1 Juan 1 - Northern Tepehuan Bible

Go Juan biaturhi go buaboitudadami dai aagidi ix tuma bïïtarï idi ojai

¹ Bhaiga gin aaduñi Diuxi amadïrï, aanï ïr Juan dai gïn aagida in ïrhidi ïmo ñoki aagaitai Suxi Kristo dai gïn otoxdi aanï idi ojai. Dai gin ïmadï daraja jaa ïpï gaojaitai aanï. Ipïrhidi aanï sai maatïka aapimï sai Suxi Kristo kaxi oidakatadai ïïki abhiadïrï mai kia kïkibakai oidigi. Dai Suxi Kristo bia ïmai tïtiaradï ïpï. Go Diuxiamadïrï Ñoki ix makïdï kïïgakïrï gïr duduakaturhi tïgidu ïgai ïpï. Bïïxkïrï bïïtarï gïr duduakaturhi ïgai tudu. Daiñi, aanï ïmadï go gaa ojotosadï Suxi kïïga ïr nïijadami ix tumaxi ibuadana ïgai aidïxi tami oidigi daama aimïraitadai ïgai. Kaï aatïmï aatagidï tudu dai asta taatamaiña aatïmï tukugadï. Kaxkïdï gï maatï saidi ïr buaboi ixtumaxi gïn aagidagi aatïmï aagaitai ïgai.

² Ïgai tudu gïr maakai go utudui oidakaragai bïïxkïrï bïïtarï. Biatu ïgai tukugai dai gï maaxitu gïr buitapi tami oidigi daama. Kïïga nïidi aatïmï tudu dai kaxkïdï gïn aagidimi aatïmï xibi sai ïgai duduakatudai odami iibhïadï sai mai kona ïgai tomarhi ïmo imidagai. Ïmadï dakatadai ïgai Diuxi gïr oga ïïki abhiadïrï dai xibiapioma dibia ïgai tami idi oidigi daama gïr bïïtarï.

³ Daiñi, aatïmï ix makïdï ïr ojotosadï Suxi Kristo bia ïmo kïïgadukami urabaragai Diuxi ïmadï dai Suxi Kristo ïmadï ïpï ix makïdï ïr Diuxi Maradï. Dai kaxkïdï gïn aagidimi aatïmï gobai ix makïdï nïidi aatïmï dai kaï ïpï ix makïdï gïr tïtïïgidi Suxi Kristo. Ipïrhidi aatïmï sai biakana aapimï urabaragai Diuxi ïmadï dai Suxi Kristo ïmadï ïpï gïr ïpïan dukai kaxkïdï.

⁴ Dai kaxkïdï gïn ojidi aatïmï saidi kïïga bhai gïn ïrhiadagi aapimï ïpï gïr urabakatai.

Go Juan aagidi go buaboitudadami sai ïpïan tutiakagi ïgai Diuxi mai oiditai tomarhi ïmo tïgibudagai soimaaxkami

⁵ Gin aaduñi, Suxi Kristo gïr tïïgi ïmo ñoki aatïmï ix makïdï ïr ojotosadï. Gïr tïtïgidi ïgai saidi bhodïrï aituldana aatïmï go ñoki go óídakami aipakoga. Dai xibi idi ojiïrï gïn aagidimi aatïmï ï galbaaxi ñoki. Daiñi, Suxi Kristo gïr aagidi sai Diuxi ïr ïmo kudagi kïïga tojakami gï duu ix makïdï itïiya ïrhidi sai kïïga buañixi ïgai. Dai gïr aagidi go Suxi ïpï sai toma lïïchi mai tukamuga maaxi Diuxi ix makïdï itïiya ïrhidi sai mai bia ïgai tomarhi ïmo soimaaxkami abhana dai sai mai yaatagïi ïgai toma lïïchi.

⁶ Kaxkïdï ix pokaitadagi aatïmï sai bia aatïmï urabaragai Diuxi ïmadï dïï gia ix apia oijadagi aatïmï go soimaaxkami aidï gia yaatagïi aatïmï. Go soimaaxkami ix makïdï ibuayi aatïmï gïr mamaaxidi ix yaatagïi aatïmï tudu.

⁷ Dïï gia ix buañixikagi aatïmï dai aagagi aatïmï ixtumaxi ïr buaboi ïpïan dukai Diuxi, aidï gia kïïga biakana aatïmï ïmo urabaragai aipakoga bïïxi go buaboitudadami ïmadï. Dai aidï gia bïïx tasai apia buanai Diuxi bïïxi gïr soimaaxkamiga ïradïkïdï Suxi Kristo ix makïdï aaxi ïgai mukukai gïr bïïtarï.

⁸ Daiñi, ïïgi gïr bupuirumadai aatïmï xi pokaitadagi aatïmï sai mai soimaaxi ibuayi aatïmï tomarhi ïmo imidagai. Yaatagi gobai tudu.

⁹ Dïï gia ix buitapi Diuxi maaxi aagagi aatïmï go soimaaxkami ix makïdï idui aatïmï, aidï gia kïïga gï maatï sai Diuxi iduñimu ixtumaxi gïr aagidi ïgai, iduñimu ïgai ixtumaxi ïr sïïrhi gïr bïïtarï tudu dai gïr oigïldamu dai gïr buanadamu bïïxi gïr soimaaxkamiga.

¹⁰ Dïï gia ix pokaitadagi aatïmï sai mai soimaaxi ibuayi aatïmï aidï gia yaatabogami aagai aatïmï Diuxi dai mai buaboikïdï buaboitudai ñokidï. Ïgai ka podukai aagai sai bïïxi óídakami ïr soimaaxi ibuadami tudu.