Efesios 3 - Northern Tepehuan Bible

Pabora aagai Diuxi tïgibudadï ix makïdï ïxtokikana ïkioma

¹ Aanï Pabora maixapi xibi mos ïïgiditai aanï Suxi Kristo. Aagaiña aanï go bhai ïrhiaragai aatagi gïn buitapi aapimï ix makïdï maiti ïr judidiu kaxkïdï maixapi aanï xibi.

² Kïïga maatï aapimï sai Diuxi gin maa ïmo sïïrhikami ansai gïn aagidagi aanï xïï kïï tuiga Diuxi gïn bïïtarï aapimï ix makïdï maiti ïr judidiu.

³ Utudami gïn ojidi aanï chïki ojaikïdï baasïki dai gïn aagidi ix dukatai gï tïgito Diuxi ïki. Gïn aagidi aanï Diuxi tïgibudadï ix makïdï ïxtokikana ïkioma tudu.

⁴ Dïï gia xibi ix gïn tïgito nïijadagi aapimï go ojai ix makïdï idui aanï aidï gia aapimï ïpï maatïkamu gobai ix makïdï aanï máí. Máí aanï tudu sai gï tïgito Diuxi ïïki ix dukatai iduñagi Suxi Kristo. Gobai tudu ïxtokikana ïïki abhiadïrï.

⁵ Diuxi mai dagito ïïki óídakami xi maatïkagi ixdukatai gï tïgitokatadai Diuxi. Ïxtokatadai Diuxi tïgibudadï aidï. Dïï gia xibi Diuxi maaxiko aagidi Suxi ojotosadï ïmadï go aagadami Diuxi ñokidï. Podukai mosïkaxi ix makïdï Diuxi bïïtarï aatabuayi máí ix tumaxi gï tïgitokatadai Diuxi. Diuxi Ibhïadïkïdï aagidi tudu sai podukai maatïkana ïgai.

⁶ Podukai máí ïgai sai Diuxi ïki abhiadïrï kaxi gï tïgitokatadai sai go odami ix makïdï maiti ïr judidiu ïpïan ïxi biakana sïïrhikami ïmadï go judidiu. Diuxi ipïrhidi sai gïn bïïtarïkagi ïpï bïïxi ixtumaxi kïïgadukami ix makïdï Diuxi bia maamaradï bïïtarï. Xibi ka bïpïnakai Suxi Kristo kaxi ïr ïmo aadunumïkana go judidiu ïmadï ix makïdï maiti ïr judidiu. Gobai tudu ïr Diuxi tïgibudadï ix makïdï ïxtokikana ïkioma. Dai xibi gia go odami ix makïdï maiti ïr judidiu mos buaboitudakai go bhai ïrhiaragai aatagi ka ïpïan ïxi gïn ajïga xi biakagi ix makïdï Diuxi aagai sai maakiagai. Mos buaboidakai ïgai Suxi Kristo tudu.

⁷ Sïïrhikïdï kïï tuiga Diuxi gin bïïtarï tudu gin maakakai idi aaduindagai xi Diuxi gubukadadïkïdï aagada aanï go bhai ïrhiaragai aatagi bïïxi aipakoga.

⁸ Daiñi, tomaxi aanï ïr ïmo buaboitudadami bamioma mai namïakïdï, bïïxkïrï Diuxi gin maakai idi gïdukami bhai ïrhiaragai. Gin maa ïgai xi aagidagi aanï go ix makïdï maiti ïr judidiu xïï kïï tuiga Suxi Kristo gïr bïïtarï bïïnakai aatïmï ïgai. Odami tïgibudadï mai ajïi ix maatiagi xïïxi ïr namïakami Suxi Kristo gïr bïïtarï tudu.

⁹ Gin maa ïgai aaduindagai tudu ansai maatïtuldana odami ixdukatai gï tïgitokatadai go kïïsadami oidigi ïïki abhiadïrï. Mos ïxto biakana Diuxi tïgibudadï ïkioma aidï.

¹⁰ Dïï gia xibi ipïrhidi Diuxi xi tïtïañikarudï maatïkana xïï saitudaga Diuxi tïgibudadï. Sai tïtïañikarudï ix makïdï ïr gupudagai bipiakami dukai tïbagiana maatïkana tudu. Kaxkïdï xibi aatïmï buaboitudadamikïdï aatabuayi Diuxi dai aatïmïkïdï gatïtïïgidimi ïgai xïï kabami saitudaga tïgibudadï.

¹¹ Podukai tudu gï tïgito Diuxi ïki abhiadïrï mai kia kïkibakai go oidigi. Dai xibi Suxi Kristo Gïr Nukadakami kïïga idui bïïxi ixdukatai Diuxi gï tïgito ïïki.

¹² Suxi Kristo kïïga idui ixdukatai Diuxi gï tïgito ïïki kaxkïdï aatïmï xibi mai duadimudakïdï aatagïi Diuxi ïmadï mos buaboidakai aatïmï Suxi Kristo. Xibi kïïga bia aatïmï ïïmadaragai ïmadï Diuxi.

¹³ Kaxkïdï tudu gïn daanïi aanï xi maiti gïn dagitoagi aapimï ix soi gïn ïrhiadagi gin maixatudakai aanï tanai. Daiñi, gï agai xi kïïga xadutuadan taadakagi aapimï bhaiyoma xi gïn soikïitai gin maixatu aanï.

Go Pabora daanïi Diuxi go buaboitudadami Efesoïrï óídakami bïïtarï xi Diuxi maakana gubukadagai iibhïadïrï

¹⁴ Xudu mos tïgitokagi aanï xïïxi ïr gïdukami Diuxi tïgibudadï gin totonakïdï kïkibana aanï Suxi Kristo Ogadï buitapi.

¹⁵ Ïgai tudu ïr kïsakami oidigi dai tïbagi ïmadï bïïxi aïkatai ixtumaxi oidaga.

¹⁶ Kïïga maatï aanï sai Diuxi kabami ïr gïdukami kaxkïdï daanïi aanï saidi Ibhïadïkïdï gïn maakana ïgai gubukarhigai gïn ibïgaïrï.

¹⁷ Daanïi aanï sai Suxi Kristo kïïga biakagi oidagakaradï gïn iibhïdagïrï kïïga buaboitudaitai aapimï. Dai sai kïï kabakami dukai gukibana aapimï maatïkatai xïï kïïga gïn oigïdai Diuxi.

¹⁸ Podukai aapimï ïmadï bïïxi go gaa buaboitudadami kïïga maatï kaïkamu xïï kïïga dai xïï kabami gïn oigïdai Suxi Kristo.

¹⁹ Daiñi, odami tïgibudadï mai ajïi xi maatï kaïkagi xïï kïïga gïr oigïdai Suxi Kristo. Dïï aanï daanïi Diuxi sai gïn soiñana xi kïïga maatïkagi aapimï xïïxi gïr oigïdai ïgai. Aidï gia Diuxiañdïrï biakamu aapimï bïïxi aïkatai ixtuma biïgakagi gïn iibhïdaga bïïtarï.

²⁰ ¡Gï agai tudu xi kïïga xadutuadagi aatïmï Diuxi! Ïgai gubukarhigadï tudu aatabuayi gïr ïrabiadïrï. Dai ïgai bia gubukarhigai ixtukïdï ibuadagi gïïpi bamioma ixtumaxi xi bhai ix makïdï aatïmï bhaiga xi gïr tïgitoagi xi ïpï xi tañiagi ïpï.

²¹ Kaxkïdï Suxi Kristo gubukarhigadïkïdï gï agai xi aatïmï buaboitudadami maaxitudagi xïïxi ïr gïdukami Diuxi dai xïï kïï gubuka dai xi maaxituda aatïmï gobai bïïxkïrï bïïtarï. ¡Agia ïr buaboi gobai!