Bhaebulania 1 - Chimpoto

Chapanga alongela kupetela Mwana waki

¹ Pamwandi hapa Chapanga akalongili pamaheli na akahokolu bhitu na kwa ntundu wamaheli kwa kupetela bhalota bhaki,

² nambu mu machobha ghani gha kujomukela Chapanga alongela na tepani kwa indela jaka Mwana waki. Jombi nde ambaju kwa indela jaki Chapanga akaubhombiki ndema, na kumbeka kubha mpwelelu wa hindu yokapi.

³ Jombi nde ung'anyi wa ulumbalilu waka Chapanga, na alengana kwa chakaka na Chapanga mweni, aukamulaki ndema wokapi kwa lilobhi laki lelibhi na makili. Paakajomwili kugholola mahoku, atami kunani kumahunde hoku, upambala wa chiwoku cha kumalelelu cha Ukolongwa.

Ukolongwa waka Mwana waka Chapanga

⁴ Mwana ahengakiki kubha nkolongwa kupeta bhatumika bha kunani kwaka Chapanga, ngati bhela lihina leapekiwi na Chapanga nde likolongwa kupeta mahina ghabhu.

⁵ Kwa ndandi bho, mtumika bholi wa kunani kwaka Chapanga ambaju kwa chikahi chokapi chela Chapanga akumpwaghi, “Wehapa nde wa Mwanangu, lalenu nepani mi Atati waku?” Au kupwagha kabhete, “Nepani anangubha Atati waki, najombi anaakubha Mwanangu?”

⁶ Na kabhete, hata Chapanga paakandetiki mbelakeka waki wa kutumbula pundema, akapwaghiki, “Bhatumika bhokapi bha kunani kwaka Chapanga bhapalika bhunjojabya jombi.”

⁷ Na kwa malobhi gha bhatumika bhaki bha kunani kumahunde, Chapanga akapwaghiki, “Chapanga abhatenda bhatumika bhaki bha kunani kumahunde kubha mpongu, na bhatumika bhaki bha pundema kubha imuli ya moto.”

⁸ Nambu kwa malobhi panani jaka Mwana, Chapanga akapwaghiki: “Wenga Chapanga, chitehu chaku cha ukolongwa, chitamakila mileli na mileli! Nanaghu ubhatawala bhandu bhaku ngati moipalakila.

⁹ Upaliki matendu ghambone na kuhakalila uhakau. Bhela Chapanga, Chapanga waku, akuhawili, na akujeghili mahuta gha chiheku chikolongwa kupeta bhajaku.”

¹⁰ Bhelabhela Chapanga akapwaghiki, “Wehapa, Bambo, pakutumbula hapa ukabhekiki luhuli ya ndema, na kwa mabhoku ghaku ukabhombiki kunani kumahunde.

¹¹ Yeniheyi yokapi anaipetaje, nambu wehapa anauhighalyaje chikahi chokapi, na yokapi anaihakaaje ngati ingobhu.

¹² Anawibhilangaje ngati likoti, nayombi anaing'anambukaje ngati ingobhu. Nambu wehapa ngacheung'anambuka, na wala hyaka yaku ngacheijomoka.”

¹³ Bho, nde kwaka mtumika bholi wa kunani kumahunde ambaju Chapanga akalabhali kumpwaghila kwa chikahi chokapi chela: “Utamaje upambala wangu wa kumalelelu, mbaka panabhabhekaje maadui bhaku, pahi ja magholu ghaku?”

¹⁴ Bho, henu bhatumika bha kunani kwaka Chapanga nde akanane? Bhombi nde roho bhabhuntumaki Chapanga, na ambabhu bhatumakika kubhajangati bhandu bhala bhabhijopalya ukengaleku.