai Diuxi sai iduña agai kaxkïdï potïtïdai ïgai. Ka ïïki abhiadïrï podukai gï tïgito ïgai xi kïïgakïrï nïijada agai asta go odami ix makïdï maiti ïr judidiu ïpï mos buaboitudakai ïgai. Gobai ïr go bhai ïrhiaragai ix makïdï ïr bïïxi óídakami bïïtarï tudu.

⁹ Daiñi, Go Abraamkaru biatu ïmo bhai ïrhiaragai ïïki mos buaboitudakai ïgai dai podukai ïpï bïïxi óídakami biakana ïmo bhai ïrhiaragai ïpï mos buaboitudakai ïgai ïpï ïpïan dukai go Abraamkaru. Podukai kïïgakïrï bipiïyi ïgai Diuxi ïmadï tudu. Gobai ïr go bhai ïrhiaragai ix makïdï ïr bïïxi óídakami bïïtarï.

¹⁰ Dïï gia xorai po gï ïrhiadagi sai go Moises sïïrhikamigadï ïgai dai soiñamu sai kïïga biïna Diuxi ïmadï ïgai bhaiyoma ka ïko daraja Diuxiañdïrï. Mai bhaiga ïgai xi bïï sudakami ïïgiada ïgai go sïïrhikami kaxkïdï. Daiñi, Diuxi ojadï ikaiti sai, Bïïxi odami ix makïdï mai kïïga ibuadagi bïïxi ixtumaxi ojixi go sïïrhikamiïrï bia xi taatagi gïgïbidaragai bïïxkïrï bïïtarï ïko darakatai Diuxiañdïrï, ikaiti go ojai.

¹¹ Kïïga gï maatï tudu sai tomarhi ïmo odami mai bhaiga xi bïï sudakami ïïgiadagi go sïïrhikami dai kïï biyagi Diuxi ïmadï. Dïï gia Diuxi ojadï ïma dukai aagai. Ami ikaiti sai, Kïïgakïrï óídaga go odami ix makïdï Diuxi kïïgakïrï nïidi mos buaboitudakai ïgai, ikaiti go ojai.

¹² Dai ami mai ajïi ix biakagi ïmoko xi ïïgiadagi go Moises sïïrhikamigadï. Daiñi, go buaboitudaragai Diuxi ïr ïmo ixtumaxi dai go ïïgidaragai go sïïrhikami gobai ïr ïmai. Ïjïkobai gobai. Kaxkïdï tudu, Diuxi ojadï ikaiti sai, Xorai po gï ïrhiadagi sai ïïgiadamu go Moises sïïrhikamigadï dai kïïgakïrï oidakamu bïïxkïrï bïïtarï ïgai biaka agai xi bïïxi sudakami ïïgiadagi go sïïrhikami. Ïma dukai ix mai bïï sudakami ïïgiadagi bïïx tasai aidï gia taatamu gïgïbidaragai ïkobai dakatai Diuxiañdïrï, po tudu kaiti go sïïrhikami.

¹³ Dïï gia Suxi Kristo taata go gïgïbidaragai gïr bïïtarï mukukai kuruxiana1 dai kïïgakïrï gïr bubaitu. ¿Mai ix podukai aagai go Diuxi ojadï? Ami ikaiti sai, Xorai uxiana nagiïkagi tukugadï ïgai maaxitudai sai bia ïgai ïmo gïgïbidaragai Diuxiañdïrï, ikaiti go ojai. Kaxkïdï gï maatï sai Suxi Kristo taata go gïgïbidaragai gïr bïïtarï.

¹⁴ Xibi ka taata Suxi go gïgïbidaragai gïr bïïtarï xi kaxkïdï xibi Diuxi gamaakai ïmo gïdukami bhai ïrhiaragai go odami ix makïdï maiti ïr judidiu. Kïïgakïrï nïidi ïgai mos buaboitudakai ïgai tudu. Xibi asta go odami ix makïdï maiti ïr judidiu biatu ï galbaaxi bhai ïrhiaragai ix makïdï maa Diuxi go Abraamkaru ïïki ka bïïna darakatai ïgai Suxi Kristo. Dai xibi aïjïi Diuxi Ibhïadï bïïxkatai aatïmï gïr ïmadï mos buaboitudakai aatïmï xi ïr judidiukagi xi maiti ïr judidiukagi aatïmï ïpï.

Pabora potïtïdai go buaboitudadami sai Diuxi tomarhi ïmo imidagai mai gajiadïrï bia go ñoki ix makïdï aagidi ïgai go Abraamkaru

¹⁵ Gin aaduñi Diuxi amadïrï, gïn aagidamu aanï ïmo maaxidaragai aagaitai ixdukatai ibuayi odami xïïxkadï bhai buadagi ñoki sai podukai maatïkana aapimï sai Diuxi bïïxkïrï ibuayi ixtumaxi aagadagi ïgai. Daiñi, xïxkadï odami bhai buadagi ñoki ka mai bhaiga ïgai xi gajiadïrï biagi tomarhi xi gokiïrï pokaitadagi sai ka ïma dukai iduña agai.

¹⁶ Dai pomaaxi go ñoki ix makïdï bhai dui Diuxi go Abraamkaru ïmadï ïïki dai ïmadï ïmo pipiixaradï. Dai gïn tïgito abïr nïida sai gïn aagidi aanï sai mos ïmo pipiixaradï Abramkïdï bhai dui ïgai ñoki dai ïgai ïr Suxi Kristo. Aidï Diuxi aagidi go Abraamkaru sai maaki agai ïmo bhai ïrhiaragai dai mai gajiadïrï biamu ïgai go ñoki.

¹⁷ Dai gokiïrï 430 umigi abhiadïrï xi bhai duitadai Diuxi go ñoki go Abraamkaru ïmadï aidï bhai dui ïgai ïmo ñoki go Moiseskaru ïmadï ïpï maakakai go sïïrhikami. Dïï mai xu xi ka mai namïakami bii go ñoki ix makïdï bhai duitadai ïgai go Abraamkaru ïmadï tukamïrï. Bïï goka ñoki namïakatadai tudu. Diuxi mai gajiadïrï biayi ñokidï kaxkïdï. Bïïxkïrï ibuayi ïgai bïïxi ixtumaxi aagadagi.

¹⁸ Daiñi, Diuxi bhai dui ñoki go Abraamkaru ïmadï ïïki mai kia tipukatai go sïïrhikami dai aagidi sai maakiagai ïmo bhai ïrhiaragai. Gobai itïiya ïrhidi sai mai biakatadai go Abraamkaru xi ïïgiadagi go sïïrhikami sai biakana go bhai ïrhiaragai. Dai bhaiyoma Diuxi ka aagiditadai sai maaki agai go bhai ïrhiaragai dai Diuxi bïïxkïrï ibuayi bïïxi ixtumaxi aagadagi ïgai dai kaxkïdï biatu Abraam go bhai ïrhiaragai.

Pabora aagai ix tuma bïïtarï go Moises sïïrhikamigadï

^19-20 Gin aaduñi Diuxi amadïrï, kaxi gïn aagidi aanï sai Diuxi ïpïgioma aagai ïmo ñoki ïïki dai pokaiti sai maaki agai ïmo bhai ïrhiaragai bïïxi óídakami bïïtarï. Dai gokiïrï gïr maa ïgai sïïrhikamigadï. Kaxkïdï ïïgi gïn tïkaka antaada aapimï ¿Ix tuma bïïtarï gïr maa Diuxi go sïïrhikami? Gïn aagidamu aanï ix tuma bïïtarï gobai. Daiñi, Diuxi gïr maa go sïïrhikami sai ïgaikïdï maatï nïijadana aatïmï xïïxkadï soimaaxi ibuadagi aatïmï. Dai go sïïrhikami mosïkaxi namïakatadai asta aidïxi ayi Suxi Kristo ix makïdï ïr go pipiixaradï go Abraamkaru. Dai ïkobïrakoga daiñi, aidïxi Diuxi aagidi go Abraamkaru go bhai ïrhiaragai ñoki ïïgi aagidi ïgai kaxkïdï gï maatï sai kabami namïga go bhai ïrhiaragai ñoki. Dïï gia aidïxi maa Diuxi go sïïrhikami go Moiseskaru otoi ïgai tïtïañikarudï xi aituldana gobai. Kaxkïdï gï maatï sai otïrhioma namïga go sïïrhikami. Diuxi maa go sïïrhikami go Moises aidï dai bhodïrï go Moises aiturhi go sïïrhikami go odami. Gobai itïiya ïrhidi sai aidïxi maa Diuxi go sïïrhikami muidukatadai ïgai dai bhai dui go ñoki. Ïmo padïrï dajatadai Diuxi ïmadï tïtïañikarudï ix makïdï otoi ïgai dai aagai ïgai ixdukatai bia xi duñagi go odami. Dai ajadïrï darakatadai go odami dai ïgai bhai aa ix ibuadagi ixtumaxi aagidi Diuxi. Dai ïrana dajatadai go Moises dai ñokiturhi ïgai Diuxi go odami buitapi dai ñokiturhi ïgai go odami Diuxi buitapi ïpï. Dïï gia aidïxi Diuxi aagidi go Abraamkaru go ñoki aagaitai go bhai ïrhiaragai aidï gia mai otoi ïgai ïmai ix dukai iduitadai go Moiseskïdï. Ïïgi aagidi Diuxi go Abraam tudu. Kaxkïdï gï maatï sai bamioma namïga go bhai ïrhiaragai xi bhai xi go sïïrhikami. Diuxi potïtïdai go Abraam sai kïïga iduñagai ix dukatai aagidi ïgai, sai maaki agai ïmo gïdukami bhai ïrhiaragai bïïxi óídakami bïïtarï tudu. Dai mai biïgatadai xi tomarhi ïmo odami iduñagi ixtumaxi saidi maakiagi gobai.

^21-22 Daiñi, Diuxi kïïgakïrï nïidi odami buaboitudakai ïgai Suxi Kristo dai mamaakai ïgai gubukarhigai sai kïïgakïrï óídakana bïïxkïrï bïïtarï. Gobai ïr go bhai ïrhiaragai ix makïdï agaitadai Diuxi ïïki aidïxi aagidi ïgai go ñoki go Abraamkaru. Dïï gia go sïïrhikami tomarhi ïmo imidagai mai maa gubukarhigai odami sai kïïgakïrï óídakagi. Xi go sïïrhikami soiñamudai odami xi kïïgakïrï óídakagi aidï gia kïïgakïrï nïijadamudai Diuxi odami ïïgiditai odami go sïïrhikami. Dïï maiti ïr podukai. ¿Gobai ix tïiya ïrhidi sai gïn bupui bïïtïkan duu go sïïrhikami ïmadï go ñoki ix makïdï aagidi Diuxi go Abraamkaru aagaitai ïmo bhai ïrhiaragai? Cho. Xadïrï. Bhaiyoma go sïïrhikami ïgai dai maatïturhi bïïxi oidigi daama óídakami sai ïr soimaaxi ibuadami. Go sïïrhikamikïdï mamaatïrïi odami saidi ïr gïpiïrï bïïtïkami. Ïgaikïdï mamaatïrïi odami sai tïgito ïmo kïïgakïrï bubiadami tudu. Soikïi gobai odami sai buaboitudaiña Suxi Kristo tudu. Podukai go sïïrhikami ïmadï aatabuayi go ñoki ix makïdï aagidi Diuxi go Abraam ïïki aagaitai go bhai ïrhiaragai.

²³ Ïkioma mai kia maatïkatai aatïmï sai Diuxi kïïgakïrï gïr nïijadamu buaboitudatai aatïmï Suxi Kristo tudu dai aidï ïmo tïtïgiadami ñoki dukaikatadai go sïïrhikami gïr bïïtarï. Dai biakatadai aatïmï xi ïïgiadagi. Kabami gïr tïanïdan buadana go sïïrhikami aidï. Maamaixakan duu gïr biakatadai go sïïrhikami tudu. Dai mai biakatadai aatïmï ix dukatai kïïgakïrï bubuakiagi. Asta gokiïrï gïr tïtïïgidi Diuxi sai kïïgakïrï gïr nïidi ïgai mos buaboitudakai aatïmï.

²⁴ Ïmo tïtïgiadami ñoki duu gïr bïïtarï go sïïrhikami tudu. Gobai gïr tïtïgidi sai buañixikami bipiïyi aatïmï buaboitudakai aatïmï Suxi Kristo.

²⁵ Xibi gia ka máí aatïmï sai ka kïïgakïrï bubuaka aatïmï buaboitudaitai xi kaxkïdï ka maiti gïr tïanïi go sïïrhikami xibi.

Pokaiti Pabora sai aatïmï ix makïdï buaboitudai kaxi ïr maamaradï Diuxi dai ïr piipixaradï aatïmï go Abraamkaru

²⁶ Daiñi, xibi bïïxkatai aatïmï ïr maamaradï Diuxi buaboitudakai aatïmï Suxi Kristo. Kaxkïdï ka mai bia aatïmï xi ïïgiadagi go sïïrhikami sai kïïgakïrï gïr nïijadagi Diuxi.

²⁷ Aidïxi buaboitu aatïmï Suxi Kristo uraba bii aatïmï ïgai tudu dai ka ïmo odami dukai bii aatïmï ïgai ïmadï.

²⁸ Pomaaxi bïïxkatai aapimï ix makïdï ka buaboitudai. Xibi ïmadugan dukai gïn nïidi Diuxi bïïxkatai aapimï. Mai xudu xi ïr judiukagi ïmoko xiïpï xi maiti ïr judiukagi ïpï, xi ïr ïmo soigaxikami dukai pioñikagi ïgai xiïpï xi maiti ïr pioñikagi ïpï, xi ïr kïïrhikagi ïgai xi ïr okikagi ïpï. Mai xudu, tomax dukai ka ïmo odami dukai bii aapimï bïïxkatai bïïna darakatai Suxi Kristo.

²⁹ Dai bïïna darakatai aapimï Suxi Kristo gobai itïiya ïrhidi saidi ïr piipixaradï aapimï go Abraamkaru dai gïn ajïga xi gïn aiyagi go bhai ïrhiaragai ix makïdï aagidi Diuxi go Abraam. Gobai ix makïdï aagidi ïgai saidi iduña agai piipixaradï bïïtarï tudu.