Exodo 14 - Northern Tepehuan Bible

¹ Mai kia ijitadai go Israelitas Etamañdïrï tai Gïr Nukadakami aataga ïmadï Moises daidi itïtïdai,

² —Aagidañi go Israelitas sai aa surhigïna tabhiadïrï. Dai sai iimïna Piariotamakoga dai ami gïn urhiñana buidïrï Baalsefón xako abhiadïrï ïmo padïrï kaatï Migdol dai ajadïrï kaatï go gïï sudagi. Aagidañi sai ami gïï sudagi ugidana gïn urhiñana ïgai.

³ Ipïrhidi aanï xi pomaaxi ibuada aapimï bai podukai go Ejipituana Rey buaboida agai xi ka xibhï bua aapimï go boi dai mos ïr ïki iimiadï aapimï.

⁴ Dai Aanï ïpamu mai ïïgidaratudamu go Ejipituana Rey xi ïgai gïn tïgitomu dai gïn gokiïrï gïn aadaimu. Dai bhodïrï aanï bui kïkibamu go Rey ïmadï sandadarugadï dai gokiïrï go Ejipituana oidakami nïijadamu xïï gubuka aanï. Dai nïijadamu xi aanï ïr Nukadakami— itïtïdai. Dai aa surhi go Israelitas daidi idui ix dukatai agaitadai Diuxi.

⁵ Daidi go Ejipituana Rey máí xi ka mai ïpamu dadi agaitadai go Israelitas. Dai ka ïma dukai gïn tïgito ïpamu go Rey ïmadï sonoïrï gukakamigadï daidi kaitimi, —Ix tuixi dagito aatïmï go Israelitas xi bopiagi dai xi dagitoagi ïgai go aaduindagai— ikaitimi.

⁶ Dai go Rey oton bhai dui soigadï kareta ix makïdï ïr kokodi bïïtarï dai mïï sobhida agai go Israelitas. Dai sandadarugadï bïïxi oi ïpï.

⁷ Bhïkai ïgai naadan ciento karetas ix makïdï ïr kïïkïgadukïdioma. Dai ïkobïrako go gupudagai bipiakami bhïkai bïïxi go gaa karetas ix makïdï Ejipituana oidaga dai aadaji go Israelitas ïpï.

⁸ Gïr Nukadakami ïgai dai mai dagito go Rey xi ïma dukai bhïiyagi tïgibudagai bai ïgai mos apia mai ïïgidaraga dai aadaji ïgai go Israelitas tomaxi gïïpi gubukadakïdï bubuajatadai ïgai abhiadïrï. Dïï bïïxkïrï Gïr Nukadakami nukatugai go Israelitas.

⁹ Bïïxi go Ejipituana sandadaru iji dai bukai sosoigadï karetas ïmadï kaapayu ixtukïdï bapainxïkïi ïgai go karetas. Bïïxi iji ïgai dai aadaji go Israelitas mïï miadïrï Piairotïrï ukami xako gïn urhiñatadai ïgai buidïrï Baalsefón.

¹⁰ Go Israelitas sïïrhikïdï duduadimu tïïgakai go Ejipituana sandadaru ix ka aijimitadai ïgai. Dai daañimi ïgai Gïr Nukadakami sai soiñana.

¹¹ Daidi bui ñiño ïgai go Moises daidi itïtïdai, —Tui pïxi gïr bubaitu aapi Ejiptuañdïrï dai tami gïr bua. Maiti ix tipu Ejipituana xako yaasagi koidadï xi tanai gïr buapai aapi ix koiyagi aatïmï oidigana.

¹² ¿Maiti ix podukai agaitadai aatïmï aidïxi kia Ejipituana darajatadai aatïmï?— itïtïdai go Israelitas. —Gïr dagitoñi aapi Moises— gï tïtïdai aatïmï aidï kia Ejipituana darakatai aatïmï. —Xioma ïr kïïga xi axñiñitu dukai gïr aaduintulda go Ejipituana óídakami dai mai xu ix koiyagi aatïmï no xibhï oidigana— gï tïtïdai aatïmï aidïpïrï.

¹³ Daidi Moises aa noraidi dai potïtïdai, —Maiti abïr duduadikuda. Gï agai mïxi guputuda gïn iibhïdaga daidi tïïgiadagi ix dukatai gïr soiñamu Gïr Nukadakami. Kïïga abïr gïn tïgito nïijada go Ejipituana sandadaru ix makïdï mïkadïrï gukigi— itïtïdai. —Ïgai laachkïdï ka mai tiputa agai— itïtïdai.

¹⁴ —Maiti abïr buamï gïn ïrhiada. Gïr Nukadakami baaki agai gïn bïïtarï— itïtïdai Moises go Israelitas.

¹⁵ Daidi Gïr Nukadakami aataga ïmadï Moises daidi itïtïdai, —Tui pïxi mos dakatai gin tanïi soiñi. Obaidañi tudu dai abïnakidida gï aaduñi dai oijada gïn imidagai— itïtïdai.

¹⁶ —Sïïrhiñañi gï uxiaraga go gïï sudagi dama. Podukai gï kupiokamu go sudagi ïrana xi ami sïïrhi gakikïrï dïgabuñimu go Israelitas— itïtïdai Gïr Nukadakami.

^17-18 —Aanï maakimu tïgibudagai go Ejipituana sandadaru xi ïgai mos aapia gïn adiadamu. Dai aidï gia naato xia duadamu aanï go Ejipituana Rey ïmadï sandadarugadï dai sosoigadï dai nïidamu aapimï xïï gubuka aanï— itïtïdai. —Aidï gia bïïxi go Ejipituana óídakami maatïkamu xi aanï ïr Nukadakami— itïtïdai Gïr Nukadakami Moises.

¹⁹ Daidi Diuxi tïañikarudï kïïkigitadai go Israelitas bhaitïki dai xibi ka gokiamadïrï kïïkigi ïgai. Dai ami Israelitas gokiïrï kïi ïgai go gïï kubhuxi ix makïdï bhaitïki imïitadai ïpï.

²⁰ Dai go kubhuxi mos tukamutugaiña bogïdïrï go Ejipituana sandadaru dai podukai gobai ka mai tïtïïgai ix dukatai aiyagi go Israelitas. Dai go Israelitas bïïtarï go kubhuxi gia mos maaxtugaiña bogïdïrï bhaitïki. Podukai go sandadaru ïmo tukagi gïn aaga dai bïïxkïrï mai ayi go Israelitas.

²¹ Dai go Moises sïïrhiñtu uxiaradï go gïï sudagi dama dai xarhi utamajadïrï otoi Gïr Nukadakami ïbïrhi kabami ïmo tukagi. Ïgaikïdï gï kupioko go sudagi ïrana. Bïï goka padïrï mos kïkiban dui go sudagi dai ïrana gakikami bii dai pogïdui ïmo boi.

²² Ami sïïrhi dïgabusai go Israelitas gakikïrï dai go sudagi bïï goka padïrï mos bhidabiki maaxi bhaitoma.

²³ Dai bïïxi go Ejipituana Rey sosoigadï kaapayu ïmadï karetas bïïxi baapa ami adaimïitai go Israelitas.

²⁴ Xarhimodï sudagi ïrana iimïitadai ïgai tai Gïr Nukadakami kubhuxi ïrana daja dai nïidi dai mai mamaatïturhi xako sïïrhi iimiagi go Ejipituana sandadaru xi ïgai ïïgi gïn bupuidïrï gugukigi duduadimukïitai.

²⁵ Xia dodai Gïr Nukadakami taataradï kareta xi ka maiti ixtui ïgai xi dukatai gokiïrï aapia aadiagi go Israelitas. Daidi go Ejipituana sandadaru ikaitimi, —Kaxi ti gïr bui gïi go Nukadakami soikïitai gobai go Israelitas. Tï aa surhi bhaiyoma dai dagito gobai— ikaitimi go sandadaru.

²⁶ Dai ka sudagi ugidïrï bubuajatadai go Israelitas tai Gïr Nukadakami itïtïdai Moises, —Sïïrhiñañi gï ïka go gïï sudagi dama xi ïpamu kuupika bimu gobai dai iñamu gobai go Ejipituana sandadaru ïmadï sosoigadï kaapayu dai karetas— itïtïdai.

²⁷ Dai bhodïrï ka maaxikai oidigi Moises sïïrhintu ïkadï sudagi dama bai ïpamu gï kuu go sudagi. Mo maaxkami bii gobai ix maaxkatadai tukamïrï. Go Ejipituana sandadaru bopia ïrhiditadai dïï go sudagi biiñutu. Podukai Gïr Nukadakami sudarï dupitu go Ejipituana sandadaru.

²⁸ Go sudagi bïïxi iña go sandadaru ïmadï modukai sosoigadï karetas dai kaapayu ixtukïdï adaimïitadai ïgai go Israelitas. Ka mai bii tomarhi ïmoko ix makïdï ami baapatadai. Bïïxi koi ïgai.

²⁹ Dïï go Israelitas gia ka sudagi ïrana dïgabusaitadai gakikïrï. Dai bïï gokapadïrï bhidabikikan kïakatadai go sudagi.

³⁰ Podukai kïïgakïrï dïgabuiñtu Gïr Nukadakami go Israelitas dai go Ejipituana óídakami ka mai ayi. Dai aidï tasïrï go Israelitas nïidi go Ejipituana sandadaru koixikami xi mos sudaïrï ugidïrï bïïtï.

³¹ Dai go Israelitas mos tïïtïitoi Diuxi xïïxi ïr gïdukami ïgai kïïgakïrï gïn bubaidakai ïgai Ejiptuañdïrï. Daidi kaiti ïgai, —Gïr Nukadakami gia ïr gïdukami— ikaiti. Kïïga buaboitu ïgai Gïr Nukadakami tudu daidi kaitimi, —Gia ïr Diuxi otosadï go Moises. Gï agai tïxi ïïgida kaïkagi gobai— ikaitimi go Israelitas.