3 Juan 1 - Northern Tepehuan Bible

Go Juan biaturhi go kïïrhi Gaiyo tïgidukami

¹ Bhaiga aapi Gaiyo. Aanï ïr Juan dai gï otoxdi aanï idi ojai ïmo bhaitï kïakamigadïkatai aanï go buaboitudadami. Kïïga gï oigïdai aanï aapi Gaiyo

² dai ipïrhidi aanï sai bïïxi aïkatïrï kïï gï ïldana gï oidakaraga. Maatï aanï sai gï ibhïdaga amakoga kïïga imïi gï oidakaraga kïïga buaboitudatai aapi tudu dai ipïrhidi aanï sai pokaxi kïïga imïna gï tukuga amakoga ïpï. Sai maiti gï aiyagi tomarhi ïmo kokodagai tudu.

^3-4 Aapi Gaiyo, gin maara dukai gï nïidi aanï Diuxi amadïrï dai kaxkïdï kïïga bhai gïn ïrhidi aanï dadakai gïr aaduñi amïkadïrï xako daja aapi. Gin aagidi ïgai sai apia kïïga sïïrhi aatabuayi aapi dai sai apia kïïga oidiña aapi ixtumaxi ïr buaboi. Kïïga bhai ïrhiaraga gobai gin bïïtarï. Xïïxkadï gin maamara Diuxi amadïrï kïïga oijadagi ixtumaxi ïr buaboi gobai sïïrhikïdï ïr ïmo bhai ïrhiaragai gin bïïtarï. Mai tipu gïdukamioma bhai ïrhiaragai gin bïïtarï tudu.

Gï agai aatïmï ix soikïdagi gïr aaduñi Diuxi amadïrï ix makïdï Diuxi bïïtarï aatabuayi

⁵ Aapi Gaiyo, kajioma aanï sai kïïga soikïiña aapi gïr aaduñi Diuxi amadïrï ix makïdï aipako gatïtïïgidi Diuxi ñokidï. Sai soikïiña aapi xïïxkadï ami dïgabuskïdagi ïgai xako oidaga aapi dai sai asta soikïiña aapi ix makïdï mai maatïkatadai aapi ïpï. Kïïga ibuayi aapi Diuxi bïïtarï tudu soikïitai gïr aaduñi podukai.

⁶ Tami gïr ïmpaiñdaragiana dada ïïmo kïkïïrhi ix makïdï soi aapi tudu dai gïr aagidi xïï kïïga oigïdatai soikïiña aapi. Dai gï agai sai apia soikïda aapi gïr aaduñi ixtumaxikïdï tïgitokagi ïgai boiyïrï bïïtarï xïïxkadï amïka gïn dadidagi ïgai ïpamu. Gobai bhai ïrhidi Diuxi tudu.

⁷ Suxi Gïr Nukadakami bïïtarï aatabuayi ïgai boiyïrï iimïitai kaxkïdï. Daiñi, aipako gatïtïïgidi ïgai ñoki go óídakami ix makïdï mai buaboitudai dai maiti ipïrhidi ïgai ix budagi soiñi ixtukïdï óídakagi abhiadïrï go óídakamiañdïrï ix makïdï mai buaboitudai.

⁸ Kaxkïdï aatïmï ix makïdï gia buaboitudai gï agai sai mamaakadagi ixtumaxi tïgitokagi ïgai dai podukai soikïdagi sai apia aagiada ïgai go buaboi aatagi. Podukai bhaiga aatïmï xi urabagi aaduindadïrï tudu.

⁹ Kaxi ojidi aanï go buaboitudadami ami xako oidaga aapi dai aagidi aanï sai soikïiña ïgai go ix makïdï Diuxi bïïtarï aatabuayi. Dïï gia go kïïrhi Diotrefe tïgidukami maiti ipïrhidi xi gïr ïïgiadagi. Arhiïxi ojidi ix gatïanïdagi ïgai go gaa buaboitudadami kaxkïdï.

¹⁰ Dai kaxkïdï xïïxkadï amïka dibiagi aanï maaxiko aagamu aanï buitapi go gaa ix mai kïï ibuayi go Diotrefe. Soi gïr buididiña ïgai gïpiïrï gïr bupaitai dai aagaitai naana maaxi buirudagai gïr buidïrï tudu. Dai ïkobïrakoga maiti ipïrhidi ïgai xi miadïgidagi go buaboitudadami ix makïdï aipako gatïtïïgidi Diuxi ñokidï. Daidiña ïgai go buaboitudadami ami ix miadïgidagi go buaboitudadami xibhïadïrï óídakami ïpï. Dai daidiña ïgai ix makïdï soikïdagi go xibhïadïrï óídakami ïpï dai asta daidiña ix makïdï soikïdagi ix urabagi go buaboitudadami ïmpaiñdaradïrï. Sïïrhikïdï soimaaxi ibuayi go kïïrhi Diotrefe tudu.

¹¹ Aapi Gaiyo, gï oigïdai aanï dai maiti ipïrhidi aanï xi ïpïan buadagi aapi go Diotrefe. Maiti oijada aapi go soimaaxkami tudu dai bhaiyoma oijada ixtumaxi ïr kïïga. Gï tïgitoñi sai odami ix makïdï kïïga ibuayi kïïga mamaaxidi saidi ïr maamaradï Diuxi kïïga ibuadatai ïgai tudu. Dai go soimaaxi ibuadami gobai gia mamaaxidi sai mai urabaka ïgai Diuxi soimaaxi ibuadatai ïgai.

¹² Xibi aagamu aanï ïmai kïïrhi Demetrio tïgidukami. Daiñi, bïïxi go odami ix makïdï maatï go Demetrio pokaitiña sai kïï tuiga. Kïïga maatiga maaxi sai kïï tuiga ïgai tudu kïïga oiditai ïgai ixtumaxi ïr buaboi. Dai aatïmï ïpï ix makïdï ïr ojotosadï Suxi pokaiti aatïmï ïpï sai kïï tuiga ïgai. Dai kïï maatï aapi sai mai yaatagïi aatïmï.

¹³ Naana maaxi gï aagida in ïrhidi aapi Gaiyo. Dïï gia mai kia gï aagida in ïrhidi ojaikïdï.

¹⁴ Bhaiyoma mïï gï dibida in ïrhidi otoma daidi aataga in ïrhidi gï ïmadï.

¹⁵ Gï daanturhiña aanï sai xioma oidakagi aapi kïïga gï ibhïxtakan taadakatai gï ibhïdagïrï. Diuxkïdï gï biaturhi bïïxi go buaboitudadami ix makïdï tami daraka. Diuxkïdï biatulda bïïxkatai gïr aaduñi amïka ïpï. Mosïkaxi.