Exodo 19 - Northern Tepehuan Bible

^1-2 Kaxi pogïduitadai baika masadai xi bubuaka go Israelitas abhiadïrï Ejiptuañdïrï. Dai bhodïrï Refidimandïrï bubuaka ïgai dai ayi ïgai xako gïï kaatï oidigi Sinaí tïgidukïdï xako mai tipu óídakami. Ami gïn urhi ïgai buidïrï go tubidaki ix makïdï ïr Sinaí tïgidukïdï ïpï.

³ Ami tubidakïrï tïsai Moises dai aataga agai ïmadï Diuxi. Dai Gïr Nukadakami nobai tubidakiañdïrï ñokidi Moises daidi itïtïdai, —Idi ñoki aagida aapi go Jakobo piipixaradï, go Israelitas tudu. Aagidañi xi adukai aagai aanï sai,

⁴ —Aapimï ïr nïijadami ix dukatai duñi aanï go Ejiptuïrï oidakami aidïxi gïn bubaitu aanï abhiadïrï Ejiptuañdïrï. Gïn aagidamu aanï ïmo maaxidaragai dukami xi maatïkagi aapimï ix dukatai gïn nukadai aanï. Daiñi, kïï maatï aapimï go bhagai ix dukatai oigïdai ïgai maamaradï. Upiïrï kukuspui ïgai dai nunukadai tudu. Dai aanï podukai gïn nukagi ïpï boiyamu iimïitai aapimï dai gïn bua aanï tanai xako daja aanï. Bïïxi ïr nïijadami aapimï ix dukatai gïn nukagi aanï— tïdamu aapi go Israelitas— itïtïdai Gïr Nukadakami go Moises.

⁵ —Aanï bhaiduñimu ñoki gïn ïmadï dai gï aagadamu xi kïïgakïrï ïïgida kaïkagi aapimï gin ñoki dai mai gajiadïrï biagi toma lïïchi aidï gia gïn bhïimu aanï ïïgi gin bïïtarï. Dai aidï gia aapimï ïr gin aaduñikamu ix makïdï bamioma oigïdamu aanï. Bamioma gïn oigïdamu aanï aapimï xi bhai go gaa oidigi dama óídakami tudu.

⁶ Ix gin ïïgiadagi aapimï aidï gia aapimï Israelitas gin darasakami ka agai odami. Ïïgi aanï gin bïïtarï ka agai aidï aapimï gin ïïgidakai—. Podukai itïïda aapi go Israelitas tudu— itïtïdai Gïr Nukadakami Moises.

⁷ Daidi go Moises bïïxi ïmpagi go bhaitï gukakamigadï go Israelitas dai aagidi bïïxi ix kaiti Gïr Nukadakami.

⁸ Dai go Israelitas bïïxkatai bhai aa ix dukai aagai Diuxi daidi potïtïdai ïgai go Moises sai, —Iduñimu aatïmï bïïxi aïkatai ixtumaxi gïr tanïdagi Gïr Nukadakami— ikaiti go Israelitas. Dai Moises mïï aagidi Gïr Nukadakami xi kaiti ïgai.

⁹ Dai bhodïrï Gïr Nukadakami potïtïdai go Moises, —Daiñi, ipïrhidi aanï sai gï buaboida kaïkana go odami. Kaxkïdï xibi ïmo ikomai kobokami saagida kïkibamu aanï aapi gï buitapi bai kaïkagi go odami atagaitai aanï aapi gï ïmadï. Podukai gia gï buaboituda kaïkamu go odami— itïtïdai Gïr Nukadakami Moises. Dai bhodïrï Moises ïpamu aagidi Gïr Nukadakami ix kaititadai go Israelitas.

¹⁰ Dai Gïr Nukadakami itïtïdai Moises, —Mïïka aagida go Israelitas sai bakuanana yukuxidï dai bhai gïn duna xibi dai xoroko bai gokiïrï gin xadutuada ïgai.

¹¹ Gï agai sai kïïga bhai gïn dukana ïgai naidi ayimu aanï tami Sinaí tubidakïrï. Bïïxi go Israelitas buitapi tïbañimu aanï tudu— itïtïdai Gïr Nukadakami Moises.