2 Juan 1 - Northern Tepehuan Bible

Go Juan biaturhi go buaboitudadami

¹ Aanï ïr Juan dai gïn otoxdi idi ojai ïmo bhaitï kïakamigadïkatai aanï bïïxkatai go buaboitudadami. Ïmo biatuldaragai gïn bïïtarï bïïxkatai aapimï buaboitudadami ix makïdï gïn ïmapaidi dai xadutudai Diuxi ami xako daraka aapimï. Ïko bubaidadï aapimï Diuxi aapimï gin aaduñi. Ïmo aadunumï dukai aatïmï, aanï ïmadï aapimï tudu, buaboitudaitai aatïmï ixtumaxi ïr buaboi. Kaxkïdï kïïga gïn oigïdai aanï dai gïn ojidi. Dai bïïxi go gaa buaboitudadami aipakoga óídakami gïn oigïdai ïpï.

² Bïïxkatai aatïmï buaboitudai ixtumaxi ïr buaboi tudu dai bïïxkïrï bïïtarï apia buaboitudadamu aatïmï. Kaxkïdï gïr oigïdai aatïmï aipakoga.

³ Gin aaduñi, Diuxi gïr Oga dai Suxi Kristo ix makïdï ïr Diuxi Maradï kïï tutuiga gïr bïïtarï dai apia kïï tutiaka agai gïr bïïtarï dai oigïda gïr nïijada agai bïïxkïrï bïïtarï. Kaxkïdï bïïxkïrï ibhïxtakan taadaka agai gïr iibhïdaga kïïga buaboitudaitai aatïmï dai gïr oigïdatai aatïmï aipakoga.

Go Juan abïnakidi go buaboitudadami saidi bïïxkïrï apia oijadana ïgai ixtumaxi ïr buaboi

⁴ Gin aaduñi, máí aanï sai ïïmadutai aapimï kïïga oijadai ixtumaxi ïr buaboi. Kïïga ïïgidi ïgai ixtumaxi gïr tïjai Diuxi gïr Oga tudu dai gokïdï kïïga bhai gin ïrhidi aanï.

⁵ Dai xibi ipïrhidi aanï saidi gïn oigïdada aapimï aipakoga. Ïmo maakaragai ñoki dukai gïn aagidimi aanï saidi gïn oigïdadagi aapimï dai mai xu xi gubudakïdï gïn aagidimi aanï. Dïï gia Diuxi gia gïr tïjai ïkioma tïsai gïr oigïdada aatïmï. Suxi Kristo podukai gïr aagidi aidïxi gïr mamaakaitadai ïgai ñoki tudu. Kaxkïdï gï agai sai gïr oigïdada aatïmï.

⁶ Daiñi, aidï abhiadïrï xi buaboitu aapimï ka maatïkana aapimï sai Diuxi gïr tïjai tïsai gïr oigïdada aatïmï aipakoga. Dai xïxkadï ïïgiadagi aatïmï Diuxi ixtumaxi gïr tïjai ïgai gobai maaxitudai sai oigïdai aatïmï Diuxi.

⁷ Daiñi, xi gïn oigïdadagi aapimï aipakoga gobai gïn soiñamu sai mai oijadana aapimï go bupuirumadami ix makïdï aipakoga ajiopai oidigi daama. Muidu ïgai tudu. Pokaitiña ïgai sai mai ïmo odami dukai dibia Suxi Kristo tami oidigi daama. Yaatabogami ïgai tudu daidi ïr buidïrï bïïtïkami ïgai Suxi Kristo.

⁸ Maiti abïr gïn dagito sai gïn bupuirumadagi ïgai tudu. Daiñi, kabami gïr aajagïiña aatïmï gïn soiña ïrhiditai saidi bïï sudakami bhïiyagi aapimï gïn maitïki ix makïdï gïn maaki ïrhidi Diuxi oiditai aapimï ixtumaxi ïr buaboi. Dïï gia xi gïn dagitoagi aapimï xi gïn bupuirumadagi go yaatabogami ïgai aidï gia ka mai bïï sudakami bhïiyi antaada aapimï gïn maitïki. Gïn nukadabïrai tudu saidi bïï sudakami bhïna aapimï gïn maitïki.

⁹ Daiñi aapimï buaboitudadami, tomax makïdï aapimï ix makïdï gajiadïrï dagitoagi ixtumaxi gïr maatïturhi Suxi Kristo ïgai mai bia urabaragai Diuxi ïmadï. Dïï gia bïïxkatai ix makïdï mai dagitokatai oijadagi ixtumaxi gïr maatïturhi Suxi Kristo, ïgai gia bia urabaragai Diuxi gïr Oga ïmadï dai ïmadï Suxi Kristo ix makïdï ïr go Maradï Diuxi.

¹⁰ Gin aaduñi, xi gïn dibidagi ïmo tïtïïgiadami ñoki dai mai buaboi aagagi ïgai aagaitai Suxi Kristo, maiti gï agai xi miadïgidagi aapimï gïn kiiyïrï. Dai maiti gï agai tomarhi xi biatuldadagi aapimï dai tomarhi xi abïnakiadagi sai oijadana ïgai aaduindadï.

¹¹ Daiñi, xi abïnakiadagi aapimï sai oijadana ïgai aaduindadï gobai itïiya ïrhidi sai ka uurapïkïdan buayi aapimï go soimaaxkamigadï ïpï. Maiti gï agai gobai tudu.

¹² Naana maaxi gïn aagida in ïrhidi kia dïï gia mai xu xi ojaikïdï gïn aagida in ïrhidi aanï. Amïka gïn dibida in ïrhidi bhaiyoma dai gïn aatagidagi sai podukai bamioma kïïga bhai gïr ïrhiadana aatïmï gïr nïiditai.

¹³ Diuxkïdï gïn biaturhidi go ïko bubaidadï Diuxi tami óídakami. Diuxkïdï gïn biaturhi go buaboitudadami tami óídakami tudu. Mosïkaxi.