Exodo 11 - Northern Tepehuan Bible

¹ Bhodïrï Gïr Nukadakami itïtïdai Moises, —Xibi gia mos arhi ïmo gïgïbituldaragai biïga xi daituldagi aanï abhana go Ejipituana Rey ïmadï aaduñdï. Idikïdï gia gïn dagitomu ïgai xi iimiagi aapimï. Ka maiti ipïldamu ïgai mïxi darakagi tanai dai gïn adaimu ïgai bhaiyoma tabhiadïrï.

² Aagidañi bïïxi go Israelitas sai tanïna ïgai go Ejiptuïrï óídakïdï ix makïdï miadïrïioma óídaga naana maaxi oro dai plata duñixikami— itïtïdai Gïr Nukadakami Moises.

³ Daidi Gïr Nukadakami maa tïgibudagai go Ejipituana óídakami taidi ipïrhi ïgai xi soiñagi go Israelitas. Dai go sonoïrï gukakïdï go Rey ïmadï bïïxi go gaa Ejipituana óídakami kïï gïdukami dukai tïï go Moises.

⁴ Daidi Moises potïtïdai go Ejipituana Rey sai, —Pokaiti Gïr Nukadakami sai xibi ïran tukarï daibuña agai ïgai bïïxi xako ukami ajïga go Ejipto.

⁵ Dai koda agai ïgai kïkïïrhi bïïxi kiikiïrï ix makïdï ïr tukamidïrï maamaradï óídakami. Mos ïpïan ïxi daitudamu ïgai mukigami abhana bïïxi kïkïïrhi ix makïdï ïr gaxixïgi. Ayimu gobai gï maara aapi Rey ïpï ix makïdï ïr gaxïgi dai ix makïdï bhïiyi agai gï sïïrhikamiga. Dai mos podukai ayimu gobai soititigami maamaradï ïpï ix makïdï ïr gaxixïgi, tomaxi ïr maradïkagi ïgai go bamioma soitigami oki ix makïdï ïr kuxñirugadïkagi ïmai. Bïïxkïrï ayimu go mukigami ïmadï modukai go tukamidïrï maamaradï buxtaki.

⁶ Tomarhi ïmo imidagai mai podukai taatakana soi ïrhiaragai gï aaduñi aapi Rey dai tomarhi ïmo imidagai mai podukai taata agai ïpamu. Ka mos gïïgïrï kaitidamu suanïdami aipakoga Ejipituana.

⁷ Dïï gia Gosenïrï dodorhi darajamu go Israelitas. Ami gia mai taadakamu ixtumaxi. Tomarhi sosoigadï googoxi mai kujudamu aidï tukarï. Podukai maatïkamu aapimï sai Gïr Nukadakami mai ïïpïan dukai nïidi go Israelitas ïmadï go Ejiptuana óídakami tudu— itïtïdai.