Apokalipsis 3 - Northern Tepehuan Bible

Suxi Kristo maa ïmo ñoki go Juan go buaboitudadami bïïtarï ix makïdï gïn ïmpaidiña Sardixiïrï

¹ Dai bhodïrï ix makïdï gin ñokidi dai odami maaxi gin tïtïdai, —Ojidañi aapi ïmo ojai go buaboitudadami nukadakamigadï Sardixiïrï ïpï. Dai adukai ojida aapi, Aanï gin ïmadï daja bïïxi gubukarhigadï Diuxi Ibhïadï gin ïmadï dajatai ïgai. Dai aanï ïgai dai dagïka go kubarakami xixabugai ïpï. Dai pokaiti aanï sai maatï aanï bïïxi ixtumaxi ibuayi aapimï. Maatï aanï sai jaa pobïnïrhidi sai kïïgakïrï gin oijadaimi aapimï. Dïï tomaxi ïr buaboi saidi ïr buaboitudadami aapimï bïïxkïrï mai kïïga gin oijadaimï aapimï. Mai kïïgakïrï duduakakami duu óídaga aapimï tudu.

² Kokosokami dukai óídaga aapimï bhaiyoma. Karhioga ugidagai gïn buaboidaraga tudu. Dai ka máí aanï ïpï sai Diuxi mai bhai ïrhidi nïiditai ix tuma buayi aapimï. Kaxkïdï abïr gïn tïgito nïida ix dukatai ibuayi aapimï dai abïr gubuakami dukai buaboitudada.

³ Ïma dukai abïr gïn tïtïgito tudu dai gïn tïgitobïrai Diuxi aatagidï ix makïdï kaï aapimï baasïkioma dai abïr ïïgiada gobai. Dai ix mai pobuadagi aapimï, aidï gia ix dukai daibïi ïïxibogami xuduku mai nïnïrakagi óídakami podukai dibiamu aanï todian dukai dai gïn maakimu gïgïbidaragai.

⁴ Dïï gia oidaga ïïmoko ami Sardixiana ix makïdï mai uurapïkïi go soimaaxkami dai ibhïadï ïpïan maaxi odami ix makïdï kïï buañixi yukuxidï. Dai ïgai bia sïïrhikami xi gïn aadagi yukuxi kïïga totoakami dai xi gin urabagi toma xakoga imïdagi aanï. Poduñimu ïgai tudu buañixikatai ïgai.

⁵ Xorai maitiagi go soimaaxkami bui gï aadatika agai yukuxi totoakami tudu. Dai mai maigobai dasamu aanï tïtiaradï go libroañdïrï xako ojixi go odami ix makïdï kïïgakïrï óídaka agai bïïxkïrï bïïtarï ïpï. Dai bhaiyoma mïï gin Oga buitapi dai tïtïañikarudï buitapi ïpï aagamu aanï sai ix makïdï maitï go soimaaxkami bui kïïgakïrï ïr gin aaduñi.

⁶ Gobai ïr go ñoki ix makïdï aagidi Diuxi Ibhïadï bïïxi go buaboitudadami aipakoga ïmpaiñdadami. Kïïga abïr gïn tïgito kaïka gobai tudu—.

Suxi Kristo maa ïmo ñoki go Juan go buaboitudadami bïïtarï ix makïdï gïn ïmpaidiña Filadelfiïrï

⁷ Daidi go makïdï gin ñokidi dai odami maaxi gin tïtïdai, —Ojidañi ïmo ojai go buaboitudadami nukadakamigadï Filadelfiïrï ïpï. Dai adukai ojida aapi, Aanï Diuxi Ïko Dasadï tïgidu dai Sïïrhi Ibuadami tïgidu aanï ïpï. Dai bia aanï ï galbaaxi sïïrhikami ix makïdï biakatadai rey Dabidkaru. Ix dukai biakatadai ïgai sïïrhikami xi tïanïdagi Jerusalenïrï dai aagagi xorai baakiagi ami dai xorai mai baakiagi, aanï podukai bia sïïrhikami xi tïanïdagi dai maakiagi oigaragai ïïmoko xi bapakïdagi xako gatïanïi aanï. Dai bhaiga aanï xi daidagi xorai ipïrhiadagi aanï ïpï. Dai mai tipu xorai gin daidagi.

⁸ Kïï maatï aanï bïïxi ixtumaxi ibuayi aapimï. Daiñi, tomaxi mai xii gupuka aapimï bïïxkïrï kïïga ïïgidi aapimï gin ñoki dai mai ïxto xi gin buaboitudai. Kaxkïdï gïn maa aanï oigaragai sai aagada aapimï gin ñoki dai mai tipu xorai gïn sobhidagi.

⁹ Dai tïañimu aanï go gaa ix makïdï pokaitiña sai kïïgakïrï ïr judidiu dai yaatagïi urabakatai go diabora, tïañimu aanï sai kuikïskïda ïgai aapimï gïn buitapi. Dai podukai maaxitudamu ïgai ix maatï sai aapimï ïr ix makïdï kïïga oigïdai aanï.

¹⁰ Kaxi gïn aagidi aanï mïsai gïn kabakadana xïïxkadï soimaaxi taatagi dai kïïga gin ïïgidi aapimï. Kïïga gïn kabakadai aapimï tudu. Dai kaxkïdï gïn nukadakamu aanï xi maiti gïn aiyagi ix soimaaxi taatagi xïïxkadï kabami soimaaxi taatagi bïïxi go gaa óídakami. Ayimu tudu ixtuigako soimaaxi taatamitulda iñagai bïïxi óídakami nïidana sa bhai mai ïma dukai gïn tïtïgitona ïgai. Dïï aapimï maiti gïn ayimu gobai gïn nukadatai aanï.

¹¹ Otoma dibiamu aanï tudu. Kaxkïdï abïr oijada go buaboikïdï buaboidaragai ix makïdï ka bia aapimï. Dai maiti abïr gïn dagito xi gïn popoidagi jaa go maitïki ix makïdï bhai daraka gïn bïïtarï.

¹² Daiñi, xorai maitiagi go soimaaxi bui bïïxkïrï bïïtarï óídaka agai kiidïrï gin Diuxiga. Ka mai maigobai iimimu ïgai abhiadïrï. Ix xïïxi kabakami guka sasarakami kiidïrï Diuxi pokaxi kabakami gukakamu ami odami ix makïdï maitiagi soimaaxi bui ïpï. Ami Diuxi kiidïrï tutusamu aanï odami ix makïdï maitiagi soimaaxkami bui tudu sai ka mai tipukana ixdukatai bubaidagi abhiadïrï. Dai kokobadïrï ojamu aanï tïtiaradï gin Diuxiga dai tïtiaradï go gïï kiiki xako oidakami Diuxi ïpï. Gobai ïr go utudui Jerusalen ix makïdï tïbañimu tïbagiañdïrï. Dai ojamu aanï go utudui tïtiaragai ix makïdï biakamu aanï aidï ïpï.

¹³ Gobai ïr go ñoki ix makïdï aagidi Diuxi Ibhïadï bïïxi go buaboitudadami ix makïdï aipakoga gïn ïmpaidiña. Kïïga abïr gïn tïgito kaïka tudu—.

Suxi Kristo maa ïmo ñoki go Juan go buaboitudadami bïïtarï ix makïdï gïn ïmpaidiña Laodisiïrï

¹⁴ Daidi go makïdï gin ñokidi dai odami maaxi gin tïtïdai, —Ojidañi ïmo ojai go nukadakamigadï buaboitudadami Laodisiïrï ïpï. Dai adukai ojida aapi, Aanï ïgai dai bïïxkïrï ibuayi ixtumaxi aagagi aanï sai ibuada iñagai. Aanï bïïxkïrï aagai ixtumaxi ïr buaboi dai aanïkïdï ïpï oidatu bïïxi aïkatai ixtumaxi idui Diuxi.

¹⁵ Kïï maatï aanï bïïxi ixtumaxi ibuayi aapimï. Daiñi, maatï aanï sai maiti ipïrhidi aapimï xi gin dagitoagi dïï gia maiti ipïrhidi aapimï xi kabami gïn aagagi dai gin oidagi ïpï. Ïbogian maaxi gin oidi aapimï tudu. Ïpïan maaxi aapimï ïmo iidagai ix makïdï mai xii uka dai mai xii ïpidi ïpï.

¹⁶ Mosïkaxi palïpi ukakami duu aapimï tudu xi kaxkïdï ix dukai odami xixibaiña iidagai xïïxkadï mai naakïdagi podukai gajiadïrï gïn biamu aanï ïpï.

¹⁷ Aapimï po kaitiña sai ka bia aapimï bïïxi ixtumaxi gï agai gïn ibhïdaga bïïtarï. Kaxkïdï gïn bipidakami gïn ïrhidi aapi ïïgi gïn ibhïdagakïdï po gïn ïrhiditai sai maiti gïn biïga ixtumaxi gïn ibhïdaga bïïtarï. Dïï mai maatï nïidi aapimï ixtumaxi ïr buaboi. Gï agaitadai bhaiyoma xi maatï nïijada aapimï xïï soi dukai óídaga aapimï gïn ibhïdagakïdï. Soititigami aapimï gïn ibhïdagakïdï tudu. Mai nïñiadami dai mai yukusukami duu aapimï di.

¹⁸ Kaxkïdï gïn daanïi aanï mïsai gin sabïdana ixtumaxi biïga gïn ibhïdaga bïïtarï. Gin sabïdabïrai ixtumaxi namïakami ix makïdï ïr oro dukai kïï buañixikami dai ixtumaxi ïr yukuxi dukai ïpï kïï totoakami. Aidï gia ïr buaboikamu xi gïn bidakami dukaikamu aapimï dai kïïga biakamu ixtumaxi gïn aadagi sai ka mai xaïradagi aapimï mai yukusukan dukaikatai gïn ibhïdagakïdï. Aidï gia ïr ïpïan dukaikamu xi gïn duadi gïn bupuji dai bhaigakamu aapimï xi maatï nïijadagi ixtumaxi ïr buaboi.

¹⁹ Gï agai xi maatïkagi aapimï sai bhagaidi aanï xorai oigïdai aanï xïïxkadï mai kïïga ibuadagi. Dai mamaakai aanï gïgïbituldaragai ïpï sa bhai bhïna kïïga tïgibudagai. Kaxkïdï gï agai xi ïma dukai gïn tïtïgitoagi aapimï dai kabami ipïldagi xi kïïga ibuadagi. Tadu gïn ayi gïgïbidaragai ïpï.

²⁰ Daiñi, biaka ïrhidi aanï urabaragai gïn ïmadï. Kaxkïdï kii taagiñana duu kïïka aanï dai gataanïi baakigai. Dai urabamu aanï ïmo kuadagiïrï dukai xorai gin kaïkagi dai gin miadïgidagi.

²¹ Dai Diuxi gin Oga gin maa oigaragai xi abhana daibana aanï ïgai daikarudïana xakoga dakatai gatïanïi ïgai sai gatïanïna aanï ïgai ïmadï. Maitï aanï go soimaaxi buidïrï tudu kaxkïdï gin maa oigaragai xi daibana aanï ami. Dai aanï podukai maakimu oigaragai ïpï xorai maitiagi soimaaxi buidïrï sai daibana ïgai gin ïmadï gin daikarugana xakoga gatïanïi aanï reykatai aanï.

²² Gobai ïr go ñoki ix makïdï aagidi Diuxi Ibhïadï bïïxi go buaboitudadami ix makïdï aipakoga ïmpaidi. Kïïga abïr gïn tïgito kaïka tudu—.