Exodo 20 - Northern Tepehuan Bible

¹ Aidïxi ka tïbai Diuxi ami tubidakiana tai maa ïgai sïïrhikami. Adukai aagai ïgai.

² —Aanï ïgai daidi ïr Diuxi gïn Nukadakami— ikaiti Diuxi. —Aanï tudu ïgai daidi gïn bubaitu Ejiptuañdïrï xako axñiñitu dukai gïn aa duiñturhitadai go óídakami.

³ Maiti abïr Diuxi dukai buaboidada ïmai dai xadutuada. Mosïkaxi aanï Diuxi abïr gin xadutuada gin buaboitudaitai dai mai xu ïmai.

⁴ Maiti abïr ibuada uubixi maaxi ïpïamaaxkami ixtumaxi oidaga tïkabi tïbagiana xiïpï oidigi dama xiïpï sudagiana ïpï. Go uubixi maaxi maiti abïr ibuada gobai dai maiti abïr aagada ix makïdï Diuxi aagada ïrhiadagi aapimï.

⁵ Maiti gï aagai mïxi kuikïskïdagi buidïrï go maaxi xadutudaitai. Mosïkaxi aanï ïgai daidi ïr Diuxi daidi Nukadakami tïgidu aanï. Ix buaboida agadagi aapimï ïmai aidï gia bhamukamu aanï. Aituldamu aanï gïïgïbidaradï ix makïdï gin kïïdai dai soimaaxi ibuayi. Dai maamaradï ïpï taatamu gïïgïbidaradï ïmadï bopoxikadï dai piipixaradï.

⁶ Dïï gia ix makïdï gin oigïdai dai gin ïïgida kaï ïgai gia oigïdamu aanï tomax tuigako ïmadï maamaradï dai bïïxi ix makïdï muidagi abhiadïrï maigobai.

⁷ Aanï ïgai dai bïïxi adama ïr xadutudikami kaxkïdï gï agai mïxi xadutuadagi gin tïtiaraga ïpï. Diuxi gïn Nukadakami aanï dai aanï gïïgïbituldamu ix makïdï mai xadutuadagi gin tïtiaraga.

⁸ Xadutuadabïrai go ibhïxtaragai tasai. Aanï gin bïïtarï gobai.

⁹ Naadami tasai ukami bia aapimï xi gaatabuadagi.

¹⁰ Dïï go kubarakami tasai kugatïrï gobai gia ïr Diuxi Gïr Nukadakami bïïtarï. Aidï tasïrï maiti gï agai xi gaatabuadagi toma lïïchi. Tomarhi gïn maamara ïpï maiti agai xi gaatabuadagi, tomarhi gïn pipioñiga, tomarhi gïn sosoiga, tomarhi xibhïadïrï óídakami ix makïdï gïn saagida óídaga bïïxi maiti agai xi aatabuadagi.

¹¹ Aidïxi kïi Gïr Nukadakami oidigi naadami tasai aatadui ïgai dai bïïxi naato idui ïgai tïbagi ïmadï oidigi dai sudagi ïmadï bïïxi ixtumaxi oidaga. Dai xadiko ka mai aatadui ïgai ka natokai aaduindadï. Kaxkïdï Gïr Nukadakami kïïgadukami aagai go ibhïxtaragai tasai dai xadutudikami dáí.

¹² Xadutuadabïrai gïn ojoga ïmadï gïn dïïdï bai podukai tïbïpion óídaka aapimï xako gïn maaki iñagai aanï mïxi óídakagi.

¹³ Maiti gï agai mïxi ïr gamuakamikagi.

¹⁴ Aapimï kïkïïrhi abïr mai abhana bopoda oñigadï ïmai. Dai aapimï oki abïr mai abhana bopoda kïïrhi ix makïdï maiti ïr gïn kuna.

¹⁵ Maiti abïr gaïxiada.

¹⁶ Maiti abïr yaatagiada gïpiïrï buaja ïrhiditai ïmoko gïn aaduñi go yaatagikïdï.

¹⁷ Maiti abïr ïgamuda aapimï baakidï ïmai tïïgakai xi ïpï oñigadï xi ïpï pioñigadï xi ïpï sosoigadï tuturu, xi ïpï axñiñitu. Ïïgi ixtumaxi biakagi ïmadutai óídakami. Maiti abïr biaka ïrhiada gobai— itïtïdai Diuxi gamaakaitai sïïrhikami.