Exodo 25 - Northern Tepehuan Bible

¹ Dai Gïr Nukadakami aataga ïmadï Moises tubidakïrï dakatai daidi itïtïdai, —Aapi Moises, ipïrhidi aanï xi go Israelitas gin duiñdana ïmo baaki xadutudikami.

^2-3 —Aagidañi go Israelitas sai gin oida ïgai naana maaxi oro dai plata dai kobre duñixikami maaxi ixtukïdï kïïsagi go baaki. Ïïgi xorai bhai ïrhiarakïdï gin urhiñda ïrhiadagi go maaxi bañidaragai bïïtarï go baaki. Mosïkaxi ix makïdï bïïxi bhai ïrhiarakïdï gin oida ïrhiada ixtumaxi gï agai xi gin buapidagi oidaragai. Maigobai go ix makïdï mai bhai ïrhiarakïdï gin buapa agadagi ixtumaxi gobai gia maitï agai xi gin oidagi ixtumaxi.

⁴ Gï agai xi gin oida ïgai ikuxi ïpï tïbagi tïdoika maaxkami dai moraduakami ïpï dai bïgikami dai kïï duñixikami toa ikuxi dai xibato popodï ïpï duñaragai bïïtarï go baaki.

⁵ Gï agadamu ïpï kañiñiru kïkïïrhiadï ojogidï ix makïdï tintamadi bïgikamikïdï dai jaa ojogi ix makïdï bamioma ïr kïkïïgadukïdï. Dai uxi kaapakami ïpï ix makïdï Akacia tïgidu.

⁶ Ipïrhidi aanï xi gin oida ïgai asaiti ïpï kudakarui bïïtarï. Dai perfume ïpï ixtukïdï bhai gï buayi go asaiti ix makïdï gï totoidi gobai dai podukai ïkobai gï darasai ixtumaxi Diuxi bïïtarï. Go perfumekïdï gobai gï ibuayi ïpï go ix makïdï gï mïmïidi xadutudiïrï dai xigian ubai kubhiadï.

⁷ Dai ipïrhidi aanï xi gin oida ïgai ojodai kïi namïakami darasaragai bïïtarï go xadutudikami basaragai ix makïdï gï duñimu. Go basaragai gobai Efod tïgidukamu. Dai agadamu ojodai darasaragai bïïtarï ïpï go ix makïdï taagiïrï bhïï aimïradamu go kïïrhi ix makïdï daasa iñagai aanï.

⁸ Ipïrhidi aanï xi gin duiñdagi go Israelitas ïmo xadutudikami kii xako oidakagi aanï gïn saagida.

⁹ Kïïga abïr gïn tïgito nïida dai ïïgi ix dukatai gïn aagidagi aanï podukai abïr duñi go baaki ïmadï bïïxi ix makïdï ïrana daraja agai.

¹⁰ Duñibïrai ïmo kajoñi kïï finuakami uxi ïmo metro dan bhaibuxtama centimetros tïbïakoga dai baikobhai dan taama centimetros gajiakoga dai baikobhai dan taama centimetros taiyakoga.

¹¹ Daidi tïkida oro go kajoñi bïïxi sudakami kidigamadïrï dai ïrabiadïrï. Dai bhodïrï orokïdï iduñi tïñidï go kajoñi ïpï.

¹⁷ Go ïï orokïdï iduñi go kajoñi iñaparadï ïmo metro dan bhaibuxtama centimetros iduñi tïbïakoga dai baikobhai dan taama centimetros gajiakoga.

^18-19 Bïï goka padïrï go iñaparagai gï agai xi tutusagi goka Diuxi tïtïañikaru maaxkami ix makïdï ajana. Martiokïdï sosona go oro dai bhobai baaxi iñaparana iduñi go tïtïañikaru xi mos ïmo aaduindagaikagi ïgai ïmadï go iñaparagai.

²⁰ Gï agai xi bupuidïrï gukakagi go Diuxi tïtïañikarudï kajoñi iñaparadïamako dai koidamu gukakan dukagi momodï. Dai go ajanadï gï agai xi tïkabi gï komarakan dukai iñakagi dama go iñaparagai.

²¹ Bhodïrï go sïïrhikami ojodiana ojixikami ix makïdï bhai duña iñagai aanï gïn ïmadï gï agadamu xi kajoñi ïrana dasagi daidi dama tïkiagi iñaparadï.

²² Go Xadutudikami Kajoñi biakami go sïïrhikami gobai iñaparadï dama dai go tïtïañikaru ïrana, abhaipïrï gï buidïrï ayimu aanï dai aagidamu aanï bïïxi ixtumaxi ix makïdï tïanïdamu aanï go Israelitas— itïtïdai Gïr Nukadakami Moises.