1 Juan 4 - Northern Tepehuan Bible

Go Juan aagidi go buaboitudadami sai gï agai sai kïïga gïn tïgito nïijadagi ix bhai buaboi ñokai go gatïtïïgiadami ñoki

¹ Gin aaduñi, mui odami aipakoga óídakami ikaitiña sai ïgai ïr ñiñokituldiadamigadï Diuxi dai yaatagïiña ïgai. Maiti gï agai sai buaboitudadagi aapimï tudu. Gï agai bhaiyoma sai kïïga gïn tïgito kaïkagi aapimï dai maatïkagi xorai tïgibudadïkïdï ñokai ïgai. Ix bhai Diuxi Ibhïadïkïdï ñokai ïgai xi ïmai tïgibudadïkïdï ïpï.

² Gïn aagidamu aanï ix dukatai maatïkagi aapimï ix bhai Diuxi Ibhïadïkïdï ñokai ïgai. Daiñi, gï agai ix gatïtïïgiadagi ïgai goka ñoki. Gï agai ix gatïtïïgiadagi ïgai saidi Suxi Kristo ïr Diuxi otosadï, dai gï agai ix gatïtïïgiada ïgai ïpï sai kïïga gï tukugatu Suxi gïr ïpïan dukai. Ix podukai gatïtïïgiadagi ïgai aidï gia gï maatï sai Diuxi Ibhïadï podukai aagidi ix gatïtïïgiadagi ïgai.

³ Dïï gia xi pokaitadagi ïgai sai Suxi Kristo maiti ïr Diuxi otosadï aidï gia bia ïgai tïgibudadï go buidïrï kaatïkamigadï Suxi Kristo. Kaxi kajioma aapimï saidi dibiagai go buidïrï kaatïkamigadï Suxi Kristo tudu. Dai aanï agai sai ka aimïrai ïgai tami oidigi daama.

⁴ Gin aaduñi, maamaradï aapimï Diuxi dai kïïga gïn oigïdai aanï. Dai maiti gïn dagito aapimï ix gïn bupuirumadagi go gatïtïïgiadami yaatagi. Mai bhïiyi aapimï buaboidaradï ïgai tudu. Diuxi gïn ïmadï daja kaxkïdï. Dai ïgai bamioma gubuka xi bhai ïgai ix makïdï ïmadï daja go odami ix makïdï mai buaboitudai. Bamioma gubuka Diuxi xi bhai go diabora tudu.

⁵ Go tïtïïgiadami yaatagi ïgai mosïkaxi ïr oidigi daama óídakami maamaradï dai go oidigi daama óídakami tïgibudadïkïdï gamaamakai ïgai ñoki. Kaxkïdï muidutai go oidigi daama óídakami ojoidi ïgai ix kaïkagi.

⁶ Gin aaduñi, aatïmï gia ïr maamaradï Diuxi dai kaxkïdï odami ix makïdï kïïga maatï Diuxi ïïgida kaïkana gïr ñoki ix makïdï gatïtïïgidi aatïmï. Kïïga ïïgidiña ïgai Diuxi Ibhïadï kaxkïdï. Dai Diuxi Ibhïadï ïgai dai soikïi odami sai maatïkana ixtumaxi ïr buaboi. Dïï gia go odami ix makïdï mai maatï Diuxi mai ïïgida kaïkana gïr ñoki. Podukai gï maatï odami xorai ïïgidi ïgai, ix Diuxi Ibhïadï xi go diabora tïgibudadï ïpï.

Mosïkaxi go odami ix makïdï urabaka Diuxi bhaiga xi kïïga gïn ojoigïadagi aipakoga

⁷ Gin aaduñi, kïïga gïn oigïdai aanï dai ipïrhidi aanï saidi gïn ojoigïadagi aapimï aipakoga ïpï. Daiñi, mosïkaxi Diuxi ïgai dai buaboikïdï oigïdai jaa dai mosïkaxi Diuxi ïgai dai gamamaakai gubukarhigai óídakami saidi gïn ojoigïadagi ïgai ïpï. Kaxkïdï gï maatï saidi ïr maamaradï Diuxi go odami ix makïdï buaboikïdï oigïadagi jaa. Dai podukai gï maatï ix bhai kïïga maatï ïgai Diuxi ïpï.

⁸ Kïïga gï maatï tudu saidi odami ix makïdï mai oigïdai jaa mai maatï Diuxi. Diuxi ïgai dai buaboikïdï oigïdai óídakami kaxkïdï.

⁹ Daiñi, mos arhi ïmaduga go Maradï Diuxi dai bïïxkïrï otoi Diuxi tami oidigi daama sai bhai buadana ïgai ixdukatai kïïgakïrï óídakagi aatïmï bïïxkïrï bïïtarï. Podukai gïr tïtïïgidi Diuxi xïïxi kïïga gïr oigïdai ïgai tudu.

¹⁰ Tomaxi mai oigïdaitadai aatïmï Diuxi ïgai gia bïïxkïrï gïr oigïdai dai otoi Maradï sai mukuna ïmo daxdaragai dukai. Podukai gïr buañidi ïgai gïr soimaaxkamiga tudu. Agia gïr oigïdai Diuxi dai pomaaxi idui gïr bïïtarï.

¹¹ Kïïga gïr oigïdai Diuxi tudu gin aaduñi. Dai kaxkïdï gï agai ix aipakoga gïr ojoigïadagi aatïmï ïpï.

¹² Daiñi, tomarhi ïmo odami mai nïidi Diuxi tomarhi ïmo imidagai. Dïï gia ix kïïgakïrï gïr oigïadagi aatïmï aipakoga, aidï gia gï maatï sai gïr ïmadï daja Diuxi dai gïr nïijadamu odami dai bhaigakamu ïgai ix maatïkagi xïïxi kïïga oigïdai Diuxi ïgai.

¹³ Daiñi, Diuxi gïr maa Ibhïadï sai gïr ïmadï dakana. Dai kaxkïdï kïïga maatï aatïmï sai buaboikïdï urabaka aatïmï Diuxi dai sai Diuxi gïr ïmadï daja. Ïmadukai xadïrï gïr maakana ïgai Ibhïadï tudu.

¹⁴ Dai aatïmï ïr nïijadami ix Diuxi gïr Oga otoi Maradï tami oidigi daama sai ïgai ïr kïïgakïrï bubaidadamikana bïïxi óídakami bïïtarï. Gobai aagidiña aatïmï óídakami tudu.

¹⁵ Dai bïïxkatai ix makïdï pokaitadagi sai Suxi ïr Diuxi Maradï ka urabaka Diuxi dai Diuxi ïgai ïmadï daja.

¹⁶ Gin aaduñi, kïïga maatï taatamai aatïmï ix gïr oigïdai Diuxi. Dai kïïga iibhïxtakan taadakana aatïmï kïïga buaboitudaitai ix gïr oigïdai ïgai. Daiñi, mosïkaxi Diuxi ïgai ix makïdï buaboikïdï oigïdai odami dai ïgai gïr mamaakai gubukarhigai ix aatïmï oigïadagi jaa ïpï. Kaxkïdï gï maatï sai odami ix makïdï mai ugutai oigïadagi jaa, kïïga gï maatï ix urabaka ïgai Diuxi. Dai podukai gï maatï ïpï ix Diuxi ïgai ïmadï daja.

¹⁷ Dai bïïx tasai bamioma kïïga oigïdai aatïmï jaa dai bamioma oigïdai aatïmï Diuxi ïpï uraba óídakatai aatïmï ïgai. Kaxkïdï mai bia aatïmï ixtukïdï duduadikudagi ix kaitiadagi Diuxi xïxkadï aagagi ïgai ix bhai kïï dui aatïmï. Ïpïan dukai óídaga aatïmï Suxi Kristo kaxkïdï, oigïdatai aatïmï Diuxi dai oigïdatai aatïmï jaa ïpï.

¹⁸ Gin aaduñi, Diuxi ïmadï aatïmï aipakoga gïr ojoigïdai dai kaxkïdï mai tipu duadimudagai gïr bïïtarï. Xadïrï duduadikuiña aatïmï gïr oigïdatai Diuxi tudu. Dïï gia xi ïmoko ïbhiadagi Diuxi gobai itïiya ïrhidi sai ïgai po gï ïrhidi sai Diuxi gïgïbitulda agai. ¿Ïma dukai ix tuixidï ïbhïidiña ïgai Diuxi? Ix ïbhiadagi ïmoko Diuxi gobai itïiya ïrhidi sai mai kïïgakïrï oigïdai ïmoko tudu.

¹⁹ Daiñi, Diuxi ka ïïki abhiadïrï gïr oigïdaiña kaxkïdï oigïdai aatïmï ïgai ïpï dai kaxkïdï oigïdaiña aatïmï gïr aaduñi Diuxi amadïrï ïpï.

²⁰ Ix pokaitadagi ïmoko sai oigïdai ïmoko Diuxi dïï gia ix kïïdadagi ïgai aaduñdï Diuxi amadïrï aidï gia yaatagïi ïgai dai maiti ïr buaboi ix oigïdai ïgai Diuxi. Mai oigïdai ïgai tomarhi go aaduñdï ix makïdï kïïga nïnïidiña ïgai tudu. Dai kaxkïdï ¿ixdukatai oigïdaiña ïgai Diuxi ix mai nïidi ïgai tomarhi ïmo imidagai di?

²¹ Diuxi gïr maa ïmo sïïrhikami tudu ix makïdï ikaiti sai, —Odami ix makïdï oigïdai Diuxi gï agai ix oigïdada aaduñdï Diuxi amadïrï ïpï— ikaiti go sïïrhikami.