Exodo 27 - Northern Tepehuan Bible

Gïr Nukadakami aagidi Moises ix dukatai duñagi go daxdakarui xadutudikami xako daxdagi buxtaki tukugadï

¹ Gïr Nukadakami aataga ïmadï Moises daidi itïtïdai, —Duñiñi ïmo daxdakarui xadutudikami maakoba xixixokami. Kïï kabakami uxikïdï iduñi ix makïdï Akacia tïgidu. Goka metro dan ïmokobhai dan taama centimetros iduñi gajiakoga dai tïbïakoga ïpï. Dai ïmo metro dai ïmokobhai dan taama centimetros taiyakoga— itïtïdai.

² —Bhodïrï bïï maakoba xixixodïana ikïsa aagaka maaxkami kukugadï. Gï agai xi kïï kabakan araspikan biiyagi go aagadï go daxdakarui xixixodïrï. Bhodïrï bïïxi sudakami itïïkida bronse go daxdakarui— itïtïdai Gïr Nukadakami.