1 Juan 2 - Northern Tepehuan Bible

Go Juan aagai ix dukatai bhaiga aatïmï ix maatïkagi ix bhai buaboikïdï urabaka aatïmï Diuxi

¹ Aapimï gin maamara Diuxi amadïrï, gïn soiña in ïrhidi aanï sai mai soimaaxi ibuada aapimï dai kaxkïdï gïn otoxdi aanï idi ojai. Dïï gia xïduñada soimaaxi ibuadagi ïmadutai aatïmï, aidï gia kïïga maatï aatïmï sai bia aatïmï xorai gïr soiñagi dai gïr ñokituldagi Diuxi buitapi. Ïgai ïr Suxi Kristo ix makïdï kïïga buañixi ibhïadï.

² Suxi Kristo muu gïr bïïtarï ïmo daxdaragai dukai dai bhai dui gïr bïïtarï Diuxi ïmadï soimaaxi ibuadamikatai aatïmï. Dai mai xu xi mosïkaxi aatïmï gïr soimaaxkamiga bïïtarï bhai dui ïgai. Bhai dui ïgai bïïxi go gaa oidigi daama óídakami soimaaxkamigadï bïïtarï ïpï.

³ Daiñi, bïïxi odami ix makïdï kïïga maatï Diuxi dai kïïga bia urabaragai ïgai ïmadï kïïga ïïgidiña ïpï. Dai ix mai ïïgiadagi ïgai, aidï gia gobai itïiya ïrhidi sai mai kïïga maatï dai mai kïïga urabaka ïpï. Podukai gï maatï ix bhai kïïga maatï ïmoko Diuxi dai ix bhai kïïga bia urabaragai ïgai ïmadï tudu.

⁴ Yaatagi tudu ix pokaitadagi ïmoko sai kïïga maatï Diuxi daidi mai ïïgiadagi.

⁵ Dïï gia ix kïïga ïïgiadagi ïmoko podukai mamaaxidi ïmoko sai kïïga oigïdai Diuxi. Podukai gï maatï ix bhai kïïga urabaka ïmoko Diuxi tudu.

⁶ Ix pokaitadagi ïmoko sai urabaka Diuxi aidï gia gï agai sai ïpïandukai oidakagi ïgai Suxi Kristo ïma dukai yaatagïi ïgai tudu.

Go Juan maa ïmo utudui sïïrhikami go buaboitudadami ix gïn oigïadagi ïgai aipakoga

⁷ Gin aaduñi, gïn maakimu aanï ïmo sïïrhikami ñoki ix makïdï gï agai sai ïïgiadagi aapimï. Gïn oigïadabïrai aipakoga tudu. Gobai tudu ïr go sïïrhikami ix makïdï kaxi maatïkatadai aapimï ïïki abhiadïrï. Ïïki abhiadïrï kaïkana aapimï gobai tudu dai maatïkana sai gï agai xi ïïgiadagi gobai.

⁸ Dïï gia xibiapioma Suxi Kristo bamioma kïïga gïr tïtïïgidi ix dukatai ïïgiadagi aatïmï go sïïrhikami gobai ix makïdï ikaiti sai gïr oigïdadagi aatïmï aipakoga. Nïidi aatïmï ix xïï kïïga oigïdaiña ïgai jaa tudu. Dai kaxkïdï ïmo utudui sïïrhikami duu bii gobai xibi ix makïdï gï agai xi ïïgiadagi aatïmï. Dai aapimï ïpï kïïga mamaaxidi sai gï agai xi ïïgiada gobai ïpï gïn oigïdatai aapimï aipakoga. Ka otïrhi imimi go soimaaxkami tudu ka kïïga gïn oigïdaitai aapimï aipakoga. Tukamudagai maaxi go soimaaxkami tudu. Dïï gia Suxi Kristo go Kïïgadukïdï Kudagi tïgidu dai maigobai dadasai ïgai go tukamudagai. Xibi gïn oigïdai aapimï aipakoga Suxi Kristo gubukarhigadïkïdï tudu dai podukai aipakoga kukudadan buayi ïgai gïn soikïitai ïgai ix gïn oigïadagi aapimï aipakoga.

^9-11 Daiñi, xi po kaitiadagi ïmo odami saidi kïïga kudaidaka maaxi oidakaradï dïï gia ix mai oigïdadagi ïgai aaduñdï Diuxi amadïrï, aidï gia apia kia tukapi dukai oidaga ïgai bhaiyoma. Ïgai mai maatïkana ix dukatai oijadagi oidakaradï tukapi dukai kaatïkatai bogïdï. Dïï gia xorai oigïadagi aaduñdï Diuxi amadïrï, ïgai gia ïr kudagiïrï dukai oidakami. Ïgai gia tomarhi ïmo imidagai maiti ibuadana ixtumaxi ixtukïdï gïpiïrï gïxiagi dai tomarhi maiti ibuadana ïgai ixtumaxi ixtukïdï gïpiïrï surhigidagi ïgai jaa ïpï.

¹² Bïïxkatai aapimï ix makïdï ïr Diuxi maamaradï, ipïrhidi aanï sai maatïkagi aapimï ix tuixi gïn otoxdi aanï idi ojai. Gïn ojidi aanï maatïkatai sai ixtumaxi idui Suxi Kristo kïïga namï gïn bïïtarï dai ka oigïrhixi gïn soimaaxkamiga. Kaxkïdï gïn ojidi aanï bïïxkatai aapimï buaboitudadami tudu.

¹³ Dai ïkobïrakoga aapimï ix makïdï kaxi kabakan dukai iimïi gïr buaboidaragïrï, aapimï kïïga maatï Suxi Kristo ix makïdï kaxi oidakatadai ïïki abhiadïrï mai kia kïkibakai oidigi. Dai kaxkïdï gïn ojidi aanï aapimï. Dai aapimï ix makïdï ïr utu iimïdami gïr buaboidaragïrï, aapimï ka maitï go diabora ix makïdï Soimaaxi Ibuadami tïgidu. Kaxkïdï gïn ojidi aanï aapimï ïpï.

¹⁴ Ïpïpï gïn aagidamu aanï ix tuixi gïn ojidi aanï. Daiñi aapimï ix makïdï ïr maamaradï Diuxi, kïïga maatï aapimï Diuxi gïr Oga dai kaxkïdï gïn ojidi aanï. Dai aapimï ix makïdï kaxi kabakan iimïi gïr buaboidaragïrï, kïïga maatï aapimï Suxi Kristo. Kïïga maatï aapimï ïgai ix makïdï kaxi oidakatadai ïïki abhiadïrï mai kia kïkibakai oidigi tudu. Kaxkïdï gïn ojidi aanï aapimï. Dai gïn ojidi aanï aapimï ix makïdï ïr utu iimïdami gïr buaboidaragïrï ïpï. Apia kïïga buaboitudai aapimï tudu dai tïgito ajiopai aapimï Diuxi ñokidï dai ka maitï aapimï go diabora. Kaxkïdï gïn ojidi aanï aapimï.

¹⁵ Gin aaduñi, maiti abïr ïpïan tïtïïgitoda go gaa oidigi daama óídakami ix makïdï mai buaboitudai. Maiti abïr po gïn ïrhiada sai tïïgimu aapimï gïn bhai ïrhiaragai oiditai tïgibudadï ïgai tudu dai maiti abïr adaimuda ixtumaxi oidaga tami idi oidigi daama tudu. Daiñi, odami ix makïdï pobuadagi mai oigïdai Diuxi.

¹⁶ Tami oidigi daama óídakami bhaibitukami biaka ïrhidiña naana maaxi ixtumaxi dai naana maaxi ibuada ïrhidiña ïpï. Mos nïidiña ïgai ixtumaxi dai ka biaka ïrhidiña tudu. Dai bhodïrï gïgïrdukïdï gïn ïrhidiña ïgai biakatai naana maaxi ixtumaxi. Dïï gobai gia maiti ïr tïgibudadï Diuxi. Oidigi daama óídakami tïgibudadï gobai bhaiyoma.

¹⁷ Daiñi, ugiti agai go oidigi ïmadï modukai bïïxi ixtumaxi oidaga oidigi daama ix makïdï biaka ïrhidiña óídakami. Dïï gia xorai ïïgiadagi Diuxi ïgai gia mai ugiti agai dai bhaiyoma oidaka agai bïïxkïrï bïïtarï.

Go Juan aagidi go buaboitudadami sai ayi agai ixtuigako dibiagai ïmoko ix makïdï ïr go buidïrï kaatïkamigadï Suxi Kristo

¹⁸ Gin aaduñi Diuxi amadïrï, ka miadaimi ix ugitiagi oidigi. Dai aapimï kajiomakana saidi dibiagai ïmoko ix makïdï Suxi Kristo dukai gï dasa agai daidi ïr buidïrï kaatïkamigadïka agai Suxi Kristo. Dai xibi kaxi oidaga mui óídakami ix makïdï Suxi Kristo dukai gïn darasai dïï bhaiyoma ïr buidïrï bïïtïkamigadï ïgai. Kaxkïdï gï maatï xibi sai ka miadaimi ix ugitiagi oidigi.

¹⁹ Go odami ix makïdï ïr buidïrï bïïtïkamigadï Suxi ix makïdï aagai aanï xibi ïgai gïr urapïkïiña ïkioma dïï gia gïr dagito ïgai dai ïkobai iji. Kaxkïdï gï maatï ix maiti ïr gïr aaduñi ïgai. Ix gïr aaduñikamudai ïgai kïïgakïrï aidï gia gïr urabakamudai ïgai kia. Podukai gïn mamaaxidi ïgai ix maiti ïr gïr aaduñi kïïgakïrï tudu gïr dagitokai ïgai.

²⁰ Dïï aapimï gia mai pomaaxi. Kïïga maatï aapimï tudu sai Suxi Kristo ïr ïkobai busaidadï Diuxi. Dai ïkobai gïn bubaitu Suxi Kristo sai ïïgi Diuxi bïïtarïkana aapimï. Ïkobai gïn bubaitu ïgai aidïxi gïn maa ïgai Diuxi Ibhïadï sai gïn ïmadï dakana tudu. Dai ka kïïga maatï aapimï ixtumaxi ïr buaboi dai ka mai ïpïamaaxi aapimï go gaa ix makïdï gïr dagito.

²¹ Daiñi, gïn ojidi aanï maatïkatai sai ka maatï aapimï ixtumaxi ïr buaboi. Kïïga maatï nïnïidi aapimï ïmo ñoki ix bhai ïr buaboi dai ix bhai ïr yaatagi ïpï.

²² Dai kïïga ïr yaatabogami ïgai ix makïdï pokaitadagi sai Suxi Kristo maiti ïr go Tïanïdami ix makïdï otoi Diuxi tami oidigi daama. Buidïrï bïïtïkamigadï ïgai Suxi Kristo tudu ix makïdï pokaitadagi sai Suxi Kristo maiti ïr Maradï Diuxi. Ix pokaitadagi ïgai aidï gia gobai itïiya ïrhidi sai mai buaboitudai ïgai Suxi Kristo dai tomarhi Ogadï ïpï.

²³ Bïïxi odami ix makïdï pokaitadagi sai Suxi Kristo maiti ïr Maradï Diuxi ïgai mai urabaka Diuxi. Dïï gia xorai maaxiko aagagi sai buaboitudai ix Suxi Kristo ïr Maradï Diuxi, ïgai gia urabaka Diuxi.

²⁴ Gin aaduñi, gï agai sai gïn tïgito ajiopada aapimï Diuxi ñokidï ix makïdï kaïkana aapimï aidï abhiadïrï xi buaboitu aapimï. Ix apia buaboitudada aapimï gobai aidï gia biakamu aapimï urabaragai Diuxi ïmadï dai Diuxi Maradï ïmadï ïpï bïïxkïrï bïïtarï.

²⁵ Dai go urabaragai ïgai ïmadï gobai kaxi ïr go kïïgakïrï oidakaragai bïïxkïrï bïïtarï ix makïdï gïr aagidi Suxi Kristo sai gïr maaki agai.

²⁶ Gin aaduñi, oidaga odami ix makïdï gïn tïïgida agai yaatagi gïn bupuirumada ïrhiditai dai kaxkïdï gïn ojidi aanï idi ojai mïsai maatïkana dai gïn nukadakana.

²⁷ Daiñi, Suxi Kristo gïn maa Diuxi Ibhïadï sai gïn ïmadï oidakana. Ïgai gïn maatïtulda agai bïïxi ixtumaxi ix makïdï gï agai ix maatïkagi aapimï dai bïïxi aïkatai ixtumaxi gïn maatïtuldagi ïgai kïïga ïr buaboi. Xadïrï gïn yaatagidana ïgai tudu. Kaxkïdï mai aagai aapimï ïmai xorai gïn maatïturhiadagi. Diuxi Ibhïadï gïn maatïturhiadamu kaxkïdï. Ïïgiadabïrai ixtumaxi gïn mamaatïturhiadagi Diuxi Ibhïadï tudu dai podukai urabakatai óídaka aapimï Suxi Kristo.

Juan aagidi go buaboitudadami ix dukatai gï agai ix óídakagi ïgai maamaradïkatai ïgai Diuxi

²⁸ Kïïga gïn oigïdai aanï aapimï gin aaduñi, maamaradïkatai aapimï Diuxi. Apia abïr kïïga urabakatai óídaka Suxi Kristo ïmadï tudu sai podukai xïïxkadï dibiagi ïgai ka kïïga ïïmadagi aapimï dai mai xaïradagi aapimï.

²⁹ Kïïga maatï aapimï sai Suxi Kristo kïïga buañixi ibhïadï tudu. Dai kaxkïdï gï maatï ïpï sai bïïxi óídakami ix makïdï kïïga buañixikami óídaga ïgai ïr maamaradï Diuxi ïpï ïpïan maaxkatai ïgai Suxi Kristo.