Filemono 1 - Nouveau Testament et Psaumes en Ndandi Version 1962

¹ Paulo omundu womuliki waKristo Yesu, na Timoteo muga la wetu, Uku Filemono mwanze wetu oyu tusangire omubiri,

² na Apia mwali wetu na Arkipo omusoda oyu sangire netu, nekanisa eyiri omo nyumba yawe:

³ Olukogo lubye nenyu nobuholo ebikalwa oko Mungu Tata wetu noMukama Yesu Kristo.

Olwanzo lwaFilemono

⁴ Ngaha Mungu wage ewasingya omugulu gosi omugulu ngakwibuka omwisaba ryage,

⁵ kusangwa ngowa engulu yolwanzo lwawe nerikirirya ryawe ebyo uwite oko Mukama Yesu nababuyirire bosi,

⁶ kandi ngasaba nyiti erisangira ryerikirirya ryawe riwatikaye eriminya ebibuya byosi byetu omwisi wa Kristo.

⁷ Kusangwa nabiribana obutseme bunene nerisibikya busana nolwanzo lwawe, mugala wetu, kusangwa emitima yababuyirire yabirisikasikibwa busana nawe.

Eribulya eriganyira busana nOnesimo

⁸ Neryo, nomonangabya butubaha omwisi waKristo erikute geka ebitolere,

⁹ nikwa busana nolwanzo ngakugo— Ingye, Paulo, omukwenda, kandi lino omundu womuliki busana na Kristo Yesu—

¹⁰ ngakugo busana nomwana wage, ye Onesimo, oyo nabiributa omo muliki wage.

¹¹ Eri mbere siabya endundi kuwe, nikwa lino ni ndundi kuwe na kwingye.

¹² Yoyo ngamusubaya ukuwe, ngatuma omutima wage kundu.

¹³ Nabya nyanzire iniabya haguma nage, iniatoka erinyikolera omo mwanya wawe omugulu ndi mo muliki busana nengulu yowene;

¹⁴ nikwa sinabya nyanzire erikola kindu utetaliga neryo obubuya bwawe ibwabya butsira bwerihati kanwa nikwa omwanza ryawe risa.

¹⁵ Mbino ekyo kyaleka inialusibwa kuwe akatambi kake, iwatoka eribya naye kera na kera,

¹⁶ butsira kandi ngomukobe, nikwa kwilaba omukobe, inga mugala wenyu mwanze, okwingye kwilaba nikwa okuwe kandi kwilaba aho, omo mubiri nomwisi woMukama.

¹⁷ Neryo wamanyiganza ngo oyu kasangira nawe, umukokaye ngoko wanganyikokya.

¹⁸ Nikwa amabya abirikukola nabi kutse ari komwinda wawe, uganzirebyo kwingye.

¹⁹ Ingye, Paulo, ngasaka omo byala byage, nasyatuhabyo—sindibuga nawe nguri komwinda wage, nikwa uwe uri mwinda wage.

²⁰ Ritya, mugala wetu, nyanzire endundi ukuwe omwisi woMukama. Usikasikaye omutima wage omwisi waKristo.

²¹ Busana neri minya ndeke eriowa ryawe, ngakusakira, neriminya kukandikola kwilaba ekyo ngabuga.

²² Kandi nekindi unyikokoteraye engonde yerigotseramo, kusangwa nyiyiketere busana nerisaba ryenyu nasyahabwa ukwinywe.

²³ Epafra, oyu tubohirwe haguma naye omwisi wa Kristo Yesu, akabakeraya,

²⁴ na Mariko atya, na Aristarko, na Dema, na Luka, abakasangira omubiri haguma nage.

²⁵ Olukogo lwoMukama wetu Yesu Kristo lubye nebirimu byenyu. Bibye bitya.