Efesios 1 - Northern Tepehuan Bible

¹ Bhaiga. Aanï ïr Pabora dai gïn otoxi idi ojai. Ïmo otosadï aanï Suxi Kristo, Diuxi ipïrhi xi ïr otosadïkana aanï kaxkïdï. Xibi gïn ojidi aanï idi ojai aapimï Efesoïrï óídakami ix makïdï Diuxi ïko bubaitu. Aapimï ix makïdï biïna daraka Suxi Kristo tudu dai mai dagitokai buaboitudai ïgai.

² Ipïrhidi aanï xi maatïkagi aapimï xïï kabami kïï tutuiga Diuxi Gïr Oga ïmadï Suxi Kristo Gïr Nukadakami dai xi ïgai gïn maakana sai kïïga gïn ibhïxtakan taadakagi aapimï.

Diuxi gïr maa gïïpi bhai ïrhiaragai bïïnakai aatïmï Suxi Kristo

³ Gï agai xi oigïda ñokadagi aatïmï Diuxi bïïtarï. Ïgai ïr Diuxigadï Suxi Kristo Gïr Nukadakami dai ïr Ogadï ïpï. Diuxi gïr maa bïïxi aïkatai bhai ïrhiaragai ix makïdï oidaga tïbagiana gïr ibhïdaga bïïtarï. Diuxi gïr maa idi bhai ïrhiaragai mos bïïnakai aatïmï Suxi Kristo.

⁴ Daiñi, ïïki, mai kia kïkibakai oidigi, Diuxi gïr darai sai aatïmï ïr ïko bubaidadïkana bïïna darakatai aatïmï Suxi Kristo. Aidïpïrï ïkiaxdïrï kaxi ïko gïr bubaitutadai Diuxi saidi aatïmï ïr ïko darasadïkana daidi sai mai tipukana soimaaxi gïr abhana ixtumaxi gïpiïrï gïr daitudagi ixtumaxi Diuxi buitapi.

⁵ Aidïpïrï kaxi gïr oigïdaitadai Diuxi. Kaxkïdï ïgai ïkiaxdïrï dáí saidi Suxi Kristo gubukadadïkïdï ïr maamaradïkana aatïmï. Podukai bhai ïrhi Diuxi. Kïï tuiga ïgai kaxkïdï.

⁶ Daiñi, Diuxi podukai dáí saidi aatïmï ïr maamaradïkana sai bhodïrï oigïda ñokadana aatïmï ïgai bïïtarï mos ïï kïïga tuigakatai ïgai gïr bïïtarï. Diuxi kïïgakïrï oigïdai Suxi Kristo ix makïdï ïr maradï Diuxi. Dai Suxi Kristokïdï gïr tïtïgidi Diuxi xïï kabami kïï tuiga ïgai gïr bïïtarï.

⁷ Suxi Kristo aaxi ïïgi ïradï gïr bïïtarï tudu. Kaxkïdï kïïgakïrï bubuaka aatïmï dai oigïrhikami bii aatïmï gïr soimaaxkamigakïdï bïïnakai aatïmï Suxi Kristo. ¡Xïï kïï tuiga Diuxi aidï!

⁸ ¡Kïïga gïr tïtïgidi ïgai xïï kabami kïï tuiga gïr bïïtarï dai xïï kïïga saitudaga tïgibudadï ïpï!

⁹ Daiñi, Diuxi gïr tïtïgidi tïgibudadï ix makïdï ïkioma ïxtokikana. Kaxi ïkiaxdïrï podukai gï tïgitokana ïgai xi Suxi Kristokïdï pobï gï duñagi ixtumaxi ïgai ipïrhidi tudu.

¹⁰ Dai Diuxi ka dáí ïmo tasai ixtuigako Suxi Kristo ïmapida agai bïïxi aïkatai ixtumaxi oidaga. Dai aïkai ïgai tasai Suxi Kristo kïïga ïmapida agai bïïxi gobai ix makïdï oidaga tïbagiïrï dai tami oidigi daama ïpï. Aidïpïrï bïïxi aïkatai ixtumaxi oidaga nïijadamu sai Suxi Kristo bïïxi adama ïr Tïanïdami.

¹¹ Ïkobai gïr bubaitu Diuxi bïïnakai aatïmï Suxi Kristo tudu. Tukamidïrï abhiadïrï ïïgi podukai gï tïgitokatadai Diuxi xi aatïmï ix makïdï bïïna daraja Suxi Kristo ïr ïko bubaidadïkana. Podukai dáí ïgai saidi ïpï gï duna ixdukatai ïgai ipïrhidi. Bïïxkïrï ibuayi ïgai ixdukatai gï tïgitokagi kaxkïdï.

¹² Diuxi ïgai dai ipïrhi dai podukai dáí xi aatïmï ïr ïpïgadioma buaboitudadamikagi. Ïgai ipïrhidi xi aatïmïkïdï gï maaxitudagi xïïxi ïr gïdukami ïgai dai xïï kïï tiodi kaxkïdï.

Pabora aagai sai bhai gï ïrhidi Diuxi Ibhïadï buidïrï

¹³ Xibi aapimï ix makïdï maiti ïr judidiu kaxi kaïkana ix makïdï ïr buaboi. Kaïkana aapimï go bhai ïrhiaragai aatagi tudu. Dai xibi ka buaboitudai aapimï Suxi Kristo ïpï dai ka kïïgakïrï bubuaka aapimï. Xibi buaboitudakai aapimï gïn tïpaltu Diuxi gïn maakakai Diuxi Ibhïadï gïn abhana. Ka ïkiaxdïrï podukai agaitadai Diuxi ix otosa agaitadai Ibhïadï dai kaxkïdï otoi ïgai.

¹⁴ Xibi bia aatïmï Diuxi Ibhïadï gïr abhana kaxkïdï kïï maatï aatïmï sai Diuxi gïr maakimu bïïxi aïkatai bhai ïrhiaragai ïpï ix makïdï ïgai bhai darasakami bia aatïmï gïr bïïtarï ix makïdï ïr maamaradï. Aidï gia ka maiti ïr maamaixapikan dukamikamu aatïmï ka kïïgakïrï bubuakïkai. ¡Gia gï agai xi aagidagi aatïmï Diuxi xïï bhai gïr ïrhidi ïgaikïdï tudu mos ïï gïdukatai dai kïï tiodikatai ïgai!

Pabora daanïi Diuxi buaboitudadami Efesoïrï óídakami bïïtarï

¹⁵ Kaxkïdï tudu aidï abhiadïrï xi kajioma aanï xïï kïïga buaboitudai aapimï Gïr Nukadakami dai xïï kïïga oigïdai aapimï go gaa buaboitudadami,

¹⁶ aidï abhiadïrï mos aagidiña aanï Diuxi sai kïï bhai gin ïrhidi aapimïkïdï dai mai dagitokai gïn daanturhiña aanï.

¹⁷ Diuxi gïr Oga ïgai dai Gïr Nukadakami Suxi Kristo xadutudaiña dai kïïga ïr gïdukami ïgai dai kïï tiodi. Ïgai tudu daanïi aanï gïn bïïtarï xi gïn maakana tïgibudagai xi kïïgioma maatïkana aapimï ïgai.

¹⁸ Daanïi aanï Diuxi sai kïïga gïn maatïtuldana gïn iibhïdagïrï tudu. Aidï gia maatïkamu aapimï xïïxi ïr gïdukami go bhai ïrhiaragai ix makïdï bia Diuxi gïr bïïtarï, aatïmï gïr bïïtarï tudu ix makïdï ïr bapaidarxigadï. Diuxi gïr báí xi gïïpi bhai ïrhiarakïdï nïnïrakana aatïmï gobai ix makïdï bia ïgai gïr bïïtarï.

¹⁹ Daanïi aanï ïpï xi kïïga maatïkagi aapimï xïï kabami ïr gïdukami Diuxi gubukarhigadï. Gobai tudu ïr go gubukarhigai ixtukïdï aatabuayi ïgai aatïmï buaboitudadamiïrï. Idi ïr go baaxi kïï gïdukami gubukarhigai

²⁰ ixtukïdï Diuxi duakaturhi Suxi Kristo koidadïañdïrï. Dai idi baaxi gubukarhigaikïdï ïïgi gï sïïrhixapadïrï dáí ïgai go Suxi tïbagiïrï ïpï. Gobai tudu ïr go gubukarhigai ixtukïdï aatabuayi Diuxi aatïmïrï.

²¹ Daiñi, Diuxi dáí go Suxi Kristo sai ïgai bamioma gatïanïna xi bhai bïïxi aïkatai gupudagai bipiakami ix makïdï oidaga tïbagiana. Bïïxkïrï bïïtarï Suxi Kristo bamioma ïr gatïanïdami ix toma xorai. Tipukamu aidï tomarhi ïmo ixtumaxi tomarhi ïmo oidakami ix makïdï ïpïan ïxi gatïanïdagi ix xïïxi tïanïi Suxi Kristo.

²² Diuxi maa Suxi Kristo sai ïgai tïanïna bïïxi aïkatai. Dai Diuxi dáí Suxi Kristo saidi ïr modïkana go buaboitudadami bïïtarï, sai podukai bïïxi aïkatïrï tïanïna ïgai go buaboitudadami.

²³ Aatïmï buaboitudadami ïr Suxi Kristo tukugadï tudu. Dai Suxi Kristo ïgai dai gamaakai ixtuma biïgakagi bïïxi aïkatai bïïtarï ix makïdï oidaga.