Filemon 1 - Northern Tepehuan Bible

Pabora otoxdi ïmo biatuldaragai go kïïrhi Filemon dai jaa buaboitudadami

¹ Bhaiga aapi Filemon. Aanï ïr Pabora dai gï otoxdi idi ojai tanai maixakaruana dakatai aanï. Gin maixatu aanï ïïgiditai aanï Suxi Kristo tudu. Dai tanai gin ïmadï daja go Timoteo ïpï. Kïïga gï oigïdai aatïmï aapi Filemon. Aapi ïr ïmo gïr aduñi Diuxiamadïrï tudu dai kïïga gïr ïmadï gaatabuayi aapi Diuxi aaduindadïrï. Kaxkïdï gï otoxdi aatïmï idi ojai aapi gï bïïtarï

² dai bïïxi go buaboitudadami bïïtarï ïpï ix makïdï gïn ïmpaiñdi ami aapi gï kiiyïrï. Dai idi ojai ïr bïïtarï gïr aduñi oki Apía tïgidukïdï ïpï ïmadï go kïïrhi Arkipo ix makïdï soimaaxi taatamaiña gïr ïmadï ïmo sandaru dukai gaatabuadatai Suxi Kristo bïïtarï. Bïïxkatai ïgai bïïtarï idi ojai tudu.

³ Ipïrhidi aanï sai Diuxi gïr Oga ïmadï Suxi Kristo Gïr Nukadakami gïn tïïgidana xïï kïï tuiga ïgai gïn bïïtarï dai sai gïn maakana ibhïxtaragai gïn ibhïdagïrï.

Go Pabora aagai ix dukatai daanturhiña ïgai go Filemon

^4-5 Gin aduñi Filemon, dudatai kajiomakana aanï xïï kïïga oigïdai aapi bïïxi go buaboitudadami dai xïï kïïga buaboitudai aapi Suxi Gïr Nukadakami ïpï. Kaxkïdï bïïxkïrï xïxkadï gï daanturhiadagi aanï aagidiña aanï ïmo Diuxiatanamїidaragai Diuxi aapikïdï.

⁶ Gin aduñi Filemon, kïï maatï aapi sai bia aapi naana maaxi bhai ïrhiaragai buaboidaitai aapi Suxi Kristo dai bïïna dakatai aapi ïgai. Dai gï daanturhiña aanï sai kïïga maatïkana xïï kabami bia aapi bhai ïrhiaragai Suxi amadïrï dai sai go naana maaxi bhai ïrhiaragai gï gubukatudana sai bhaigakana aapi xi soikïdagi jaa aipakoga sai bamioma gupukana buaboidaradï ïgai ïpï.

⁷ Aapi gin aduñi Diuxi amadïrï, kïïga ïr ïmo gïdukami bhai ïrhiaragai in bïïtarï dai ïmo abïnakidaragai in bïïtarï ïpï maatïkatai xïï kïïga oigïdai aapi jaa. Kïïga gupurtudai aapi iibhïadï jaa tudu oigïdaitai aapi. Dai gobai ïr ïmo gïdukami bhai ïrhiaragai in bïïtarï.

Go Pabora aagidi go Filemon sai kïïga oigïdaiña ïgai go Onesimo

^8-9 Aapi gin aduñi Filemon, kïïga maatï aapi sai kaxi ïr kïrhiodami aanï dai maixapi aanï tanai oiditai aanï Suxi Kristo. Kïïga maatï aapi ïpï sai gï oigïdai aanï dai kaxkïdï gï daanïi aanï saidi kïïga ibuadagi aapi ixtumaxi ïr sïïrhi, ixtumaxi gï aagidamu aanï tami bhaitïkioma. Kïïga bia aanï oigaragai xi gubudakïdï gï tïanïdagi tudu biakatai aanï ïmo sïïrhikami Suxi Kristo amadïrï. Dïï gia gïr oigïdai aatïmï dai kaxkïdï kïï bhai dukai gï taanïdamu aanï bhaiyoma xi gin ïïgiada aapi.

¹⁰ Gï tanïi aanï sai kïïga bhai dukai nïijada aapi go Onesimo tudu. Gin maara dukai nïidi aanï Diuxi amadïrï tudu. Ïgai gin ïmadï buaboitu maixapikatai aanï tami.

¹¹ Baasïkioma maiti ïr soiñikana go Onesimo aapi gï bïïtarï dïï gia xibi ka buaboitu gobai dai xibi gia gïïpi ïr soiñi ïgai aapi gï bïïtarï dai aanï in bïïtarï ïpï.

¹² Aapi Filemon, xibi gï otosdamu aanï go Onesimo ïpamu tomaxi kïïga oigïdai aanï dai ipïrhiditadai aanï xi tami gin ïmadï biyagi ïgai.

¹³ Kïïga maatï aapi sai gin maixatu aanï aagaitai aanï go bhai ïrhiaragai aatagi. Dai ipïrhiditadai aanï xi tami gin ïmadï dakamudai go Onesimo sai podukai gin soikïdamudai ïgai maixapikatai aanï. Podukai gin soikïdamudai ïgai ïpïan dukai ix dukatai gin soiñamudai aapi ix tami gin ïmadï dakamudai aapi.

¹⁴ Dïï gia maiti ipïrhidi aanï ix tami biyagi go Onesimo ix aapi mai bhai aagagi. Gobai ïr ïmo gïdukami soiñikamudai in bïïtarï aapikïdï dai kïïga bhai maaxkami. Dïï gia maiti ipïrhidi aanï xi gubukamikïdï ibuadagi aapi ixtumaxi bhai maaxi. Ipïrhidi aanï bhaiyoma sai ïïgi gï bhai ïrhiarakïdï ibuadagi aapi.

^15-16 Daiñi, po in ïrhidi aanï sai Diuxi ïgai dai idui sai bïïxkïrï bïïtarï biaka aapi go Onesimo gï ïmadï. Dïï gia ka mai mosïkaxi ïmo gï pioñi ïgai gï bïïtarï xibi. Xibi ïmo gï aduñi ïgai Diuxi amadïrï gï bïïtarï. Maatï xi pomaaxi bïïtarï gï agaitadai xi gï dagitoagi ïgai lachi baasïkioma bhaigobai dibiakai ïgai sai podukai xibi gï ïmadï biakagi aapi ïpamu bïïxkïrï bïïtarï gamo imïkai ïgai ïpamu. Podukai ka mai mosïkaxi ïmo gï pioñiga dukai nïijada aapi dai bhaiyoma ïmo gï aduñi Diuxi amadïrï dukai nïijada aapi ka buaboitudakai ïgai. Aanï gia kïïga ïmo gin aduñi Diuxi amadïrï dukai nïidi dai oigïdai. Dai aapi asta bamioma kïïga oigïdai xi aanï. Kaxkïdï tudu kïïga oigïdai aapi gï pioñigakatai ïgai dai oigïdai aapi gï aduñikatai ïgai Diuxi amadïrï ïpï.

¹⁷ Daiñi aapi Filemon, kïïga gïr aaduñi miadïrï dukai aatïmï gïr ïïmadatai aatïmï. Dai xibi gï daanïi aanï pïsai podukai nïijada aapi go Onesimo ïpï dai pïsai bhai ïrhiarakïdï miadïgida aapi mïï aïkai ïgai, ïpïan dukai xi bhai ïrhiarakïdï gin miadïgidamudai aapi aanï mïï aïkai aanï ïpï.

¹⁸ Dïï gia ix soi gï duñi ïgai baasïkioma xiïpï xi gï buatulda bii ïgai, aidï gia gin taañiñi aanï bhaiyoma dai podukai ïgai ka maiti gï buatuldagi.

¹⁹ Ka podukai ojaimi aanï ïïgi gin nobikïdï tudu dai gï aagidi saidi gin tanïna aapi dai aanï aagai sai gia gï aa namïidamu aanï. Po kaiti aanï tomaxi aanï ïgai dai gï aiturhi go bhai ïrhiaragai aatagi xi ka kïïgakïrï busai aapi. Gobai ïr ixtumaxi kïïgakïrï namïakami ix makïdï gï maa aanï dai xadïrï gin aa namïidana aapi gobai.

²⁰ Pomaaxi gobai, aapi gin aduñi Diuxi amadïrï. Ipïrhidi aanï sai gin duiñdana aapi ïmo kïïgadukami soiñi kïïga miadïgidakai aapi go Onesimo. Podukai iduñi tudu in bïïtarï, ïmo aadunumïkatai aatïmï. Ka bïnaka daraja aatïmï Gïr Nukadakami Suxi Kristo di. Kaxkïdï gin maaka ïmo bhai ïrhiaragai gin ïïgiditai dai kïïga gï abhana daasa go Onesimo.

²¹ Kïïga buaboitudai aanï sai gin ïïgiadamu aapi. Kaxkïdï gï ojidi aanï. Dai po in ïrhidi sai asta bamioma iduñimu aapi ixtumaxi ïr kïïga dai mai xu xi mosïkaxi iduñimu aapi ixtumaxi gï tanïi aanï.

²² Ipïrhidi aanï ïpï sai bhai duna aapi xako gin urhiñagi aanï mïïka gï dibidakai aanï. Maatï aanï sai aapi ïmadï go gaa buaboitudadami ami daanïiña Diuxi in bïïtarï sai busaiña aanï tabhiadïrï maixakaruañdïrï sai podukai gamo gïn dibidagi. Dai buaboitudai aanï sai podukai gin daanturhikatai aapimï sai Diuxi gin maakimu oigaragai xi gamoko gïn urabagi aanï.

²³ Diuxkïdï gï biaturhi Epafras. Ïgai maixapi tanai gin ïmadï ïpï. Gï maixatu ïgai ïïgiditai Suxi Kristo gin ïpïan dukai ïpï.

²⁴ Diuxkïdï gï biaturhi go Markos dai go Aristarko dai go Demas dai go Lukas ïpï. Gobai bïïxkatai gin soikïiña gin aaduindagïrï.

²⁵ Ipïrhidi aanï sai Suxi Kristo Gïr Nukadakami gïn tïïgidana xïï kïï tuiga ïgai bïïxkatai aapimï buaboitudadami ami gïn bïïtarï. Mosïkaxi.